18週5日去做結構,照到係女,心情好down呀~~

您好! 您個cast同我一樣~ 2002年我有左第一胎, 跟住結婚, 我老公呀~ 老爺呀~ 甚至我兩個叔仔都好恨好恨<仔>! 因為我老公係大仔! 係直情恨到出晒聲, 流晒口水, 當時我23歲. 我好記得連我盒結婚錄影帶入面, 都錄埋我老公話: <呢胎要仔先! 下胎先要女啦!> 當時我乜都唔識, 剩係諗住呢胎一定係仔啫! 點知第四個月去照時已經知道係<女>, 我照完後去搭地鐵, 一坐低d眼淚就流過不停, 係喊到收唔到聲! 因為太大壓力, 同埋有左d情緒係好唔同!! 當時真係好down~ 好down~ 所以我係非常之明白您! (您响度講係冇乜人明白您架!)
而家我個女差不多5歲喇, 我個肚都5個月(22週)喇! 係呀, 第二胎喇, 但我可以話比您聽, 女係真係好錫爹吔, 同埋我老公咁恨仔, 但佢錫到我個女暈晒咁呀! 我未有呢胎前, 佢都話生仔生女都冇所謂, 因為做左爸爸後, 佢明白無論仔同女都係自己骨肉, 都係錫到暈既! 而且<生女>先, 真係有個好處, 我問過好多人, 好似我個女咁, 我都覺得佢會好生性! 同好識照顧細佬(係呀! 照左係仔呀)!
唔好唔開心啦! 雖然我好明白您而家既心情, 不過要接受囉! 您既心情會直接影響到佢, 所以快d抛開d唔開心嘢喇! 佢會响個肚度鍚您呀, 郁來郁去喇! 佢始終都係一個小生命同埋係您今生第一個生出嚟既bb! 當您生佢出嚟時, 您就會feel到做媽媽既威力! 開頭可能好煩好難湊, 但一, 兩個月後佢識對住您笑, 發出聲音, 您就會覺得當初自己好傻! 而且生女可以幫佢扮靚, 買好多靚衫, 自己細過時冇得玩既Barbie都可以一齊玩, 嘻嘻! 我真係好鐘意我個女, 唔單止我, 我全家人都好錫佢架!

2007-04-19 16:30:19 補充：
祝您生個肥肥白白既金豬女, 同埋做個幸福既好媽媽! (唔好忘記比呢段心聲您老公睇呀!!!)

我支持妳

我覺得你好傻，一個生命的誕生不是容易的，而且佢代表你和你的愛人的結晶，一定要好好珍惜，bb又未生出來，你已經這麼負面，你的思想會直接影響bb的發展，我看胎教書說，如果母親懷孕時嫌棄bb的性別，bb是知道的，這會令生產過程更困難，生產時間較長和難挨，甚至有些bb會懂事到出世後，會抗拒親生媽媽，不吃親生媽媽的母乳，情願吃第二個女人的母乳，到時你就恨錯難返了。

我而家八個多月，肚裏的bb是女，我和我老公都不知幾開心，因為我們都喜歡，而且我敢肯定，老豆都一定喜歡自己的女，因為有我自己都是老豆的寶，反而我哥哥同老豆關係也不及我和老豆的關係，我老公也恨有個女對他撒嬌，做爸爸一定都鍾意有個女攬攬錫錫的，放心吧﹗你老公遲些一定會feel到女是更好的。

此外，我做媽媽都喜歡女，因為女聽話，而且會跟媽媽多些，試想想，又有多一個人站在你身邊支持你，不是很好嗎？你又可以同bb一起穿母女裝，想起也開心，你不要再胡思亂想了，安心迎接bb吧，不要有負面思想呀......

你已經好幸福啦, 你可以有BB, 我努力咗2年都冇呀!
初初我都想要仔, 但估唔到想有都禁難, 唔好話仔好定女好, 有就滿足了.....
我老公仲要係長子呀!!!!!!!!!!!
希望你好好珍惜, 幸福不是必然架!

我覺得你地將來唔會係好父母..知道係生女就禁down..駛唔駛呀..爭一個字中唔到六合彩頭獎就話姐..其實有D人想生都無得生啊.太折墮啦..珍惜嗰女啦..弟時老咗都係靠佢呢？

既然你自己都話唔係重男輕女，點解要down？
有時計劃唔一定同現實一樣! 你要識得變通~
你而家心情down，係咪想第時生個唔開心的女出黎？
你唔開心，佢都會feel到架~ 你唔可以對佢咁自私~
其實而家講咩都無用，你自己諗埋一邊既，你朋友都唔會安慰到你。
唔該你識諗d喇，都做人媽咪lo....唔好因為d咁小的事而去煩惱+down!
你唔好講埋ｄ”針唔到玉唔知痛”，而家好委屈你咩？
你都有左個bb 18週，唔通一d感覺/開心都無？ｂｂ係無錯架！
有ｂｂ係件開心事！有d人想生都生唔到....你要學識珍惜!

2007-04-21 02:35:10 補充：
而家唔係你無喇喇比人鬧，係你自己搞出黎!!
你問得人，就預左會有人講真說話! 忠言永遠都係逆耳!
而家唔係要人地明白你! 係你自己要明白! 人地明白左又點？可以改變事實咩？人地好心比意見你，你又唔鐘意....呢度d人都無罪咁! 你響度單打有咩用....改善下自己的心情喇! 唔為自己都為個bb....

點解係女你地就要咁down?你地恨仔??
我覺得你宜家已經o係心入面比左個負面印象個女喇...
咁樣會對個小朋友好唔公平....你地可能將來不知不覺咁對佢無咁好..
如果你第二胎真係仔既話, 咁對佢呢個家姐仲唔公平..
你地一定會錫個仔多d..對個女好多要求...佢好易會行差踏錯..
試下放開d想...個天俾得個女你先一定有佢既原因...
唔好咁down啦

如果你成日咁諗,不如將時間放係點樣將bb培育成為成功人士好過?
有人話媽媽係最偉大,即使係生女唔係生仔,同樣都係孕育左一個生命.
朝住呢個方向去諗,希望可以減輕你心理上面的負擔啦!

上面ge回答講得好,重男輕女時代已過,而家世界唔會再睇低女性.
因為世界好多女性已經成功過男性,即使我係男仔,我都係咁話!
冇人話過生男仔一定比生女仔好,有呢d想法ge人代表佢地仲生活係舊世界..

其實照顧bb直到佢地長大成人係好辛苦ge,但係過程完左,我諗你會覺得係好滿足
因為我覺得咁樣你會學到好多野!!所以好希望你打破傳統ge觀念!!
你先生都支持左你,你都好應該為bb做番d野啦^^例如開始為佢地將來打算..
咁樣bb出世之後就一定有好美好ge人生la~!

祝生活愉快~

算吧, 接受現實吧, 要向好的一方去想一想, 可能你個女很聰明、孝順, 就算唔係, 你都要好好養育她, 因為是你生她出來的.

仲重男輕女?
而家係香港生女好過生男,
唔好比大陸思想影響到你,
如果因為生女而去落左佢,
咁你同恐怖分子都一樣冇人性.........