我想請問有無書是比初學者睇？

坊間有本「新日本語基礎」(分上下兩冊，上冊白色、下冊粉紅色)係好書，你買有cd版嘅。仲要買字典機，快譯通同好易通有好多model都有得查日文，有埋發音，發音都幾準。

"行"即是那行是以什麼英文字母開頭，如k行，s行等。"段"即是頭五個字母「a,i,u,e,o」對落數，如k行第二段，即是ki了。

'濁音''促音''拗音'之類在日文中每天都要用，是最基本的，在最初階段已經要識，掌握唔到等於唔使學日文。

學日文方法我有以下提議：

1) 先記住晒所有日文字母發音，包括那些濁音拗音等，要聽清楚cd內或字典機嘅發音，香港有好多人學日文就係連呢啲最基本嘅發音都讀唔準。

2 )試吓掌握日文嘅讀音變化，如「私」(我)，寫係「watashi」，讀其實係「wadashi」，又如「貴方」(你)，寫係「anata」，其實讀應係「anada」，你初學會覺得好難，但慢慢聽吓cd同字典機會掌握到。

3) 學好日文最麻煩嘅數量詞

4) 盡快學動詞，日文嘅動詞變化有十幾種，仲難過英文，香港有好多日本語學校學生學左半年先教動詞，因為驚啲學生覺得難一早就退學。你自己學就唔好怕難，越早接觸反而越好，上面提到嗰本「新日本語基礎」其中一個我覺得最大嘅優點係佢一早己經開始教動詞，仲會分開好多課慢慢教，等你慢慢吸收，相當好。

5) 學好漢字詞語。日文中有好多漢字，而其實呢啲漢字詞語有好多個日文讀音都係由中文嘅普通話發音變化出嚟，如「新鮮」呢個詞嘅日文同普通話發音就一樣。你掌握左日文字母嘅發音後，睇多啲教日文嘅書，留意漢字生字上面嘅日文拼音，慢慢你就會掌握到個規律，知道普通話咁讀，日文應該點讀。

6) 學好片假名。片假名即係日文用來表示外來語用嘅，日本人而家已經好濫用，即係有好多字唔用佢本來嘅日文寫法，而係根據英文，直接用片假名音譯做日文，所以而家日文中有好多生字其實即係英文音譯。香港人係識英文嘅，同學漢字生字一樣，你留心多啲就會知道個規律，知道英文咁串或咁讀，譯做日文片假名時應該係點。

7) 睇多啲日劇同日文版漫畫。日文對香港人最難嘅地方就係日本人講同寫好唔同，雖然未至於好似廣東話咁講同寫完全係兩回事，但好多口語嘅日文都係香港坊間嘅日本語學校學唔到嘅。例如最簡單嘅「我」，日文寫作通常係「私」(watashi)，但講說話時日本人會用其他字代替，男仔用「僕」(boku)或「俺」(ore)，女仔用「atashi」(讀要讀成adashi)等，個「你」字寫係「貴方」(anata)，講說話時都會用，但有時講說話又會用「君」(kimi)，「omae」、「anta」(讀anda)等代替。單是我同你都咁多種講法，其他可想而知。所以學日本人講野最難，要花多啲心機。

8) 當你完成嗰兩本「新日本語基礎」後，日文已經有一定基礎，你去坊間搵嗰啲幫人考日本語能力試嘅參考書，(要買講日文文法嘅，即係幫你考文法嗰張paper嘅，由日本出版社出嘅先買，台灣人自己編嘅唔好買)。就算你唔打算參加考試，嗰啲書對你進軍深層次日文都非常重要，尤其個啲書會大量涉及好多日文副詞嘅運用，副詞係日文講得好唔好一個非常非常重要嘅關鍵，一定要識。

第2點無可能，watashi唔會變wadashi。t同d發音雖然好近，但係都有d分別，外人聽可能有d難分，但係日本人自己係分到。t音絕對唔會變d音。