關於反恐怖部隊

我估可能樓主最近剛好睇過 Discovery Channel 述說此故事後，聯想其他反恐事例再有此一問。因為我都有睇。法國憲兵隊 GIGN 攻入機艙救人一事，事後回顧兼拍片當然講到天上有地下無，我哋啲局外人都睇到津津有味。
但事後被國內同其他專業反恐部隊大肆評擊，其中包括 SAS 及 GSG-9。事件從談判、反應程序、部署以至行動，都被批得體無完膚，最嚴厲批評嘅係情況錯判，低估情況、對手人數及武裝。
返正題，樓主講得無錯，該次在馬賽發生嘅劫機事件，根據軍事大師湯姆克蘭西引述，在事發後第二日已經有 SAS 隊員以「觀察員」身份到場，在攻堅形式及行動前部署都有比意見。我估可能就係有比過意見而自傲嘅法國人又唔完全採納，所以事後 SAS 都吠埋一份。 Anyway, 該次事件英國人並無親自操刀。
上世紀 70 年代尾，荷蘭火車被挾持事件，同樣英國人都無落手，但整個計劃；由阻隔列車、行動部署以至協調空軍用兩架 F-104 戰機以超音速低飛；震爆火車玻璃窗比突擊隊員進入等等，都幾乎係 SAS 策劃而由荷蘭人執行；側聞仲有比利時人參與地面突擊及分擔週邊封鎖嘅行動，此點未能証實。
至於俄羅斯劇院的車臣人挾持人質事件有無 SAS 參與，小弟就唔清楚亦唔敢亂答。不過事件在當時嘅政冶環境中，普京對車臣獨立寸步不讓嘅強硬態度，同埋用比正常濃度強 50 倍嘅麻醉氣體作攻堅嘅方式；以至突擊隊進入後見人就殺嘅處理手法，似乎就唔覺有外國介入喇。
請其他高手指正錯誤及分享睇法。

有根據的回答