勞工處轉介服務代表?

1. (面試名額)係指該份工有指定既面試名額 ，會喺已轉介人數後面有個被括號括住既數字。譬如有份工有10個面試名額，勞工處已轉介咗3人，就會顯示 3 (10) ，而通常只有政府工先會有設定面試名額，你上面講嗰份工就冇，即係話僱主想見幾多人就幾多人，見到請啱人為止。

2. 而當你入房見就業主任，無論你申請既工要求你寄信又好，傳真又好，email又好，只要就業主任有print封介紹信俾你既話，就算係同你轉介咗，冇print就唔算轉介。而只有招聘上冇提供僱主聮絡方法，或者係啲要登記約見既政府工，先需要轉介。好似你上面份工，已經有埋email address，根本唔需要轉介，自己send email就得；就算轉介咗，只係攞多封印咗僱主email address既介紹信，對你應徵呢份工根本無咩作用。

3. 如果見會計文員，一般當然唔少得會計公開試證書，而家一般最低要求係LCC中級，如果有高啲好似LCC高級或者ACCA Level 1甚至Level 2當然更加好，因為太多人讀會計，所以一張堅啲既cert係唔少得。其次就係工作經驗，因為而家做會計唔係剩係入數記賬，好多時要做埋文書，行政等一腳賜；既多煩瑣嘢，工作量一般又都唔低，如果冇咩呢方面既經驗，就算請你，人工都會壓到好低。其實會計呢行競爭好大，想喺呢一行有所作為，捱得之餘，仲要不斷進修，自我增值，先可以脫穎而出，祝你好運！