去過Q-PET買鼠鼠既請進

A.鼠鼠得唔得其實好睇點揀,而家間間其實差唔多
以前就有報導過有鼠店係黑店,我都試過買左D鼠真係幾個月至1年,不過間野執左,希望再冇呢d咁既鼠店啦

揀鼠鼠要留意以下幾點:
1)最好夜少少先去買,因為鼠鼠係夜晚活動日頭訓覺,所以太早去買鼠鼠會比較呆,咁就難分佢係咪有病
2)唔多點郁既鼠鼠可能有病,好多病都會令鼠鼠好疲倦
3)留意鼠鼠身形會唔會特別肥or特別瘦,兩樣都唔好既,可能太早戒奶,唔健康or過肥,甚至體內有癗腫
4)留意鼠鼠既毛有冇甩左一部份,會唔會有腫瘤,摸落去會唔會好"鞋"咁
5)眼睛唔好有眼水,要乾淨,可以完全張開
6)鼻要乾淨清潔
7)呼吸正常,唔會喘晒氣咁
8)腮部冇問題,可以正常地放野食入腮同整到出唻
9)排泄位置乾淨清楚,唔會瀉瀉地
10)冇外傷,冇流血

B.元朗Q-PET我有去過,我住屯門去呢度方便,鼠物品都唔算貴,服務都OK,試過打去問野,佢都答得好仔細(唔知係咪個個都係咁),你去之前可以先打去問有冇你想要既鼠同問價)
Q-Pet元朗店
地址: 擊壤路14-18號崇德地下C舖
電話: 2442 9911
營業時間: 10:30am – 9:45pm

C.但我冇留意該店既鼠價錢,但一般既鼠大約價錢如下:
小灰霸大約 $6-20
小紫王大約 $6-40
小銀弧大約 $30-60
小露寶大約$10-30
熊仔鼠大約$50-150

C.而買鼠時要買既物品:(大約價錢)
1)鼠籠(數十~數百都有)
要揀一d地板係冇一間間既,因為一間間既地板好易會卡住鼠鼠,我細個時就係因為咁而有隻鼠因為咁而死.鼠鼠好多都會咬籠,如果怕佢地成日咬,可以買一d較密封既籠.
2)水樽
多數籠都包埋,每次換水時必須用手試下係咪出到水.
3)沖涼粉($30)
有分普通同藥性,買藥性都ok,但記得唔好成日沖涼,一星期1-2次,唔可以用水沖涼.
4)磨牙石($10)
唔磨牙會死既,所以一定要有,普通既同鹽磚都ok,如果鼠鼠唔咬,就最好買d木制玩具俾鼠鼠咬,唔係隻隻鼠都會咬特定既野,因為佢地唔知樣物件係點用既.
5)轉輪(較大$30~55)
都係多數籠會包埋,但都要留意唔好係一間間會卡鼠腳既,唔係都會好危險.鼠鼠好需要活動,而大多喜歡轉輪,所以都係必需品.
倉鼠係夜晚活動,日頭訓覺,怕嘈既話可以用一d安靜既轉輪,又可以搽d牛油落去個軸度,當然咁整要成日洗下個轉啦. 咬籠嘈既你就訓練下佢,佢咬既時候鬧下佢(最緊要係個態度,佢唔明你講咩架),或者唔理佢,佢唔咬就俾少少野食佢食(主糧度俾一粒佢已經足夠)
6)鼠糧($20~30)
買一包咩都有d既混合主糧就可以,唔需要買零食,我個人經驗係愈少雜食,鼠鼠身體愈健康,可以去到年老都冇病.唔好俾鼠鼠食蔬果,因為易肚瀉,又可能有農藥等問題
7)木糠($5~30)
可以既話買d較貴既木糠,因為冇咁碎,碎既木糠易令鼠鼠有呼吸道問題,而有味既木糠就唔好買啦,加埋鼠既排泄物味,係會好臭既,都易令鼠鼠敏感.
8)屋仔(跟籠or自買,約$30~50)
有屋仔會令鼠鼠住得安心d,較有安全感,唔好買草屋之類易爛既屋仔,唔係會整親鼠鼠
9)額外物品(視情況而定)
除左轉輪,鼠鼠玩既玩具最好係鼠鼠專用既木制玩具,因為自己整既木易有刺,可以俾鼠鼠爬唻爬去,鑽唻鑽去既就多數都會玩.
唔好買波波球之類(有d係成架車,車上有個球,類似既玩具),都算係危險既玩具,因為通風做得比較差,而且鼠鼠被困入面,好有壓迫力,想像下你被困一個咁既物品入面,行極都出唔到去有咩感覺?所以我就覺得呢款玩具唔係幾適合鼠鼠玩既