想問下"大笨象揸支槍去打仗 打唔贏返屋企食碗辣椒醬"係源自邊度?

廣東話的童謠檢舉網誌分類：分享2006/12/06 11:38:24
年卅晚，買檳榔
月光光，照地堂，年卅晚，買檳榔，
檳榔香，買紫薑，紫薑辣，買芙薘，
芙薘苦，買豬肚，豬肚肥，買牛皮，
牛皮薄，買菱角，菱角尖，買馬鞭，
馬鞭長，買屋樑，屋樑高，買把刀，
刀切菜，買鑊蓋，鑊蓋圓，買條船，
船頭高，船尾矮，浸死兩個番鬼仔，
一個浮頭，一個浸底。

鷄公仔
鷄公仔，尾彎彎，做人新婦甚艱難！
早早起身都話晏，眼淚唔乾入下間，
下間有個冬瓜仔，問安人老爺煮定蒸，
安人又話煮，老爺又話蒸，
蒸蒸煮煮唔中安人老爺意，
大把拉鹽又話淡，手甲挑鹽又話鹹，
三朝打爛三條夾木棍，四朝跪爛四條裙！
咁好花裙畀你跪爛，咁好石頭畀你跪崩！
橫又難，直又難，
不如捨命落陰間！
人話陰間條路好，我話陰間條路好艱難！

月光光
月光光，照地堂，蝦仔你乖乖瞓落牀。
聽朝亞媽要趕插秧咯，亞爺看牛要上山坡，
哦哦哦……
蝦仔你快高長大咯，幫手亞爺去看牛羊，
哦哦哦……
月光光，照地堂，蝦仔你乖乖瞓落牀。
聽朝亞媽要捕魚蝦咯，亞嫲織網要織到天光，
哦哦哦……
蝦仔你快高長大咯，撐艇撒網就更在行，
哦哦哦……
月光光，照地堂，蝦仔你乖乖瞓落牀。

打開蚊帳
打開蚊帳，打開蚊帳，
有隻蚊，有隻蚊，
快啲攞把扇嚟，
快啲攞把扇嚟，
撥走佢，撥走佢。

點蟲蟲
點蟲蟲，蟲蟲飛，飛到荔枝基。
荔枝熟，摘滿屋，
屋滿紅，陪住個細蚊公。

落雨大
落雨大，水浸街，
亞哥擔柴上街賣，亞妹出街着花鞋，
花鞋花襪花腰帶，珍珠蝴蝶兩邊排，
有錢打對鈴琳鼓，冇錢打個石榴牌。

拍大髀
拍大髀，唱山歌，
人人話我冇老婆，扚起心肝娶返個，
有錢娶個嬌嬌女，冇錢娶個豆皮婆。
豆皮婆，食飯食得多，屙屎屙兩籮，
屙尿沖大海，屙屁打銅鑼。

氹氹轉
氹氹轉，菊花圓，炒米餅，糯米糰。
亞媽叫我睇龍船，我唔睇，睇鷄仔，
鷄仔大，攞去賣，
賣得幾多錢？賣得三百六十五個仙。

曖姑乖
曖姑乖，曖姑乖，曖大姑乖嫁後街，
後街有鮮魚鮮肉賣，又有鮮花戴，
戴唔晒，擺落牀頭畀老鼠拉，
拉拉拉，拉去大新街，
大新街又有個扯皮鞋，扯下開，又扯下埋。

點指兵兵
點指兵兵，點着誰人做大兵，
點指賊賊，點着誰人做大賊。

大笨象，揸支槍
大笨象，揸支槍，去打仗，
打唔贏，返嚟食碗辣椒醬，
隔籬屋企燒炮仗，問你響唔響，
唔響掌你兩巴掌。