怎同家人開聲話有左

你好,我而家都係19歲,而家有左6個月了,當初知道自己有左既時候,心情同你一模一樣,完全冇諗過唔要個bb,但係又唔知點同屋企人講,因為知道屋企人好錫自己,而自己又做左一件咁錯既事傷害左佢地既心,結果最後我同哥哥家姐講左先,之後同佢地傾下點做,最後就鼓起人生最最最大既勇氣同媽咪講,當時媽咪係呆左,之後爸爸都係房出埋黎,大家知道左,一家人係咁喊,最初佢地係咁鬧我,之後同佢地講清楚自己想點,佢地明白左,都一定會支持你,因為你點都係佢個女,佢地唔會忍心唔理你,就好似你唔忍心唔要個bb一樣,其實你屋企人見倒你喊既,都一定會心軟,唔想再鬧你,因為佢地都會知道事實已經冇法改變,但由頭到尾我都同我老公一齊講比我屋企人知,因為佢要比你屋企人感覺到佢係負責任,佢係會好好咁對你,咁你屋企人先會放心,4月中我都結左婚,所有煩惱都少左好多,其實講完就真係<一天都光晒>唔好怕,因為整個懷孕過程,你最需要既,其實係屋企人最大既支持同照顧,加油呀,你一定可以好似我咁!!!同埋你同你男朋友真係要諗清楚,大家係咪真心希望對方成為自己既終生伴侶,因為結左婚,就係一世,有咩唔開心,都唔可以話分開就分開,因為你地有仔女,你地再唔係單單諗自己,所以大家真係要好好咁相愛同相處,咁對大家同個bb先會好,而且你地感情要好,先可以比你屋企人感覺到你地並唔係玩玩下,你地真係會一世,因為個時我屋企人最怕就係我同我老公都咁細個,點先可以一生一世,又認為我地未懂得愛情,又認為我地仲細唔識得照顧對方同bb,好驚我同我老公會離婚收場,到時就成世人背住個包袱(即bb)做人,但係我同我老公就好堅定,因為我地一齊左5年幾,細細個識到大,亦一齊成長,我地都確信對方係自己既永遠另一伴,唔會有懷疑,所以係屋企人面前盡量表現得恩愛d,細心d,關心多d,咁屋企人亦慢慢會知道你地已經真係慢慢長大,會放心好多,所以無論行為同言語,你都要清清楚楚咁比屋企人知道,你地想點,佢地一定會支持你架!
sorry,講左咁多,因為我同你既情況真係好似,我好希望你都可以好似我咁,鼓起勇氣同屋企人講,之後既日子你就會好過得多,未講個時我都係晚晚訓唔得好,又成日喊,又怕比屋企人拆穿自己,講完之後,雖然好有內疚感,但真係輕鬆左,之後屋企人亦好錫我好照顧我,大家都好期待個bb出世,只要你肯講出第一句,你就可以好快好似我咁,開開心心期待bb出世.加油呀!!!

我今年22歲,而我老公大我20年,依家bb以經4個月大,一開頭我同我老公拍拖,我媽好反對,但都拍左3年,直至舊年3月有左,都係不知所措,唔敢同她講,但係我好想要個bb,所以一定要鼓起勇氣同佢講,冇錯係一定會俾佢閙,但呢個以經係事實,佢都唔會點留難你既,直至依家bb出世,她鐘意到不得了,日日要你抱返去俾佢玩.

~~屋企有個bb真係帶來好多開心野,有佢既存在同屋企人既關係都會好好多~~
~~加油,為左bb,冇野係會驚既~~

當時我有左都好驚唔知點開口同家人講架，其實我阿媽都估到D架啦，因為D老人家識睇架，到左差不多3個月大的時候，我就同我妹講再轉話俾我媽知，不過佢都無鬧我。
我都無後悔生左個女出黎，因為做媽媽都是一件好幸福的事黎既，放心喇，比D勇氣去講啦!

我都係２２歲，雖然平時我同我媽咪咩都講，但一有左就真係小左呢份勇氣！我好明白！
初初知道有左我ｂｆ黎我屋企，有時暗示講：而家兩個人食噃，緊係要食多ｄ啦！ｏｒ
呢ｄ唔食得呀！飲多ｄ奶，唔比出街，訓多ｄ！
見多一兩次之後我ｂｆ開聲講，一見到我媽咪就叫佢”婆婆”
甘佢咪開聲問我，你有左咩？！我話應該係，不過仲未去醫生到ｃｈｅｃｋ！
之後兩日咪再講真係有左！跟住就係甘囉～
自己點驚，始終有一日都要講！一係叫你ｂｆ講，不過要比埋交代你屋企人！
加油～

其實我同你都差唔多. 我今年22歲, 上個月發現有左bb, 現在剛剛2個月,
初時真係唔知點面對家人,仲想唔要個bb添呀, 但我同我男朋友最後都
鼓起勇氣同屋企人講左, 屋企人知道左之後, 唔係鬧我地做咩搞出人命,
而係鬧我地做咩諗埋d傻事唔要bb, 現在家人都好錫我同bb.

其實你要令你家人知道你清楚自己現在做緊d咩事, 唔會後悔, 比佢地知道你
地係成熟處理呢個事, 有哂心理準備去左daddy mummy,唔係玩玩下既, 我相信你家人
都會好支持你地既決定架. 加油!!!

先道歉，再講出黎....咁樣會令屋企人覺得妳成熟左...道歉先可令佢地無咁嬲...跟住講出妳地以後點做！

乂可以同佢地講:[我要同我男朋友結婚啦!!!!我有左佢geBB呀!!!!!!!!!]

Try to speak with your Monther first is better !!