Truth Table--點決定Output是1/0?睇o左成日都唔明

我估(1)果度，點樣output你都唔駛點理，因為佢只係話個function係咁就係咁，唔一定要有咩簡單既邏輯，我諗佢只係想舉例話有個咁既function收咁既input同出咁output姐，點運作唔需要知，而且可能d output係佢亂作，無需要費神去諗咁多，如你真係真係要個formula，可以真接見到output = 1就寫，0就唔寫：

Y = C'A + CB

至於(2)，其實我覺得個圖都解釋得幾清楚，唔係好知你唔明邊到

圖1你明唔明先？ abc既意思係當a = 1，b = 1，c = 1既時候，abc就會係1啦，因為((a and b) and c)嘛，a'b'c都係咁啦，當a = 0，b = 0，c = 1既時候，咁a'b'c就會係1啦，ab'c都係一樣，而b'c'既意思姐係話不論a係咩值都好，只要b = 0 同c = 0，b'c'就會等如1
至於 + 既定義姐係'or'咁解啦，例如y = a + b即係話如果a同b都係0既話，咁y就會等於0，否則y都會等如1
呢d我希望你明白左先好睇落去

圖2，其實都好易：你按著條formula黎填返落去，如abc，咁就響 1 1 1果列到為y填上1，如果係a'b'c既話，就響 0 0 1到填 1，ab'c就響 1 0 1到填1，b'c'呢就要填晒2列，因為無論a係1定0，b'c'都會output 1，所以0 0 0同1 0 0都填1，而剩下的就填0，結果就會變成第二個slide既truth table咁

圖3係kmap，呢度我唔知你唔明乜野，我略略講一下：
因為你而家有3個變數(a, b 同埋 c)，咁你就要有個table係有2既3次方咁多格，即係8格，如果你得2個變數，你就要一個2既平方 = 4咁多格既table，如果你有4個變數，你就要有2既4次方 = 16咁多格既table，明嗎？
好啦，咁你就為果8格好似佢個圖咁填ab響上面，c響左面，上面label做：00 01 11 10，即代表當(a = 0，b = 0)、(a = 0，b = 1)、(a = 1，b =1)、(a = 1，b = 0)，左邊label 0 1，即係當c = 0 同埋c = 1咁解
跟住呢，你對返之前個表，如果要睇kmap既第一格，即係ab = 00，c = 0果格，truthtable指當a = 0 b = 0 同c = 0既時候，y係等如1，咁所以你就響kmap左上格填1，然後移過右邊，第二格係ab = 01，c = 0，咁你就睇返個truth table，當a = 0，b = 1，c = 0既時候，y = 0，咁所以你就要填0啦，填kmap我唔多講啦，應該易明既

填完之後，你仲要圈返所有1出黎，但係圈d 1仔都要有規則：

首先第一，你個圈一定要係長方型或者正方型，唔可以三尖八角咁，姐係唔好整'俄羅斯方塊'果d'T'方塊、'z'方塊咁，記住，一定要係長方型、正方型咁款
第二，個圈既size一定要係2既次方數，姐係可以係1格、2格、4格、8格、16格(如果你個kmap有16格咁大既話)…，唔可以係3格、6格、7格、9格、12格等
第三，個圈可以係跨過條邊，好似佢個example咁，左邊果行可以圈到右邊個行咁
第四，個圈應該要盡量有幾大畫得幾大，以我頭先講既第一同第二既規則，你應該要畫到盡量最大既長方型或者正方型，唔好一格一格咁圈，例如個example咁111果格圈一格，101果格又圈一格，咁樣係唔好既practice，應該盡量避免，除非有一個一係零零星星咁自己單一一格(上下左右都俾0圍著)，響咁既情況下先可以圈一格
第五，d圈係可以重疊，請看圖，假設佢首先係用正方型咁圈左100、101、000、001，咁佢係咪得返一個1(111果格)丫？好多初學者會以為咁樣得返一個1既情況下一定只可用一格size既圈黎圈，但係咁係錯架，你應該要為左達到規則四，盡量畫大d既目的下，將佢隔離果格(101)都圈埋咁先o岩，但係呢你就唔可以貪心，圈埋001果格喎，因為如果你咁做你就會違反左規則2，圈左3格架啦

我諗到既規則係咁多，咁如果毫無意外既話，你應該會圈到佢example入面咁樣既圈法

終於到圖4啦，跟住到寫返d simplified results啦，簡單黎講，你之前圈左幾多個圈，你就要寫返幾多舊"野"出黎，formally我會叫呢d"野"做 conjunction，個example入面有2個圈，咁姐係話，你要寫返2個 conjunctions 出黎，咁姐係代表你既simplified results應該會係：
y = conjunction1 + conjunction2 咁既樣
如果係3個圈，咁就會係：y = conjunction1 + conjunction2 + conjunction3
明唔明呢度呢？

咁跟住，呢d conjunctions係點搵架呢？請留心喎，我驚呢度唔係解釋得好清楚，你要響個圈度，搵返有咩變數係可以變，邊d係唔可以變先得：例如圖四入面，你圈左果個正方形(100、101、000、001)，邊d可以變既呢？答案就係a同埋c，因為無論a係0定係1都好，都會被包括響呢個圈入面，c又係喎，無論c係0定係1都好，個圈都會包括埋，但係唔可以變既係b，因為你睇返100、101、000、001，b既值一直都係0，唔變得，冇轉過，咁所以b係唔可以變的，咁所以conjunction1就會係b'自己一個啦，請留意我加左 ' 號，conjunction1係b'，唔係b，原因係響呢個圈入面，b既值只可以係0，唔係1，所以就係b'，如果b響個圈入面一直keep住係1既話，咁你就可以寫b，唔係b'
希望你明白呢度啦，我覺得自己解釋得唔係好清楚

咁到第二個conjunction啦，咁今次就係另一個果個得兩格既圈，佢圈既係111 同埋101，今次有咩係有改變有咩係冇改變既呢？答案係a同c都冇變過，b就又有1又有0，所以呢conjunction2就係ac啦，

咁總括黎講，個simplified results就會係 y = b' + ac

註：響圖四果度，我覺得佢冇需要放個truthtable果度，請唔好被混淆

有樣野請你留意，響圖三果度，ab既label係00 01 11 10，唔係 00 01 10 11，明唔明點解要咁排？因為你睇返，佢每移左一格，佢都只會有一個bit改變，但係如果係00 01 10 11，當01移右去10既時候，你變兩個bits先得，而且由11右移(返去左第一個label)到00，你又要變2個bits，kmap一定要規定你每移過一個label，每次只可變一個bit，明唔明我講既野？

希望我解釋得清楚啦，有咩唔明，請再問啦

好多謝你！我在坐地鐵時，看了很多遍，終於明白了！我今個星期測驗如果出這種問題的話，我就有信心的去答了~