咩係CMOS???各位電腦高手救下我部腦

CMOS 係電腦母板（或稱底板）上面用嚟記住部腦D配置既小型記憶體（同RAM唔同），要靠一粒圓餅電池養住。

CMOS裏面既資料對部腦好重要，例如RAM有幾多，硬碟幾大（其實係講緊硬碟裏有幾多片磁片，幾多個磁頭等等），仲有係部腦既日期、時間等，全部靠CMOS記住。

CMOS有圓餅電池養住，所以拔走電源都唔會無咗D資料，一插返電就開到機。

但CMOS有時都會出事，D資料無咗或者部份資料『花』咗，咁就會開唔到機。引致CMOS出事既原因好多，靜電、老化、圓餅電池唔夠電都有可能。

你既情況係你錯按F12，你應該按F1入去BIOS Setting，部機會自已再檢測D RAM，你再按F10儲存就無事。你按咗F12，就會把所有設定重設為原廠設定。

一般嚟講，今時今日D母板絕大部份都自已檢測配置，原廠設定都應該開到機，只係日期同時間唔啱，所以你部腦顯示咗2002年，無論開幾多次機都會一樣。

你現在應該係開機時，在未見XP logo前，按F1進入BIOS設定，SET返D日期同時間，按F10儲存，再入XP，裝返D驅動程式就無事。

但我懷疑你部腦粒餅電可能到期，如果你今次之後再出現咁情形，就好可能係粒餅電無電。如果粒餅電真係無電，咁粒CMOS裏面D資料就會係熄機之後無晒，你再開機，日期又會去返2002年，SET幾多次都一熄機又無晒。

換呢粒電要拆開機箱，你唔識既話都係唔好搞嘞，始終係電器，有火警危險。粒電就好平啫，如果附近有電腦舖頭，抬部腦去俾人換啦。

希望我既解答幫到你。

好簡單，換左底板粒CR2032電池set回時間便可以了