男人真的可以只顧工作, 忘記了女友嗎?

我今年35歲，相信我嘅意見對你有參考價值。

上個月我女友放兩個星期大假，咁啱公司安排我就係喺就呢兩個禮拜到外國工幹，我女友問可唔可以唔去咁耐，我話公司安排左，唔得。我答嘅時候，只係諗到工作，冇諗到第二啲野。

咁你會問我係唔係即係工作緊要過女友？我會話兩樣都緊要。但女友唔得閒陪佢，未必會分手；但工作唔盡全力，分分鐘冇得撈。

男人除非真係李嘉誠，否則一定會覺得同女友一齊係開心過工作嘅。同女友去打波、去旅行，甚至上床唔開心過對住啲文件，貨物同上司？但點解男人一有工作會消失。因為男人要有事業，呢樣係男人用來評估自己叻唔另嘅基準，亦係將來養妻活兒嘅基礎，我都想用好多時間陪女友，但我老豆唔係李兆基，我唔係大把錢喺手，鐘意同心愛嘅徐子淇點都得。呢啲叫無奈。

女人除非係女強人，否則多數有份工就算，放左工就諗娛樂；但男人會要求有份工之餘仲要諗計向上爬，呢樣野要花嘅額外時間同心機會抺殺左好多本來可以用來陪女友嘅時間同精神。

你可以放心，男人唔係忘記女友，只係要攞平衡。事實上要維繫同促進事業上嘅發展的而且確會比去維繫同促進感情嘅發展需要花更多嘅時間同精神，咁點怪得個男友呢？

用個簡單嘅比喻，你去日本玩只需要坐四個鐘頭機，去美國玩就要坐十幾個鐘頭機。你去美國要花多幾倍時間，咁係唔係即係代表你鐘意去美國玩多啲，重視美國多啲啊？唔係架嘛！你會話去美國係要花咁多時間架啦！呢啲叫無可奈何，而多數香港人其實係重視去日本玩多好多。

同樣道理，男友冇花咁多時間陪女友，係形格勢禁。個心入面其實都係prefer同女友一齊多啲架！體諒吓你男友啦！