幫幫忙~~請問金銀衣紙可以晚上摺嗎?

我從小爸爸都教夜晚只可以摺衣紙﹐唔可以摺金銀。問佢原因﹐佢話已經忘記﹐係我阿爺教佢咁做。

夜晚係可以摺衣紙架... 七月十四燒街衣﹐好多人都係夜晚摺衣紙啦

阿爸話... 其實夜晚唔係一定唔可以摺金銀﹐只要點住香黎摺就冇問題。因為好多人嫌成日都要睇住d香火好麻煩﹐所以先變成夜晚唔可以摺金銀o者。

你屋企辦緊白事﹐祖先神位封起左無香爐點香... 你用個橙做香爐黎點香就得。你擺個橙o係摺金銀地方嘅附近﹐點一著(3支)香﹐一路摺一路keep住有香火﹐個橙用完丟落垃圾筒就ok。

咁點解殯儀館入面就算夜晚都可以摺金銀?
因為靈堂一定係燒住香﹐所以夜晚摺都冇問題。

其實如果摺唔晒d金銀﹐可以o係靈堂一張一張咁樣化俾先人... 唔一定要摺到一隻隻元寶咁。如果太多摺唔晒﹐放埋落副壽度都得。(*記得留返幾條完整金銀摺棺材﹐師傅/殯儀館職員應該有教)

燒金銀有d規矩﹐都係我阿爺教落﹐可能好多人都唔知﹐順便一提﹕

* 唔好將d一張張未摺嘅金銀疊埋o黎燒﹐如果唔係燒到落去d錢會黏埋一舊﹐個“收件者”要慢慢將d錢切返開﹐好麻煩。不過又唔使逐張逐張燒... 你好似平日數d一疊嘅紙張咁﹐將一疊金銀上下搓幾下﹐等佢地唔好一張疊實另一張就ok (sorry, 文字上好難表達個動作)

* 好多人會用膠袋﹑附薦袋﹑“寶箱”載住摺成一隻隻元寶狀嘅金銀﹐然後“凳”下d金銀等佢放得平均d﹐可以擺多d。其實依個做法好錯... 因為“凳”過d金銀就變假銀紙﹐燒到落去就冇用。

我係比較雞婆﹐盡量都想跟返阿爺教落o個套... 唔迷信何必拜神﹐要拜神咪盡量做足d囉... 當然依d野都係信不信由人啦...

我屋企以前有人做殯儀館﹐好多拜神習俗我地都跟得好足﹑知得比較多﹐如果你有問題﹐歡迎寄信俾我呀。


2007-08-10 16:19:33 補充：
sorry, 寫錯字! 係“記得留返幾條完整金銀‘攝’棺材﹐師傅/殯儀館職員應該有教”先o岩...係‘攝’唔係‘摺’... sorry...

2007-08-15 10:36:08 補充：
金銀可以“壓”唔可以“凳”﹐殯儀館職員做法無問題... 做佢地o個行d人唔會明知故犯﹐你唔駛擔心如果唔可以“壓”低d金銀﹐咁連一隻疊一隻咁擺上面都唔得啦。唔可以“凳”... 因為會令d金銀“犀來犀去”﹑“凳來凳去”﹐咁就會變左假銀紙。就算用膠袋裝住金銀拎出街都冇問題﹐只要拎膠袋嘅人唔好將個袋fing來fing去就ok。“壓”冇問題﹐“壓”得扁都唔緊要﹐唔好壓到d金銀爆開晒就可以。

2007-08-15 10:57:25 補充：
夜晚摺金銀的問題...1支香或者3支香都可以﹐不過1支香好難插入個橙度﹐所以先叫你用3支香。唔係拜神無乜所謂﹐keep住有香火就無問題。夜晚摺金銀唔係乜野特別儀式﹐點解要開到d燈好光猛呢? ^-^“ 如果你覺得暗﹐或者個心驚驚地咪開多d燈囉... 你唔使驚架﹐下面d”朋友“唔會騷擾著孝嘅人... 開唔開燈都係睇你自己鍾意啦

2007-09-06 15:09:10 補充：
因為問者係匿名發問﹐只好用“評價”留email給問者: [email protected]