BT: seed的問題

>>如遇此情況﹐我應唔應該放棄等seed?

1. 如果係o岩o岩發佈o既 torrent, 好多時會出現咁o既情況, 尤其發佈者o係中國。
因為發佈者驚o的人一下載完就走, 所以就會放到 99.x% 停止, 等大部份人下載得七七八八時再放埋o個 0.x%。

2. 但如果個 torrent 係好耐之前發佈o既話, 好可能已完成o既人都唔會返o黎 reseed 的了。
o係呢種情況之下, 如果你o係得到呢個 torrent o既地方可以搵/問人幫手 reseed, 咁就搵啦, 唔搵的話, 就應該唔會有人自動 reseed。

我覺得, 等得個幾兩個星期都冇進展的話, 就可以放棄。
中間唔駛一直開住個 bt 的, 只需要間中開o黎「繼續」下, 睇下現時情況有冇進展就可以了。

>>BT係唔係會繼續找尋available seed?

唔應該用「找尋」呢個詞語, 因為 BT 得到其他 peer 資料o既方法有:
1. 經 tracker (伺服器) 取得
2. 經 DHT Network (peer) 取得
呢o的方法只係一個「取得」及「提供」o既關係, 不涉及「尋找」功能, 亦唔會將 seed 同 peer 分開睇, 因為 peer 亦有變成 seed o既時候, 所以聯絡到先至知個 peer 係唔係 seed。

BT 會自動聯繫所取得的 peer list 內的 peer, 但 peer list o既資料未必係最 update, 隨時有人走o架嘛, 所以就算 BT o既資料欄內顯示有 seed 都未必係真的。

>>當download一個.torrent file時﹐點知入面有幾多個seed? 係唔係要去Torrent info先睇到?

torrent info 只睇到有關製作時 torrent o既資料, 同有幾多 seed 冇關。
要知現時有幾多個 seed, 就要聯繫到 tracker 或 DHT Network 內o既 peer 先至知道。事實上, 正如上面所講, peer 資料係隨時變動的, 所以確實 seed o既數字係唔可以好準確咁知道。

想知有冇 seed, o係大部份 BT 軟件中, 有一欄會顯示你所連到的 peer 及 seed, 亦有一欄會顯示 availability (可得性)。
最安全的, 就係你聯繫到一個或以上o既 seed。
另外, 當可得性大過 1 或 100%, 亦表示有一個完整o既「一整份」o係出面, 咁你就有機會完整下載全部 torrent 內所列的檔案。
如果可得性細過 1 o既話, 即係你和你o既 peer 夾埋都冇「一整份」, 咁完成o既機會就唔大了。

最後, 補充少少, 以前有o的放種o既人 (seeder), 會用一個「隱藏」o既方法去發佈, 即係冇人睇到佢係有「一整份」o既人, 下載o既其他人一直只會當佢係一般 peer 看待。o係呢種情況下, 就算有 seed 存在大家都係唔會知道, 不過事實上, 大家都會一直下載到o野o既。(用呢種方法o既人已經唔多。)

想下載完整, 最好當人家發佈後冇耐就下載, 因為一耐o左, 所有 seeder 都會走晒, 最後只有剩低一堆人o係度呆等罷了。而事實上, 好多 torrent 都係經過幾手轉貼又轉貼, 實際o既發佈日期亦未必清楚, 而 torrent info 係有寫 torrent 製作日期, 所以可從中估到發佈o左耐唔耐。