有冇人知赤柱監獄入面的生活狀況

✔ 最佳答案

第一日
到左監房, 會先去"指模房"登記, 打手指模, 影相, 然後剝哂衫, 見醫生, 做健康檢查. 然後"通柜", 跟住領囚衣拖鞋, 再去儲起包頭 (即係你的衣服, 鞋蜜, 銀包等私人物件), 再等見監頭. 跟住去食晚飯, 然後番監倉發悶. 晚上10點半熄燈.
第二日
晨早六點起床, 跟住食早飯, 然後去"新人組"聽阿Sir講規例, 跟住俾阿Sir盤問有無黑底等. 中午食粥. 下午新人去摺信封 (即係政府用果d公文袋), 跟住去做運動, 然後五點食飯. 睇一陣電視就番倉發傻. 晚上10點半熄燈.
二星期後
除左會正式脫離新人組, 落期數 (即係被分配工作, 例如: 洗衫, 清潔, 木工, 打鉄等), 其他不變.

食飯: 中國人早上(7.30am!!倒屎咁早!!)會有一碟白飯, 餸就係一塊肉同菜(塊肉薄到風吹得走!), 鬼佬就有多士奶茶, 印度人有薄餅, 中午時(12.30pm)中國人有一個包同一杯粥, 鬼佬有西餐, 印度人有咖哩. 晚飯時 (5.pm!!!正常人的tea time!!)中國人有一碟白飯, 餸就係魚同菜(條魚連貓都唔食!), 鬼佬有西餐, 印度人有咖哩, 另人人都有一個橙, 宵夜就一塊牛油麵包同一杯奶(奶粉沖的!)另外茹素人仕有齐, 糖尿病有低殿粉餐, 伊斯蘭教可食免豬餐, 諸如此類. 每個餐的份量都由營養師指定, 要有醫生紙先可加餸加飯. 非常難食! 總之餓你唔死, 飽你唔親. 任何額外要求, 都要有醫生証明有需要先得.
探期: 被定罪的犯人嘅探期, 係每個月兩次, 每次半個鐘. 但犯人可經監頭簿申請每月加多兩次探訪, 即共4次. 通常都批. 但你只係佢女朋友, 唔算親属, 所以記得叫佢申請加你個名在探訪名單上, 否則你探唔到.
你每個月可入大tempo紙巾 10包裝1條; 祝君早安毛巾2條; 6本雜誌, AAA / AA電8粒, A4纸一本. 亦可在犯人申請後入錢俾佢經福利官買收音機同電鬚刨. 監獄出面d士多仔有齊可入俾佢嘅野賣.
信件: 監獄內寄俾犯人既信件, 全部都會被懲教署職員拆開檢查. 在確定封信無違禁物後, 個信封會被職員收起, 唔會俾個犯人. 只係會俾封信佢. 原因係怕有人將毒品收藏在個郵票同信封之間. 如果個犯人想要番個信封, 就要提出合理理由, 例如: 想要番個回郵地址, 向獄方申請攞番. 就算申請成功, 個郵票都會被撕走.
寄信俾犯人要注意以下要點:
(1) 一定要在信封面及每一頁信寫上犯人的編號. 監獄咁多人, 同名同姓嘅人大把. 所以唔寫名都唔緊要, 但唔寫編號嘅信個犯人係收唔到嘅. 而且因為無左個信封, 所以要在每一頁信寫上犯人的編號, 以防撈亂左可以揾得番.
(2) 唔係一定要白色信封 / 信紙. 但信封 / 信紙上千祈唔好貼上任何貼紙. 否則封信會一個個窿, 因為d貼紙會全部被剪去(理由同上).
(3) 信封内除左信紙唔可以附有任何物件, 例如: 錢, 郵票, 回郵信封, 食物, 書簽, 咭片等等. 否則個犯人會被叫去收押室(俗稱: "指模房"), 職員會在佢面前將封信存入佢份私人物件(俗稱: "包頭")內, 到佢出獄先交還佢.

監獄而家好文明, 巳經完全唔似監獄風雲咁. 你唔好理人咁多, 唔去攪人, d人亦唔理你. 亦無人會強姦你, 踢你入黑社會. d人個個係度挨時間, 等出冊. 你唔寸寸貢, 佢地都唔想攪事. d阿Sir亦唔會打你. 佢地都係打份工, 唔想攪事.
總結來說, 監獄可用一個字形容: "悶". 日日見埋同一班人, 夜晚又一齊瞓. 無任何私人空間或時間. 唔舒服無人理, 日日掛住屋企人, 又無女人.......

有冇人知赤柱監獄入面的生活狀況

回答 (2)