朋友欠債不還，可以點做。

嘩!!借咗人錢重咁惡, 你估呢個世界真係無王法架咩! 你個case一定贏梗! 無欠單都一定贏. 放心!
你有兩個方法可以追債, 我詳列如下. 但因你一定贏梗, 我會suggest你用方法(1).
方法(1) - 法庭追債
彈票係最容易追討嘅錢債案. 簡單d講, 如果佢唔承認爭你錢, 使乜開支票俾你?! 法例上, 你開得支票俾人, 就要確保a/c入面有錢honour張票. 所以D法官一見到彈票, 己經唔使再審, 判你贏. 你的債項銀碼已過左小額錢債審裁處的處理範圍. 你需要入禀區域法院去追收. 不是一定要有欠單. 只需你有銀行轉數紙或支票過戶紀錄或提取現金之銀行紀錄, 便可做誓章入禀. 問題係, 果3張票係唔係cover哂佢欠你的債的全數? 如果係, 就唔使做以下d野. 直接告佢彈票就得. 否則請去1.a.
1.a. 你需要扮吓柯南, 做d工夫, 集齊以下:
i. 欠債証據 - 諗番你第一次借錢俾佢大約係幾時. 如果果張過數紙已退色或唔見咗, 就揾番本存摺 / 月結單出黎, 影印番你第一次借錢俾佢嘅轉錢紀錄. 呢樣好重要!!因為可以証明係佢爭你, 唔係你爭佢錢. 跟住將其他入數纸 (有無退色都好) 都全部影印及在存摺 / 月結單中找出後影印. 用Excel列個表, 列明幾時幾日轉咗幾多錢去佢a/c, 及總共幾多錢. 呢份就係佢爭你錢嘅欠債証據.
ii. 收取還款証據 - 如果果張未過數的支票唔係期票, 就先去入埋張支票, 預咗佢會彈票. 再從你本存摺 / 月結單揾番佢入四萬俾你果d入數紀錄, 影印. 用Excel列個表, 幾時幾日收咗佢幾多錢. 總共幾多錢. 加埋d彈票. 呢份就係你收取佢還錢嘅証據.
跟住就去區院入稟告佢. 開file費用約$1080. 法庭收到你張稟後會發出傳票, 要佢出庭. 如對方收到傳票而不出席, 法庭可在有足夠理據下,在他決席下判你勝.如對方出席, 咁就各憑自已的理據向個官陳述睇吓個官點判.
她說就算你告她, 她會說是她借錢給你, 你還錢給她. 有高尚職業就講大話一定有人信咩! 嘩! 個官咁易呃, 不如揾盁盁樂樂去做法官啦! 個Court就設係海洋公園, 未審到你單案就去睇吓海豚表演先… Sorry! 愈講愈興奮. 我係超級熊貓fans. 如果佢咁講, 個官第一件事會問, 有無証據借過錢俾你? 有無提款紀錄 / 轉數紀錄 / 支票? 有無欠單? 你淨係清色的入數紙都有3張共11萬. 佢只係有証據轉過4萬俾你. 唔通佢同個官講, 借4萬給你, 你還11萬佢?!大耳窿咩! 重要一睇d日子, 係你先轉數俾佢, 佢後轉數俾你. 唔通佢同個官講, 你未借錢就先還錢俾佢, 然後佢收到你還錢後先借錢俾你?! 真係當個官係熊貓咩!
當法庭判你勝, 你就可憑法庭的命令以合法行動追債. 有車有樓重好. 你可釘佢契, 強制要佢賣樓還債, 或向法院申請個"扣押債務人財產令狀 ( Writ of Fieri Facias)", 任命執達吏去沒收佢擁有汽車 , 傢俬 , 辦公室設備 , 電腦或藝術品等個人資產或動產 , 並將之出售以償還欠款, 甚至申請佢破產. 呢d全部可填form搞掂, 好易做.
方法(2) - 收數公司追債
收數公司亦係可行的方法. 但要留意, 市面上好多收數公司都係由江湖人仕開辦.我見過好多case, 債主收唔番條數之餘重唔見$! 例如: 亂收費用, 收數公司講大話話個收數職員俾人打, 要債主賠湯藥, 甚至收左條數唔交番俾債主! 所以小心選擇! 應找大公司例如 “鄧百氏(Dunn & Bradstreet)”, 就一定穩陣. 佢地會收你條數的30%作為收數費用, 再加堂費律師費等. 都幾甘架! 基本上, 鄧百氏都係做以上方法(1)的步驟去收數. 不過你就俾錢俾人代做咁解.
佢話識人, 唔怕收數公司, 因為佢諗住你揾d爛仔收數公司, 而佢老公做警察, 所以唔怕. 咁係唔係做警察欠債就唔使還? 你同佢講法律, 識曾蔭權都要還錢!
佢話將錢拿去買股票, 最快要七月尾才有錢. 會連利息還22萬給你. 真係咁有把炮唔還俾你, 就唔使要咁死狗俾你啦. 佢借錢時都話會還啦, 而家咪重惡過你! 咁輸咗股票又點? 到七月尾唔還又點? 你真係信佢, 連去海洋公園做海豚表演都無資格! 但錢係你嘅, 如果你要信佢, 咁就叫佢寫張借據囉. 到時唔還就攞張借據去告佢. 我有個post教人寫借據. 你可在我d posts找吓. 我唔重複.
P.S. 如你唔識做稟, 我可幫吓你…