請問有冇賢仕能提供擇日期開刀生BB(男仔)的好曰?

我用ge名係「媒」，做媒個「媒」，即係幫人搵生意ge。

之但係講到擇日開刀ge問題，真係可以影響到一個細路仔ge一生，揀得o岩就梗係好，揀唔o岩就累左至少三個人，第一個當然係個細ge，第二個係你自己（長大後唔聽話激死你），第三個係幫你揀日子果個（揀錯左，報應會o係細路仔大過之後報番落呢位仁兄身上）。呢D都係我見過ge神奇事。

先講關於人生命理ge事，世界上每一個人，無論係豪門、平民……都總會有禍有福的，唔好諗埋一面，只會有福冇禍（相信人人都想）。
有錢人的「敗位」多數係d仔女唔孝順，但係大把錢。窮人就相反，冇乜錢，即使子女細個ge時候唔生性，但係大左就會好孝順。

亦即係話，擇日開刀有d好緊要ge重點，就係父母最想仔女將來邊辦好，但就一定有其他位置特別衰，分分鐘得不償失。

因為已經睇過你畀ge日子，呢三日裡面，總共有36個時辰，即係有36條命運，o係呢36條命運之中，都冇一個可以o係正途之中獲得大富大貴ge人，全部都屬於自力更生的命，要靠自己後天努力發奮才有成就的人，但就並非大富大貴（走偏途只可一時富貴）。

講到呢度，你唔好以為可以避開晒呢d日子，因為所有命理都係有一套計算ge公式，你揀ge日子係響農曆六月，成個六月其實都係咁上下，甚至係而家農曆五月或者七月，都係咁上下，或者我應該咁講，成個丁亥年只係得兩三個月會有好時辰。

好喇，講o黎講去，不如順其自然啦，唔好再諗住「擇日開刀」、「改名」、「改風水」等等可以幫到你，記住一句：「一命二運三風水」，排第一ge就係「命」，命唔好就要靠「運」後天努力，命同運都唔好先至去諗風水，但係力量已經遞減。

我幫人做媒搵生意，睇過ge人，通常父母係A級，d仔女自然都係A級，好難有突破。

不過為左做生意，為左收錢，我就話之你地生死……只不過，而家我年紀漸漸大，已經開始見到「報應」喇。

即使你去搵而家ge「蘇ｘ峰」或者「楊ｘ命」，佢兩個都係咁講，但係搵其他ge就唔會咁講。

上述說話，只係我的所見，亦都會得罪好多人，如果　閣下唔鍾意聽，可以「移除」呢條問題，然後再從新發問過，我保證唔會再答。