✔ 最佳答案
曾經去過多次,你所講的全部玩過。個人的意見如下:
神山一日遊:無錯係一日,朝八晚八,但大部份時間係架車度,去到行吓動植物公園,再自費行吓高空樹橋,再浸吓所謂嘅溫泉。適合一家大細。推薦程度:低
其實神山係好靚,適合遠足行山;但要行山上頂,就要起碼兩日,要係山上旅館過一晚。除非時間充裕,否則唔建議。
潛水:我那次係跟旅行團去時玩嘅,所以對象就係俾無潛水牌嘅人去玩,就係沙比島個海灘浮波以外嘅地方潛。上下晝各濳一個鐘左右,一個教練負責兩個學生,之前會有簡短介紹潛水的知識及安全須知,主要係講英文,但如果好彩嘅話,可能遇到個香港教練。雖然唔係話潛得好深同好耐,但作為一個嘗試確係唔錯。朝九下午三點回程。適合未試過潛水的人仕。推薦程度:高
除此以外,沙巴其實都係一個潛水樂園,亦有專供有潛水牌的活動。當然會去遠一點。
紅樹林:那次係下午三四點出發至八九點,去睇長鼻馬騮及螢火蟲,幾吸引嘅。適合一家大細。推薦程度:中
三級激流:朝八晚六,要坐一個鐘頭車再轉一個鐘頭蒸氣火車,如果係火車迷真係未出發先興奮。大約六至八個人一隻艇,亦有教練跟船,開始前亦有安全介紹。水上活動一定有危險性,但大人小童都可以玩,同團有五十幾歲的亦有不足十歲的玩,同樣開心。推薦程度:極高
沙巴其實好細,無咩特別旅遊景點參觀,亦無咩商場可以行街買野,同時又係伊斯蘭教國家,較少夜生活,唔會好似泰國咁,特別適合喜歡陽光海灘的人。當地大部份酒店都係渡假式酒店,康樂設備齊備,每日更會安排不同的活動,留係酒店都可以玩足一天。如果想多試當地美食,就最好住近市區的酒店,否則來回車程要成個鐘有多就浪費很多時間。
你得三日,建議可以玩激流、潛水同紅樹林,其餘時間可以享受吓酒店。唔好安排得太密,唔係渡假仲忙過返工。