有什麼戶外活動 岩19歲的女仔做??

如果露營就去東龍島，星期六有船入，星期日搭船出，不過要你地有裝備。東龍島個營地都近士多，就算唔自己煮食都可以去士多食。又可以行山，又可以睇古蹟（舊炮台），又可以睇浪，週末仲可以睇人攀石（天然石牆），如果咁o岩有敎練肯，可能借裝備俾你地玩番次添。

如果宿營就去長洲，好多渡假屋，未必先前預訂，即使臨時去多數都租到。長洲大把美食，可以租單車玩，可以步行到西灣張保仔洞探險（最好自己帶枝電筒），仲可以行山去花瓶石／人頭石（其實都已經係石屎路），可以東灣游水，參觀北帝廟（即係前排太平清醮地點）、天后廟，仲有以租獨木舟玩（不過有初級證書唔知肯唔肯租）。

如果一日，咁租單車由大圍／馬鞍山踩去大埔／大尾篤，或由大埔踩入去都得，亦有ｄ可以大圍租大埔交車；再唔係就大尾篤租及還。周圍都可以搵野食，傍晚可以大尾篤ＢＢＱ都得，又可以上船灣淡水湖堤壩行下或踩單車，如果好天堤壩都可以賞月。大尾篤出大埔巴士收好夜。

唔踩單車就行山都得，下面個網好多郊遊路線：
http://www.afcd.gov.hk/parks/trails/Chi/hiking/index.htm
不過，要揀合自己能力o既線，仲要帶足夠水同乾糧，衣服鞋襪要適當。
（漁護署個宣傳片都有咁講。）

其實仲有好多o野都玩得o架，不過你提到兩個人就介紹呢ｄ啦。
希望上面有合你心水o既活動。 :-D

2007-06-18 04:50:52 補充：
上面提到獨木舟，更正："仲可以租獨木舟玩，不過如果冇初級證書唔知肯唔肯租"