尋日响公司附近的同仁堂睇感冒, 已經病到頭腦唔係好清晰, 點知去到個醫師仲講到我好似就快死咁(佢既表情好誇張, 擰晒頭咁), 咁我就對自己身體就更擔心. 不過佢就話仲有得醫, 如果經濟條件許可的話, 用三四萬蚊加三個月時間來搵佢調理一下就會無事架喇, 不過今日就先醫感冒先啦. 跟住出櫃檯執藥, 問佢幾錢一包藥, 佢就答我要計下先知, 點知佢係一路執一路計, 最後執好晒三包藥, 然後先同我講係$700! 睇一次普通感冒居然要$700(平時出去睇都係百幾二佰蚊), 真係襯我病攞我命, 已經俾個醫師講到驚, 仲要俾個價錢嚇一嚇, 响頭腦唔清晰既情況下我亦唯有照俾. 但事後發現好似俾保藥黨呃左咁! 中環同仁堂可能真係有錢人專用既(我之前唔知), 而我就唔係喇(只係普通打工仔一個), 所以我就以後都唔會再去! 寧願搵第二個中醫調理好身體. 若果再去睇, 真係唔病都俾佢嚇到兼"屈"到病!
更新1:
如果一早佢肯講明價錢(我有問佢佢話要計, 點知係埋單先計), 我就唔响佢度執藥啦, 等於去半島飲咖啡我都知價錢先入去啦!
雖然唔係俾唔起$700(股票單日上落波幅都夠响果度睇幾十次), 但真係好唔滿意佢地唔專業既服務態度!
問啲staff啲藥醫乜又唔清楚, 問醫師平時煲乜湯水飲會好啲又唔答我, 只係叫我過幾日來覆診啦, 好似規定係要人搵佢醫先得. 唔欣賞佢地不以客為本既服務態度. 一個字: 差 !!
(以上純粹個人試過之後的意見而已)
