✔ 最佳答案
投資乜嘢基金好在乎你個人可以承擔風險嘅能力，冇絕對嘅適當性．
後生唔應該全部投晒去保本基金--一般人都會認為係o岩嘅．因為，歷史數據顯示，一D比較穩健嘅增長基金，長線黎講（記住係穩健同長線），回報係會好過保本基金嘅．
並唔係話後生就應該冒高風險（冒幾多風險好在乎個人承受能力），記住，要回報高，風險自然高，唔想冒風險，回報自然就唔會高，例如，而家印度基金回報好高，咁你投晒落去，萬一泡沫爆破，可能要等好耐先會復甦（如果本身冇乜基礎，基金嘅質地唔好，可能翻唔到身，咁積蓄就會化水啦）．
但係，講返轉頭，點解後生可以冒較高風險呢，因為仲有時間追，只要所投資嘅基金質地好（例如某D大藍籌，唔會衰到渣都冇），就算一時跌市，幾年或者十年八年，終有一日會升返．
不過，做呢個決定，要有決心，要忍得（最好唔好去睇基金價位升定跌，因為你有排都未埋單），唔好見佢一時跌市，就心慌，即時低價放晒佢，如果咁做，你就會鎖死咗蝕咗嘅錢，到個市升返，你都冇貨響手，即係蝕嘅係你，個市升你又賺唔到．
總結一下，一般人嘅投資策略：後生嘅時候，將較多比例投入增長基金，較少比例投入保本基金，而呢個組合唔好見個市一郁就轉，keep住一段比較長嘅時間，到中年，就開始將增長基金比例減少，保本基金比例增加，到退休前幾年，就開始部署將增長基金轉成保本基金，以免剛好退休前兩三年跌市，冇時間等個市復甦就要退休--呢D係一般投資顧問所建議嘅做法，可以作為參考，但係每個人應該按照自己嘅意願做自己嘅決定．
2007-05-30 15:07:45 補充：
對樓下網友嘅回答內容有少少補充：似乎唔應該用”至06年五年內嘅回報年化率”同”目前”嘅通漲率對比，而定義某某基金”輸通漲”．唔好唔記得，香港由1998至2004年中曾經經歷過長達６８個月嘅通縮期（即係負通漲）（至06年五年內包括02~06年，即係其中有幾年係負通漲嘅），當時銀行存款利息接近0%，如果基金回報超過1%已經好唔錯（起碼回報高過存錢響銀行）．如果用基金嘅歷史回報數據就要同同期其他歷史數據比較先有意思，如果所取嘅時段唔同，得出嘅結論會誤導你嘅投資決定．
