我完全明白你嘅感受,因為我亦剛剛同男友分咗手。其實個case跟你差不多,同佢拍拖一年多,同居咗一年,分手過幾次,但因為佢寂莫又揾番我,離離合合咁,而我哋終於一個月前分開咗。(我個故事有點長)
起初喺佢叫我同佢一齊住,生活得好開心,但過咗半年後,我開始feel到佢厭咗我,又話我唔夠靚,唔夠高...成日講大話,出去玩。起初我好嬲,成日發脾氣,話分手,但次次都分唔成,自己番轉頭。日子一日一日咁過,發現原來我越來越來愛佢,所以開始忍佢,由得佢去玩,總之佢識路番屋企就得喇,留唔住佢個人,都希望留住佢個心。自己日日諗,又問的friend點樣做好?以為佢悶,自己就做好多嘢...諗住俾啲新鮮感佢,以為可以挽留佢。但其實自己好辛苦,因為佢完全唔領情。我知佢想我走,但我堅持落去,總希望佢會回心轉意......我身邊嘅朋友話我傻,話可能係我自己唔份氣,因為曾經付出咁好多,但感情係雙方面,佢唔再愛你,係事實,唔好再傻落去...但我唔聽,依然一直等。
喺四月中,我要入院做腳部手術,佢送我入院之後就失踪,我call佢,sms佢都唔覆,手術後第二日,佢一個sms話要break up,我成個人即刻崩潰,我留院四日,佢完全無理過我,我足足喊咗四日。家人、朋友個個都好担心我,我亦叫自己死心...可惜我太掛住佢,出院後即刻番去見佢,但佢只係講咗句,"我唔想照顧你,你自己番自己屋企"。嗰刻好似俾把刀插咗落個心度,喊住咁走。過咗幾日,諗住番上去搬嘢走,佢又留我...我以為佢今次真係想同我喺番埋一齊,所以又留低。但過咗一日,佢又話要分手,我心諗你係咪玩嘢?後來我發覺原來我入院期間,佢識咗幾個女仔,仲日日出街玩,我問佢係咪佢追唔到人,所以揾番我,我係後備?佢發我脾氣,throw哂我啲嘢出門口,叫我走,仲話以後唔俾我見我哋養嘅狗狗,我喊住求佢,唔好唔要我,但佢唔理,仲推我出門口...
佢亦講過好多傷我心嘅說話,"我厭咗你喇,,依家想識第二個","你都唔係我想要嗰個我,放過我啦","叫你走,你做乜賴死?唔通我個新女朋友上嚟,我哋三個一齊訓呀?"...之類嘅說話。我嗰刻好痛好傷,喊到死。我應該好嬲,但自己就好似俾鬼迷咁,俾佢話完之後,自己仲繼續留低,毫無自尊地話我唔介意,只要佢唔好離開,我就乜都得...點知我走兩日後就發現自己有咗BB。我打電話同佢講,佢第一句就問"係咪我架?",我嗰刻真係想死,佢叫我落個BB,因為佢唔要我破壞佢一生嘅幸福,佢一定唔會要。我話我想要BB,並不等於要復合,我話我會自己攪掂,點知第二日,佢又氹番我。其實我知佢係氹我,想我去落個BB,但我同自己講,如果佢真係番嚟我身邊嘅話,佢想我做乜都可以...同佢一齊番兩日,其實大家好唔開心,但我真係好亂,,幫我揾埋婦科醫生,佢話依家未ready有個family叫我等佢兩年...第四日,我叫個朋友陪我去個醫生度做咗個手術。個friend問我,點解唔叫佢陪我,我話好怕好似上次入院咁,佢會再次唔理我,但佢知我無咗個BB後,就叫我以後唔好再番上佢度...叫我"死心"唔好再希望佢會再對我做啲乜,佢唔想再迫佢自己去關心我,叫我自己煲啲嘢食,我話唔識,佢話咁唔好食。我啱啱做完手術,點解佢可以咁忍心?可以咁對我?我喊唔出,個心痛到無哂知覺,番咗自己屋企,成晚都無瞓,第二日,自己又死過去,我話想見隻狗,佢話唔俾,我喺留下等咗五個鐘,佢最後叫我上去,開咗度門隙,但我入唔到去,隔住度門,我見到有個女人喺裡面,同我隻狗玩緊。佢話佢住响度,佢要面,叫我走。吓?點解?點解?我連見隻狗嘅最後一面都唔得?點解呢個世上有啲咁賤嘅人?我癲哂!
