✔ 最佳答案
首先講A女o既問題:
我勸你唔好同佢講件事o既真相。感情始終係兩個人o既事﹐既然B男都唔放手﹐你就無謂做醜人同A女講。B男根本唔係唔主動﹐而係唔敢承擔後果o既人。佢因為唔想做罪人﹑唔想自己內疚﹐所以等A女飛佢。況且A女根本都知依段感情係冇結果﹐只係“捱得一日得一日”。A女既然都心甘情願用時間去換回憶﹐你就由得佢啦。
陰謀論d睇... 萬一A女同B男對質﹐B男賤起上o黎... 倒轉頭話你講大話﹐A女可能會嬲你... 甚至連D男都可能因B男關係疏遠你。所以你都係當唔知﹐事不關己﹐己不勞心。
你同D男o既問題:
你唔做主動唔係因為你怕醜﹑唔夠膽(因為你以前都主動過)﹐係因為唔想重覆“對方只是因我喜歡佢才會喜歡我”。你有咁o既疑慮﹐可能係因為先前幾段你做主動o既感情都失敗左﹐所以今次你希望找到一個... 因為你而喜歡你o既人。
咁我問你﹐如果而家有個E男追求你﹐你係唔係會即刻接受佢?! 感情係雙方面﹐就算E男向你表白﹐只要你覺得唔o岩feel, 你根本唔會接受佢! 你以前d男朋友接受你﹐或者係因為“你先喜歡佢”... 但開始一段感情始終經過考慮﹐佢地都願意開始﹐已經証明你一定有某方面o既特質吸引到佢地。依d特質係你先至有﹐對方曾經係因為你而喜歡你。雖然最後冇好結果﹐但感情係冇保證﹔即使要分開﹐但你地彼此付出過﹐其他野又何須介懷?!
感情最講時機(timing)﹐如果你覺得依一刻timing到但唔去爭取﹐可能就永遠失去同佢一齊o既機會。如果D男一直都係被動﹐而你仍然執著﹐個timing就會走。你問下自己﹕“任由感情流失﹐我會否後悔呢?” 答案只要你自己心知就得喇!
講我一段從來冇向人披露過o既往事你聽...
小學五年級﹐我鍾意左一個大我一年o既同學。有一日放學﹐個男仔問我係唔係鍾意佢﹐我因為怕醜﹐居然好晦氣咁否認﹐即刻上車走人。
我一直避開佢﹐直到佢畢業後一年多﹐我o係街見到佢﹐我個心跳到就快窒息! o個刻我先知自己比想像中鍾意佢﹐但o係我猶豫間﹐佢已經走左。
到我中二時﹐有一朝o係麥記買早餐撞到升左唔同中學o既佢。佢主動過o黎同我打招呼﹐個頭仲故意同我靠得好近﹐我緊張到一句野都冇講﹐拎左個包就雞咁腳走左...
事隔十年﹐我仲好後悔... 點解o係麥記o個次咁(火羅)! 就算表白更(火羅)﹐但只要冒一次(火羅)爆o既危險﹐或者就可以同佢一齊。就算俾人拒絕﹐至少我夠膽面對自己o既感情﹐總好過十幾年來心入面都有遺憾...
個天俾左三次機會我﹐可惜當時我因為面子﹑因為懦弱﹐一次又一次失去左同佢一齊o既機會。
失去一個愛人冇錯會令人好痛﹐但冇爭取過o既感情先最令人遺憾。前車可鑑﹐唔好做d令自己後悔o既事。
