點解會咁ge....西維爾球員佩亞達心臟病發死亡???

我聽到呢個消息都覺得好突然，我本來以為佢只係輕微心臟病發，休息下會無事，但估唔到佢咁就離開我哋，所以我都好唔開心。
不過我相信今次只係個別事件，佩亞達其實喺開賽前三日先至通過體檢，出事當日正選更加正選上陣，顯示佢出事時狀態良好，亦都無明顯跡象顯示佢有唔妥。所以我相信今次出事係同佢嘅體質有關。另外據聞佩亞達其實有前科，佢曾經試過兩次因為頭痛而臨時俾人頂替，另外佩亞達正式嘅死亡原因係死於ARVD，ARVD據知係一種隱性嘅心臟毛病，可以係遺傳性，所以一個可能性係佢天生有呢個病，但因為呢個病係隱性，所以喺一般身體檢查入面查唔到佢有呢個病。
另外，其實致命嘅並唔係喺球場上面嗰一次暈低，佩亞達喺比賽途中暈低之後，隊友達古天奴域以及隊醫有幫佢做即時急救，佢最後係由一名着住西裝嘅中年男人扶住，自己行出場嘅。
不過好不幸，佩亞達喺返到更衣室之後再次病發，立即送到醫院深切治療部急救，可惜三日後不治，享年僅廿二歲。
我想喺呢度重申本人由於並唔係醫務人員，更加唔係心臟科專家，以上所講嘅嘢只係我呢幾日喺網上睇到嘅資料，所以可能並非全部屬實。如有疑問請向呢方面嘅專家求教。