教狗與訓練狗隻問題

通常咁o既情況你隻狗應該年紀仲細, 會比較活躍同熱情. 我以前養過一隻金毛尋回犬, 都有同樣情況. 一有人嚟我屋企佢就會撲過去, 佢大概一歲嗰陣, 撲埋啲輕磅o既人度真係可以推跌人哋. 下次你隻狗再咁樣, 你要壓低聲線"喝"佢, 比佢知道你嬲, 可以打佢大脾(唔好打頭呀!). 不過你隻狗體型較大肉都厚啲, 你打佢可能你隻手痛過佢, 可以用大o既蚊拍或者滕條輔助, 唔會打傷佢之餘自己都唔會痛. 不過以我經驗, 當隻狗大啲之後就會定啲o架喇, 到時你想佢再咁熱情都難.

其實我個人認為, 你養得隻狗, 就要視佢為屋企o既一份子. 你話佢一襯你哋開門就衝入屋, 佢都係想同你哋一齊啫, 你試諗吓如果你係佢, 成日比人留o係屋外你都唔開心啦. 你話佢淨係驚你工人, 可能你工人打得佢好犀利, 你要留意吓喎. 不如你試吓比佢入屋住, 要散步或者佢要大小便時先放佢出花園, 出完花園先幫佢抺腳, 我以前放狗都係咁做o架. 如果你有怕狗o既客人到訪, 咪暫時將佢困住入籠先囉.

教寵物好似教小朋友咁, 要有耐性同愛心. 佢曳時就打同鬧, 乖o既就應該錫佢多啲, 例如買啲狗o既零食比佢食.