點解會變成咁?...10分

恭喜你，你真係找到真愛啦！一個人可以喺呢四年來同自己無所不談，而今次佢冇打電話俾你你又會咁緊張，你真係好鐘意佢。你地嘅情況有啲似我同我而家個女朋友，由朋友因為大家啱key變成好好朋友，然後再行多一步變成情侶，呢啲通常都係最理想嘅結合，感情基礎會比一相識就發展嗰啲情侶深厚好多，日後可以開花結果嘅機會亦會大好多，呢啲咁嘅姻緣可能可一不可再。你要好好珍惜。

但點解女仔成日都係咁，可以把口好肯定咁話唔愛個男仔，唔想見個男仔，或叫佢唔好打電話嚟之類，但個心又可以完全唔係咁諗。人地話你今次係自己攞嚟衰，講得啱架！不過我女朋友都係咁，所以呢啲野我見到慣，所以講番轉頭，你同佢之間係唔係有啲好實際嘅問題解決唔到？，否則點解你會之前話怕你鐘意佢嘅！我會咁問係因為我同我女友年紀相差好遠，我細佢好多，佢就係因呢個問題之前好驚鐘意我，但個心又真係好鐘意我，所以最後都同我發展。無論你地之間有啲咩野塵世嘅問題都好，唔好俾世俗觀念影響到，真愛係唔可以就咁而輕易放棄嘅！

講番你個問題，我覺得個男仔係鐘意你，至於佢點解咁對你，我覺得好大可能係玩手段囉！可能係佢自己諗出嚟，亦可能係佢身邊一啲有經驗嘅朋友建議，既然你咁樣對佢，佢就同你嚟一個以退為進。如果我係個男仔，你叫我唔好打電話嚟，如果我繼續打俾你，你會鬧我煩住你，雖然女仔經常口不對心，但有時呢啲交嗌得多，個女仔可能最後連自己都欺騙埋，變成真係以為自己係唔鐘意個男仔嘅，咁就大家都冇運行。

於是我就順住個女仔嘅說話，真係唔打俾佢，博一博，睇佢會唔會打番俾我。如果等極都冇電話，咁就證明真係自己自作多情，個女仔唔會鐘意自己，咁就放手。但多數情況下個女仔都會打電話嚟，佢一打嚟就證明左係鐘意自己，越快打嚟就代表越鐘意，睇你嘅描述，你都算快嗰隻，如果我係個男仔，而家一定開心死。

但點解仲要咁對你，因為追女仔嘅戰術要係咁，呢啲係誘敵之計，如果而家睬番你，就會前功盡廢。我要你繼續搵唔到我，繼續冇隱，要將你嘅自信心同自尊心打擊到一個低點，如果換轉係我，我甚至會cup你電話，hurt到你喊嚟增強效果，總之要等你完全失去自控，失眠，流淚，覺得冇左個男仔會死嘅時候，我先走番出嚟搵你，咁幾乎一定追求成功。

玩失蹤，搞對抗，打擊個女仔嘅自信心，係醒目嘅男仔追女仔嘅高明招數，係啲唔識追女仔嘅男仔，先至會直線咁諗送花，送禮物，接送返工返學，對個女仔好，就會追到女仔，其實越咁做個女仔會越以為自己有寶，個男仔會越追唔到。

個男仔會話：「係咪掛住我所以病」，咁即係鐘意你啦！如果對你冇意思，咁仲咁講嚟做乜。當然你會估呢句只係男仔平時口花花之言，但如果我對你冇意思，而同你嘅關係又咁closed，呢句野可能會引致你誤會，橫掂都諗住唔搵你，點解唔小心啲講野，費事因一句話令自己有手尾跟。所以個男仔到呢個時候仍然可以對你講啲咁嘅野，咁即係佢根本諗住仲會同你有將來，咁即係鐘意你囉！講多樣野令你放心啲，女仔經常以己度人，女仔唔駛講風度，所以無論之前同個男仔幾friend都好，而家話唔睬你就可以唔睬你。女仔成日會咁，所以以為男仔都會咁，但男仔係唔會嘅。男仔要講風度，尤其對女仔，如果之前同個女仔好friend，就算而家大家有磨擦，為左避免俾人地話自己冇風度，男仔之家咁小器，所以表面上都會對個女仔客客氣氣。但個男仔會竟然會話：「唔關你事」，係好違反男仔一般對女仔嘅態度，係好冇風度嘅表現，通常只會係喺追女仔時，為左打擊個女仔嘅自信同自尊，先至會特登咁講。

