我唔知仲放唔放得低佢......

中學拍拖都畀人話早熟,何況妳小學?
我覺得妳無論如何都應該放棄.
最首要大前提就係,妳小學生學人拍咩拖?
可能妳聽到會唔鍾意,覺得我嫌妳幼稚.
但係真係喎,小學生拍拖扮大人,成何體統呀?
拍拖唔係講玩架,唔係妳鍾意我我鍾意妳就可以起埋一齊架,仲有好多其他野要諗.
例如妳屋企人畀唔畀啦,學業,社交等等都要考慮.
妳而家就快升中學,如果初中已經掛住拍拖,唔打好個底,遲d有排妳辛苦呀.
妳唔好諗住無心向學,女仔讀多d書都好架.
就算好叻女又點,咁細個拍拖始終弊多於利.
況且家下係妳一廂情願而已.
即使對方追妳,妳為自己著想,都係唔好拍拖為妙.
個男仔都幾曳喎,係咁同女仔拍拖.
妳乖啦,唔好咁早拍拖,起碼中學先好諗.
妳都係岩岩青春期,對異性好奇好正常.
大把小學生都會暗戀人架啦,但係妳大個左就覺得唔係真架喇.
而且妳都唔好係咁將自己同d情敵比較.
係咪因為妳妒忌佢地,所以就話人樣衰又盛呀?
踩低人抬高自己就唔係幾好喇.
兩個人相處,妳估淨係睇樣咩,都睇格嘛.
妳同d朋友仔話又係咪全部靚仔靚女呀?
感情係培養出黎,日久生情,齋睇外表唔多可靠.
講番正題啦,人拍拖妳就唔好學人,專心做妳應該做既事.
我知妳好鍾意佢呀,但係而家唔係拍拖既時候嘛.
妳對佢既暗戀只係藏係心好喇.
唔好以為咁會好痛苦,妳只要諗通左,放開左反而會好放鬆.
妳父母見妳愁眉不展都心痛啦.
妳都快上中學啦,仲有幾日都完左學期啦,妳都同佢隨時各散東西,咁仲諗咁多做咩呢?
讀下中學,妳就慢慢唔記得佢架喇,只要妳唔好同佢見面.
咁段感情就會無疾而終啦.
而家自己一個人靜下諗清楚妳係咪有必要去拍拖.
佢係咪真係咁重要?妳冇佢都唔會死架.
而家妳又唔係幾十歲人,怕冇人要嫁唔出去.
妳十一,二歲,所謂煩惱都唔係煩惱.
獨立d啦,經一事,長一智,
信我,唔拍拖住對妳更加好.

2007-07-08 12:27:26 補充：
妳諗下,拍拖同唔拍拖既分別先.如果妳拍拖,仲要而家小六呢個尷尬位.星期二就升中放榜,一個唔好彩你地同一間中學,又同埋班,妳地日日見,中一已經搞唔掂學業.又一個唔好彩唔同學校,要見面又難,成日約出黎,上堂諗仔,仲邊會聽書?咁早開始拍拖,唔通一定天長地久?如果咁細個指,係兒戲d,好可能好快散.咁就兩頭唔到岸.

2007-07-08 12:27:52 補充：
如果真係長跑仲衰,成個中學階段都係隻拍拖,讀唔起書啦.況且佢有d花心,唔係咁靠得住.相反,唔拍拖最多過一個傷心暑假,開學之後好快冇事,最多忍多一個學期,但拍左拖就後患無窮.而家趁佢唔鍾意妳,反而仲好.咁無論妳想唔想都冇得拍拖.但如果兩情相悅就頭痛,拍拖又太細,唔拍又痛苦.

2007-07-08 12:28:03 補充：
上天安排係最好,塞翁失馬,焉知非福.拍拖妳會後悔,唔拍拖妳反而會慶幸.而家好講真,今時今日讀多d書緊要架,要拍拖都大少少,初中未成熟,學業又未紮好根基.所以都係自己諗清楚咩先對妳最好.少女情懷總是詩,我明,但係自己要理性d嘛.妳叻女黎既,知點做.

答得好厲害!!!

博士級嗰位先生 / 小姐 就講得啱啦~
我而家都係六年班, 就黎升中一嗰批, 我都暗戀過人, 但係我一早諗得好清楚, e 個年齡唔適合, 而且我同佢一定係無可能既, 我好早已經死左條心啦~

讀好啲書佢, prepare 好個中一分班試就ok 架啦~ 你都係十一二歲姐, 大個d 怕咩無人要無人追喎~ 大把機會啦~

而且你同佢唔可以係埋一齊, 根本就係天注定, 你以後既真命天子一定會出現架嘛~
讀好d 書佢, 成績好唔慌無人鍾意你啦~ 係咪?! ~^_^~

你嘗試再同佢表白,得就得,唔得就做朋友

你仲咁細個, 慢慢黎啦, 就算你倆真的可以拍拖, 你認為你們可以拍多夠拍五年?十年?十五年?? 然後呢... 會結婚嗎????

讀書時期的戀愛應是開心的, 不要鍾意就要一齊; 你明白鍾意是什麼嗎? 鍾意一個人是要令對方快樂, 因為愛所以自己見到對方快樂就會同樣快樂, 這就要愛!

既然他選擇了別人, 你就要祝福他, 希望那個女孩子會帶給他快樂! 相反你現在只要因愛成恨, 你根本就不是愛他, 但又難為了自己, 何苦呢???

你成日對住個男仔喊, 就算個男仔鍾意你都怕咗你啦, 男仔最怕女孩喊架啦....! 拍拖是成熟的表現, 但你現在還像個爭玩具的小女孩喎, 又怎叫人鍾意你呢???

有時上天很公平的, 若你倆有緣的話, 祂會安排一個更好的時間給你們, 可能在十年後, 大家也讀完書, 你倆便可以拍幾年拖結婚, 咪仲幸福, 現在的PUPPY LOVE 只可以玩玩, 一齊找找開心便算了...

若你鍾意他, 就祝他快樂, 好好的跟他做朋友, 建立一份深厚的友情先啦!!! 這個時期朋友對你重要過男朋友啦! 堅強D啦... 你的真命天子就在轉角!!! 加油!!!!

暗戀係人生的必經階段,,
真心鐘意一個人係唔會介意佢樣貌如何..
既然鐘意一個人,何不大大方方告訴他,,,
總好過屈係心裏面,,過左去先利後悔自己無為自己的感情爭取付出過,,,
當然愛情呢樣野,,,要雙方都有感覺,,係唔可是勉強,,,
放低一個人更加需要時間慢慢沖淡,,
你就快升上中一,,會認識到更多不同既人同事..
當同佢接觸既機會愈來愈少...你自然就會淡忘對佢既感覺
而且也會找到另一個令你心動的人,,,
暑假期間多d參與團體活動,識多d人,,自然就無時間諗令自己傷心既野,,
希望幫到你啦