聽說有人做7-11的店務員，有很不愉快的經驗，可否說一說？

你好~我依家o係7仔做緊暑期工......

如果有人想做7仔, 我真係希望佢諗清楚, 尤其是女仔, 因為不論男女, 7仔對員工都冇特別優待, 女仔都要搬貨, 上啤酒, d玻璃樽酒好重, 又要用cutter, 總之上完d貨, 就唔難會發現自己周身瘀, 手指有傷痕......

總之, 7仔就係一份好講體力ge工作, 新入職就會俾你番2日4個鐘, 跟住就要每日8個鐘(早更：7-15、中更：15-23、夜更：23-7)
有時, 如果間舖唔夠人手, 就要番多d鐘, 好似我咁, 我o係大舖train一個禮拜, 調o左落細舖, 因為大舖唔夠人, 再調番o黎大舖......跟住就...每日番11個鐘~!!!(at least)
仲試過有次接我更o個個女仔走o左更, 我要同佢頂埋, 唔走得~!!! o個日我朝9晚11(total:14hrs)......諗起都覺得驚...
呢個禮拜每日at least10個鐘, 企到隻腳青筋曝現......一休息就好tired, 周身痛...
始終7仔都係一份同錢有好大關係ge工作, 收錢要小心d, 因為有d人會去7仔交租(屋村舖常見), 分分鐘幾千蚊上落, 收到假銀紙、收錯錢(short錢)都要你自己賠(我賠o左成舊水...), 所以數口唔多好ge人做就要小心d......
夜晚間舖只會得2個人, 女仔ge會有d危險, 我試過俾d客性騷擾...

做7仔記憶力好都好緊要, 因為你要儘快記晒d煙名、工作程序(eg. 一番工就要打card take attendance, 數櫃錢, 數電話card, 數煙, 問o下上一更ge同事有乜雜誌未番貨; 放工前又要數多次電話card、煙、倒冰櫃ge水)......乜野都要問得清清楚楚, 否則後果自付...
通常買煙ge人都唔會好好脾氣, 唔識煙名會俾d客鬧到暈...
因為7仔好多野都係從謾罵中學習, 唔俾人鬧、唔賠過錢, 係學唔到ga, 始終唔會好似o係學校咁, 有個專人一次過教晒你, 你要邊學邊做, 個學習模式好唔同, 要慢慢適應...

做7仔係唔係辛苦, 都要視乎間舖ge大細, 如果間7仔屬於細舖(冇美食吧、思樂冰、雪房細...), 間舖都算好做......但係呢d舖好少ga......通常有ge, d阿姐(正職7仔師奶)都會爭住做, 希望有好表現俾經理睇, 唔會俾人調o左去第二間, 所以呢d舖ge人事鬥爭都幾勁, d阿姐見你係新人就蝦你, 乜都唔肯教, 跟住愈來愈少鐘數番, 等你因為乜都唔識就被人調走.........(我係其中一個受害人)

此外, 都要睇o下d同事+經理ge作風, 有d阿姐同經理真係好好人, 如果o係呢d舖度做, 即使係大舖, 好忙, 都會做得好開心......
每個人ge作風都唔同, 有d好嚴, 有d就鬆......總之做ge時候要慢慢就佢o地...

唔好以為做7仔只係得個企字咁得閒, 間舖冇客ge時候, 就要醒目d扮忙(eg. 抹抬, 執貨...), 如果唔係都會俾d阿姐鬧到嘔......



不過, 總括來說, 我認為今次ge暑期工令我學到好多野, 雖然有時會遇到d不愉快事件, 但係我都覺得係一個好好ge經驗, 因為可以俾我見識到將來出o黎工作ge同事關係, 呢d野愈早見識過愈好......
如果體力不足, 又唔想做咁多個鐘, 我會建議做補習, 最低人工都係$35/hr, 唔似7仔得$20/hr......