請問nds個"動物之森"是點玩的???

成個game本身係一個休閒既game，冇乜爆機條件，佢就好似玩the sims咁，只係俾你係一條自己創造既村入面同動物村民生活，隨你自己既喜好去設計屬於自己既村。

一開始，Tom(商店主人)會叫你去佢既店鋪幫手，你著好佢俾你既制服之後同佢講野，佢就會俾野你做架啦。目的主要係介紹個game既function，所以你會幫手種下花、送下貨、寫下信等。

當做完野，你就自由，可以做你自己鍾意做既野，例如探下村民、賣野俾Tom賺錢。賺錢方法有好多種：摘水果（好似有6種，但自己條村一開始只有一種水果，其他要連線或者睇下村民會唔會送俾你）、掘化石、掘土偶、釣魚、捉昆蟲。而最快賺錢既方法係買賣青蕪(蘿蔔)，星期日早上會有隻山豬黎你條村度賣，之後星期一至六，你都可以賣俾Tom，每日有３次唔同既價格。如果好彩，好快就可以賺到足夠既錢黎擴建自己間屋。

至於釣魚、捉昆蟲，你要向Tom買工具：泥鏟(掘化石用)、魚竿(釣魚用)、網(捉昆蟲用)、水壺(淋花用)、斧頭(砍樹用)、計時器(計時，不過冇乜用，只係俾你同朋友玩釣魚比賽時用)。一開始，Tom間舖太細，所以一日只有一件工具可以賣，等你同Tom交易多d，佢會慢慢擴充自己既舖頭。到時，每日都會有多ｄ野賣，而且，擴充百貨公司時，入面會有間髮型屋，可以改變自己既髮型。

而為佐令你唔會覺得太悶，間中會有ｄ特別人物黎你條村，例如：狐狸奸商、保險經紀、長頸鹿時裝設計師等等。仲有每個月一至兩次既特別節目，令你覺得日日充滿新意。

如果你有wi-fi上網，你上網去人地條村，或邀請人地黎玩，咁會有更多樂趣架。希望你會鍾意呢個game啦。

由於呢個game有太多野玩，未能而家一次過講晒出黎。所以如果你有其他唔明既地方，到時你再問，我會盡量答你架。

遊戲目的係起個perfect town出黎，例如種下樹呀、花呀咁啦

玩法主要就係賺錢 -> 買野 -> 還錢 -> 起大間D屋

賺錢方法有好多，可以搖生果樹拎生果、挖化石、執貝殼、釣魚、捉昆蟲等等拎去賣

化石、魚、昆蟲可以拎去博物館捐黎做展覽

有8個鄰居，要同佢地傾計，探下佢地，如果唔係佢地會搬走

仲有好多好多零碎既野，你一路玩就會明架喇 =D