頭髮會唔會自己吸收其他野?

唔會！頭髮係唔會自己吸收其他物質既！

要去理解點解頭髮唔會自己吸收其他物質就要知道佢哋係點生出嚟既！

頭髮生長係由髮根吸收營養，然後經過新陳代謝把一層層既蛋白質慢慢推出去，咁條頭髮就會越來越長嘞！但一條頭髮中間唔會有管道去輸送營養、或者好似皮膚咁內藏神經線！嚴格嚟講，頭髮除咗髮根嗰截之外，根本係癈物嚟既！

咁點解我哋用洗頭水同護髮用品後好似真係覺得d頭髮軟熟咗同髮質好似好咗咁呢？

原理同你幫你對皮鞋擦鞋油一樣！皮鞋既皮多數係牛皮或羊皮，佢哋既皮膚上面其實有好多肉眼見唔到既細小裂縫，當你搽鞋油上去，大部份既小裂縫都被鞋油填滿咗，相對地平滑咗，咁反光度就會大咗！咁肉眼睇落去就光亮咗嘞！咁你話係咪塊皮自己吸收咗d油呃？係物理既角度睇佢唔係自己absorb咗，而係嗰d油被trap住咗！

呢個過程同樣可以apply係頭髮上！

頭髮既表面其實係由無數既鱗片組成，而鱗片同鱗片之間有唔少既空隙比外來物質藏係裏面！你搽任何嘢上去頭髮度，都會被trap住咗！搽護髮油就會覺得d頭髮有光澤、搽護髮素都係一樣，不過唔及搽護髮油/髮尾油咁有光澤！有d護髮產品加重咗香料既份量，咁用完後既頭髮就會keep住香氣好耐！因為d香料被trap住咗囉！

記住！頭髮係唔會自己吸收其他物質架！d護髮用品話佢有咩 Vitamin原XX，其實有幾多對條頭髮都冇用，係完全吸收唔到架！只有可能trap住咗d Vitamin原XX係條頭髮上！一d幫助都冇！

反而頭皮會吸收到d外來物！所以唔好亂搽嘢係頭皮上！同埋點解話經常染髮同電髮有可能致癌就係咁解嘞！因為嗰d藥水就係會入到我哋身體入面架！