想去萬宜大廈,H&M,金鐘廊,灣仔碼頭,路線應該點好??

如果你要以灣仔做終點站, 我建議你可以去咗中環先, 因為萬宜大廈同H&M都係中環, 而且H&M朝早比較無咁多人會好行d, 下晝開始會好多人, 可以的話最好早d出發,玩具反斗城開朝早10:30am, 而H&M都係開10:30am, 由於我唔知你係搭咩車過中環, 我會以中環地鐵站為中心.

去到中環地鐵站, 出c出口, 即德輔道中出口, 往上環方向, 左手面沿途會見到sasa, 創興銀行, 舒適堡, 昭隆街, 盤谷銀行, 利源東西街, 直行就會見到萬宜大廈, 之後去H&M, 由玩具反斗城個出口係砵典乍街, 沿砵典乍街條斜路, 行返上皇后大道中, 就會見到H&M.

行完H&M, 就去金鐘廊, 雖然金鐘同中環其實係好近, 可以行到過去, 不過如果你唔係咁熟路, 我諗你都係搭電車比較穩陣d, 而且天氣咁熱, 會行得好辛苦. 電車都係 $2蚊, 好快就到幾分鐘都唔洗. 你只沿住之前條路行返出德輔道中, 會見到好多叮叮, 行去往灣仔方向嘅車站, 是但上一部都啱, 咩跑馬地呀, 筲箕灣呀都啱了, 上咗車之後好快就到金鐘了, 見到太古廣場就要落車了, 到站後落車, 上天橋唔好往太古廣場方向行, 行另一面, 就會到金鐘廊了.

要去灣仔碼頭,都係建議你坐電車, 因為今程路嘅路程比起中環去金鐘仲遠, 搭電車搭向灣仔方向嘅車, 都係咩車都得, 因為部部車都經灣仔, 去到灣仔修頓球場後面落車, 係灣仔地鐵站上天橋, 往稅務大樓, 會展方向行, 行到海旁就有指示去碼頭了.

其實如果你只係想搭返船去尖沙咀, 中環都有船搭呀, 個碼頭就係IFC旁邊...

唔知啱唔啱用, 不過都希望幫到你啦, Have a nice day!