之後嘅一個星期,我自閉咁,日日喊,邊度都唔去,唔聽電話,食唔落嘢,令到身邊嘅人都好担心自己,我亦一直控制自己,叫自己唔好再揾佢、掛住佢。佢當然無揾我,再過一星期後,佢block埋我msn,我開始担心佢,担心隻狗,自己又開始sms,call佢,直到佢無都理我。
我喺想講,呢個世界大把賤、衰、無良心嘅人(唔分男女),當然啱啱分手嘅日子後,自己一定好唔習慣,好唔開心,做乜都提唔起勁,成日諗起佢,希望有機會復合。當然係唔可以咁容易,一下子話唔再諗佢,其實我依家有時都會諗起佢,因為發生過嘅事係唔可以忘記,但我同自己講,過去就由佢過去啦,佢變咗就係變咗,無得番轉頭。其實揾朋友出街,去旅行...做什麼都無用,因為個問題喺係你自己度。你我自己諗深一層,呢啲咁嘅人,真係值得我哋繼續陪佢哋傻落去咩?可能佢日後會揾番你,但你要清楚佢嘅目的,因為佢依家厭你,日後佢亦會厭第二個。以呢啲人嘅性格,佢哋根本唔懂得珍惜,佢哋嘅愛,係自私嘅,既然佢哋係咁,我就成全佢。我問自己,我唔識恨佢,莫非我唔夠愛佢?...
我當然唔可以做到咁偉大,所謂"雖然你唔再愛我,但只要你活得快樂,我就開心,我會祝福你"。依家嘅我,我只會諗自己,學會自私一啲,揾番啲尊嚴,要學得愛自己,唔可以要家人朋友担心。唔好再浪費青春...依家嘅你同我要努力咁去面對現實,裝備好自己...活好自己嘅每一天,無男朋友嘅日子,都可以好開心,唔好再為啲衰人傷心落去喇...雖然有個無辜嘅生命犧牲咗,但我好多謝"佢",因為"佢"俾我真正正咁睇清楚呢個人。
我哋一齊努力啦! Cheer up, time will heal !
2007-06-26 00:17:30 補充：
大家都係女人,我諗你同我都係一樣,想身邊有個錫、愛、關心同尊重自己嘅男人,一齊生活,去組織一個家,但好可惜我哋揀錯咗對象,大家追求嘅嘢都唔同。當一個人玩game,打爆機之後,佢好自然唔再玩落去,佢對你已經厭咗,你做乜,佢都唔會再對你有愛嘅感覺。你依家應該要好有尊嚴咁離開佢,千祈唔好好似我咁,俾人趕走,仲要親眼見住第二個女人出現喺佢屋度...至識死心。我相信佢會喊和捨得,因為我哋無做錯,係佢變咗心啫,就算佢日後揾番你,話後悔,你都唔好信,因為只係佢寂莫,知你仲係愛佢,所以至揾你陪吓佢咋。
2007-06-26 00:23:18 補充：
我依家佢嘅一切都唔會再諗,既然佢都己經有new girlfriend,佢一定唔會諗起我。可苦要自己去掛住佢?你嘗試去放低佢,自己振作啲,我自己都做緊,我諗你都一定得架。佢唔愛你,但你要愛你自己呀!
2007-06-26 00:24:06 補充：
我分手嗰日我ex仲sent sms俾我," Im sorry, you take care yourself, just to tell you I rememder happy things" 我sent番俾佢 " say sorry to yourself cuz you lost someone who is really love you" 跟住佢話" sorry to myself", 佢都痴架,啲男人永遠唔會覺得自己有錯,所以佢唔會記啲唔好嘅嘢囉。