你想挽救呢段感情，你咪打電話同佢講，或留言、send email、send sms，適隨尊便，話你好鐘意佢囉！要知道，男仔同女仔喺角色上好唔同，男仔唔吊高嚟賣，就會追唔到個女仔，但相反，女仔越唔吊高嚟賣，段感情就越容易成事。

2007-05-30 09:03:15 補充：
佢之所以要咁對你，無非都係要迫你講出心入面嘅說話，等你唔可以再口不對心啫！你猛咁同佢講晒你心入面嘅說話，佢知道你唔會再自欺欺人囉，咪會睬番你囉！按照你嘅描述，個男仔唔係最識玩手段嗰種，呢種男仔唔會做到好盡，你肯認鐘意佢，冇幾耐佢就會好好地對番你。

2007-05-30 16:57:48 補充：
你好似驚係習慣，其實習慣有乜唔好，由習慣相處左好耐嘅好朋友進展成情侶，總好過無厘頭咁識左無耐就拍拖，後者咪仲容易散。我都唔明點解有咁多人話好朋友唔好做情侶，其實可以做好朋友已經代表夾，呢樣野本來就係拍拖嘅最基本要素。唔好怕係習慣，就係習慣才可將兩個人拉埋一齊，我同我女朋友就係咁。

唔係我唔幫你..但今次係你自己攞o黎衰..你怕自己鍾意左佢...但其實由你識得咁諗開始..你已經鍾意左佢...點解唔想鍾意佢姐..??想同個男仔鬥耐性..你鬥唔起....你最後咪又係死死地氣咁主動搵返佢....都唔明你o既..又係你叫人唔好搵你..到人地真係唔搵你時..你又忍唔住要搵人...你到底想點..??

而家都好難挽回架喇...除非你可以唔要面咁氹佢..全程由你做主動啦..不過到時即使俾你挽得返..你都已經冇左以前果種感覺....

我唔識果個男仔..所以唔太清楚佢係咪d咁o既人..不過佢用緊呢d招數..我都有得出賣...想令到一個女仔鍾意自己..只要用少少時間俾d錯覺佢..之後個女仔就會習慣左有呢個男仔o係身邊..到最後個男仔忽然變左...個女仔就會覺得唔習慣..自自然然就會想搵返果個男仔...同時個女仔亦都不會不停問自己係咪鍾意左呢個男仔..但其實又始至終..呢個只係一個習慣...

做返自己啦！係就係唔係就唔係，唔好攪到咁復雜，可以係埋一齊，大家又可以傾咁多計，好難得的。希望你明白啦！加油呀！

我估計你說的[不如你唔好打比我啦]得罪了他,只要say sorry和多陪他,就行了.

照咁睇黎. 其實我諗你已經鐘意左佢
只係你唔願意去接受呢個事實姐

你之前成日咁樣叫人唔好打比你
根本就已經傷害左人地個心啦
你講到出聲叫佢唔好搵你
一個男人既自尊心作動就當然唔會搵你啦

搞到今日咁. 我諗你最好諗清楚
你到底想同佢維持朋友既關係
還是想發展到愛情

如果你真係想同佢再發展落去既話
我勸你約佢出黎一次. 心平氣和食一餐飯
問佢到底發生咩事
話比佢聽點解之前你叫佢唔好打比你
繼而係適當既機會向佢講出你對佢既感情
就算只係做朋友. 至少都心安理得!!

最後, 希望你成功啦!!