我好想去台灣讀書?有咩可以讀?

我都算係半個過來人啦~不過我果陣死累咁搵間私校中六讀
讀完中六.放棄左讀中7,逃跑左預科同高考,過左黎台灣讀大學....心態同你有d似

1.其實好睇你自己興趣係咩,因為台灣讀大學係讀四年,
如果你對果個科系無興趣,唔好話畢業,就咁讀你都會讀到想死,如果真係想讀大學,
無論係香港又好,台灣又好,趁而家仲係f.4,最好就慢慢發掘下自己興趣同志向

2.如果,想係香港考台灣既大學,可以去報海華服務基金每年都會搞既台灣大學海外聯招試
通常報名時間都係3月底前,考試既時間係5月底,放榜就係6月底,同AL差唔多時候

3.台灣只有3間大學(國立台灣大學,國立政治大學,國立成功大學),係香港政府承認既(即係你讀完去見政府工,佢會請你,相對地,政府請你,私人企業既接受程度都會高d),但係.如果,係台灣讀完四年大學,返黎香港想繼續讀上去既話,每一間大學都會承認你有學士程度

4.如果係國立(政府)大學既話,一年學費咩費麥費大約2萬加上生活費大概係4萬幾港紙一年(以我自己為例)要視乎學科同學校,但如果係私立大學,一年學費都要3至5萬

5.其實上左大學,基本上可以話係過左海就係神仙....壓力就一定有,不過係邊度讀大學,都一定會輕鬆過讀預科,中學,因為讀大學就係要我地學識自我管理呢樣野,雖然係好free,但係要畢業到,都要好好讀書上堂,同普通返學一樣....壓力反而係自己比自己囉

6.如果你今年f.4...下年考會考,如果考唔到中六而又想去台灣讀,可以去珠海書院讀專為台大聯招試而搞既課程,不過如果無記錯,果個課程好似都要2-3萬港幣一年,你都要睇下你屋企人應唔應付得到,另外,可以係中五畢業之後自修一年,最好就盡力搵間中六,到時先再打算去唔去台灣都可以

7.我覺得,如果,你真係好鍾意台灣,又想出國讀書,係一個唔錯既選擇
一來,學費比起香港,真係平好多,二來,離開香港見識下,開下眼界,台灣係一個唔錯既地方
又唔係太遠,要返香港2個鐘就到
三來,台灣真係有好多唔同既學科,而且,無香港咁局限,雖然香港係先進d,但係呢度既創意多d,而且,係台灣可以學好d國語,對將來返大陸做野又好,留返係台灣做野又好,都對自己有好處,唔好淨係著眼係香港呢個咁細既地方
而且,對於好多學生而言,捱得過會考唔代表可以捱得過高考,要考到香港既大學,真係唔係講咁易......

你好好諗清楚啦....如果真係決定左,就唔好輕易放棄
決定一件事唔難....要維持落去,直至完成先係最難
而且,去台灣讀書會影響你既前途一生,要同屋企人好好溝通達成共識
比埋個台灣大學海外聯招試個網址你
http://www.overseas.ncnu.edu.tw/
希望幫到你 ^^

2007-05-27 00:08:08 補充：
p.s.如果你真係想中5讀完就過黎台灣既話都可以因為,我上面提過果個台灣大學海外聯招試係包含僑大先修班既入學試果個僑大先修班係讀一年,係台北讀,大概3萬港幣到,讀既野都係中英數果d但係,讀完先修班會考試分發大學.同台灣本地生差唔多時期放榜如果中5一畢業就去考聯招試,就只可以考僑大先修班如果係中六or中7,or中5自修一年,就可以直接考大學可能我會講得唔係好清楚....如果真係有問題,可以打去係尖沙咀海防大廈既海華服務基金度問問