急!急!急!想買家用式血壓計做父親節禮物

我屋企用AND，日本牌子，依家仲係咪日本生產就唔知，以前就肯定係。 (買過兩個，以前個個十年八載前買，寫明日本生產)
屈X氏有得賣，唔肯定依家賣幾錢，因為早排見到賣四百幾五百蚊，我係三年前左右買，個時六百幾。
OSIM都有血壓計賣，但要成千蚊，好似係有埋測脂。 有次見到做 promotion，拎過黎玩，除左有個測脂外，我又真係覺得無咩特別。 (好似仲有埋個時間顯示既!)
當然，仲有好多牌子既，不過，我自己就用開AND，因為係D醫生/護士介紹買既。
我爸以前係健康院工作，而且，我屋企有遺存性高血壓，所以，個時問過醫生/護士買咩血壓計好。
佢地全部都話買包住手臂個種係最好既。 依家有d係夾手指既，我個人覺得就麻麻喇，哩種除左size細個之外，完全唔覺得有咩好。
係屋企量血壓有咩要注意，哩樣就真係有d難答，首先要問下您本身有無去過醫院/診所量過血壓先?
(我下面講個種情況，係用包住手臂量個種，如果係夾手指個種，我諗唔駛咁麻煩掛!)
首先，量血壓係量左手，放鬆個人坐係椅到，手腕個節手放上檯，正常黎講，隻手大約成75度會係標準，當然又唔駛計得咁準真係岩岩75度既。 總之，量左手，手腕個節手放平係檯到，個人放鬆就ok。 (有樣要記住，行完路/運動完等情況，唔好量，因為咁既情況個血壓會比平時高左既，要休息番一陣先得!)
因為包住手臂個塊野，量既時候會收縮(個塊野係魔術貼黎既)，所以，包既時候唔可以包得太緊/太鬆，真係要貼到覺得岩岩好，唔鬆唔緊，哩樣試多幾次就會feel點貼係最好。
同埋包住手臂個塊野會有條管插住(另一邊係插落部機到)，個條管要放正係手臂上既血管上。(個位係上手臂內側，我真係唔知點講個正確位出黎!)
另外，包手臂既位置，應該係同心臟成水平線。(咁我頭先講過，個人應該係坐係到，上手臂係貼住個身架嘛，咁你feel下自己個心臟大約係咩位就會知包邊到架啦。 因為個個人既身長度都唔同，真係要慢慢摸索先得!)
家用血壓計既缺點丫，其實最準既就係醫院/診所以前用個d水銀血壓計，即係醫生/護士要帶住聽筒黎聽個種，但當然有得買都唔好買個種，因為唔係咁易聽到既，我細個成日拎黎玩，我玩左好多年，到依家都未識聽。
家用電子血壓計，大多數都有上壓、下壓同埋心跳三種顯示。 我細個時聽d老一輩既醫生/護士講，人最標準既血壓，應該係將上下壓相減，得出個數係個個人既年齡，即係例如依家係25歲，上壓同下壓相減之後，得出既數係25，咁哩個人既血壓就係最標準啦。
我係全家族惟一一個無遺存到高血壓既人，我次次量親，將上下壓相減又真係得出自己既年齡(真係會隨住年齡變既!)
如果您真係擔心唔識用既，您或者去有藥劑師既屈x氏買，買既時候可以叫個藥劑師教一教您用。
其實唔難用既，用過一兩次之後就會識架啦。 希望幫到您啦。

時間太趕，你唯有响啲醫療連鎖店(Watson, Manning)或百貨公司買。

如果父親大人唔介意下星期收禮物，建議你去各大公立醫院既病人資源中心買，(開9-5或10-6) 會比訪間同一model 平成百蚊！況且响得醫院賣，質素唔會點差。

注意事項：
1.買cool响手臂比手碗好(條血管較粗，較為準確)。

2.量度前避免太多活動(包括沖凉、食飯)，因為血液會集中响皮膚表面或消化系統。最好先坐或卧15-20分鐘，放鬆整個人，然後先度血壓。

3.量左手，因為比起右手，距離心臟近啲。

4.姿勢：坐或卧都可以，最近要充氣既氣袖同部機及心臟成水平，隻手要有成托(放响枱上或床上)，用細毛巾或cushion輕托手肘。

5.充氣袖要放响手肘對上，要將充氣管對正動脈(條充氣管對正大拇指即可)。

6.接掣即可。如果要重新再量，要休息3-5分鐘，目的喺充氣袖會減低氣袖以下既肢體血液循環(覺得手指麻木)，要卑時間休息。

7.如果有食緊降血壓藥，最好响服藥後2小時才量，可評估藥力功效。

8.1-2次度數並不代表一切，最好記錄好，响覆診時交記錄簿俾醫生參考。

2007-06-16 17:55:05 補充：
sorry，唔記得講，上個月見到醫院病人資源中心手臂血壓機賣：$480！

2007-06-16 22:15:27 補充：
座枱水銀式血壓計雖然準確，但需一段時間的訓練技術，先可正確掌握。遇上心律不正或脈搏較弱既人，難靠耳筒聽得出。而且處理打瀉咗既水銀喺非常麻煩，而家連醫院都甚少用座枱水銀式血壓計，轉用大型插電既血壓機。要確保電子血壓機準確，當遇上有懷疑既度數，除咗重覆再量外，電量不足或電子零件老化都會影響度數。至於理想既度數，因人而異，最好問醫生。