我想問一d護士的問題 !!?

依家做護士, 吓吓要學位制, 所以如果你想入行, 學歷就梗係越高就越好啦!
如果你想做登記護士(EN), 可以試吓睇吓d私家醫院(e.g. 法國, 養和, 浸會醫院......)嘅護士學校有無收生, 不過佢地雖然無話白字黑字寫明, 但係一般都要求F.7畢業; 而註冊護士(RN)就要更高學歷, 起碼要入到大學讀護理系, 就算當政府醫院護士學校開班, 最低要求都要5 or 6科合格, 其中包括一科理科合格(好彩Maths都算), 同一科"C"或以上啦. 當然你如果係理科生, 佢取錄你嘅機會高d之餘, 你自己都讀得無咁辛苦啦.
如果你想由登記護士轉做註冊護士嘅話, 可以喺你有3年工作經驗後, 報讀公開大學嘅高級文憑課程, 讀8科, 當中包括全職半年左右嘅實習, 費用大概$100000多dd啦, 合格晒之後就可以轉做註冊護士. 但係如果你係後生嘅話就讀得過, 因為其實EN同RN最大嘅分別係在於人工, 但係頂point都係爭幾千, 都唔夠一萬蚊; 而且做嘅嘢係差唔多, 但係RN嘅責任就大好多, 除非你係諗住升到做病房主管, 同埋個社會大趨勢唔好淘汰EN, 否則EN同RN分別唔大.
我唔知你指入讀護士學校難唔難係指入學收生定係你讀書呢. 如果問讀書, 你讀文科相對D理科生, 梗係會吃力少少, 因為佢地已經有個底, 當然讀起D生理解剖同D化學嘢嚟, 會易入腦DD. 但係我覺得最大問題係一邊落病房做實習, 一邊又要應付考試, 都幾辛苦. 另外一點你要考慮嘅就係捱夜, 因為做護士, 喺實習時已經要看夜, 大部份時間早接夜, 夜接早咁輪更, 一定要個人好瞓得, 唔係唔夠精神做錯嘢就大件事.
不過我覺得你選人時人選你, 如果有護校收你, 可以試吓體驗吓喺病房做嘢嘅生捱啱唔啱自己先決定做唔做護士.