買PSP好定係NDS好呢???

1. PSP可以話係一部流動影院，NDSL就冇呢個功能喇。兩者遊戲都多，不過是遊戲風格不同，PSP著重畫面華麗，NDSL則著重遊戲性。其實兩者都有出一D女性岩玩既遊戲：PSP有太鼓、牧場物語等等；NDSL就有寵物小精靈、養狗仔等等。其實我覺得唔需要標籤左男仔就玩psp女仔就玩nds, 我覺得最緊要部機岩唔岩自己玩, 岩玩既理得佢係邊部機姐, 你話係唔係?我俾部psp女朋友玩樂克樂克同牧場物語, 佢不知玩得幾開心=]
2.
首先，希望大家可以放開懷抱對待兩部機，記住，你唔係幫老任、SONY打工，無必要對佢地死忠亦無必要敵視任何一方，作為玩家只需了解邊部機俾到自己快樂已經足夠。


【主機美觀度】PSP：10分／NDS：5分
PSP外形時尚美觀，加上第一眼就望到佢個大芒，任何人見到都一定心動；相比之下NDS外形似足一部字典機，雖然唔算好核突，但PSP予人既第一印象實在優勝太多。


【畫面華麗度】PSP：10分／NDS：6分
PSP個芒又大又16:9，NDS完全無得比。其實NDS雙螢幕有咁既大細已經唔差，但缺點係可視角度非常低，坐你隔離果個根本睇唔到你玩乜，另外響陽光底下玩NDS，基本上係完全睇唔到畫面(反光太嚴重)。不過，PSP既死／光點問題又比NDS嚴重極多，基本上要買到一部完全無死／光點既PSP，真係要非常好手氣，另外根據大多數用家經驗，PSP既死／光點會「自然、普遍地」於短時間內極速浦頭，個Q.C.真係差到......如果非常介意死／光點，可自行扣除2分。


【聲音】PSP：7分／NDS：6分
其實平時玩遊戲的話，兩部機既聲音質素都係合格有餘，最低限度叫做有立體聲，但一般而言PSP遊戲會比較「靚聲」和「大聲」。不過你打算用PSP聽MP3的話，最好考慮清楚，同樣聽MP3，同樣用喇叭出聲，筆者部NOKIA 6230i(手提電話)都比PSP靚聲。當然比起NDS總算係聊勝於無。如果追求靚聲的話，都係戴耳筒先玩啦！兩部機個喇叭都唔係咩好貨色。


【操控】PSP：3分／NDS：9分
你無睇錯，我無講錯，PSP既操控手感只可以用「垃圾」唻形容！除左部機本身無NDS咁好「渣」之外，佢個死人十字掣真係夠晒「十字」，基本上只可以順利感應到↑↓←→四個方向，一用到「斜位」就感應不良，由此衍生一個極大問題....... 如果你玩賽 車、麻將、RPG之類唔需要按「斜位」既遊戲，個操控係OK，但一玩動作、格鬥、射擊、足球等遊戲時，真係玩到無名火起！你可以想像玩高達時無法打斜走、玩格鬥時「CHOK」唔到招、玩射擊時無得打斜飛、玩Winning時無得走斜線既凄絕慘況嗎？無錯PSP另備Analog掣一粒，但果粒野既手感都唔好得去邊(位置太低)，仲要唔好忘記唔係隻隻game都支援Analog。NDS響呢方面就優勝太多，佢個十字掣其實都唔算太好按(比起GBA、GBASP而言係差左)，LR兩粒掣特別唔就手，不過點都唔會衰到「操控困難」先，基本上玩乜遊戲都無大問題，另外要盛讚佢個Touch Screen，佢可以發揮比滑鼠更加便利／直感既操控性，配合十字掣及咪高峰，可衍生出無限個具創意既遊戲。


【便攜及保養性】PSP：5分／NDS：7分
其實兩部機既體積都屬於「偏大」，筆者認為史上最佳大細既手提機仍然係GBASP，入落衫／褲袋就行得，呢兩部野拎出街時要突登搵野袋住都幾煩！不過NDS既便攜及保養性一定比PSP好，因為佢係「摺機」，基本上摺埋佢就可以放入袋，個機殼唔算太易花，但係PSP就一定要另備機套／機袋，否則行街「鄧」兩「鄧」之後個芒一定花到阿媽都唔認得，肉赤死。


【讀取時間】PSP：3-6分(視乎遊戲)／NDS：10分
大家拎得部機出街玩，多數都係為左搭車時「攝時間」吧？不過香港地咁細，你搭車搭得幾耐？通常15-30分鐘就落車／轉車，點樣響咁短時間入面盡情享受遊戲樂趣，係筆者非常重視既一點，呢方面NDS可以話係完美，由於佢係用「卡帶」作儲存媒介，一般遊戲時根本無所謂Loading Time，只係間中有遊戲阻你兩、三秒儲存遊戲進度，玩家可以將99.9%既時間放響玩遊戲方面。相比之下，PSP就顯得非常慘烈，由於佢係用一種叫「UMD」既光碟作儲存媒介，基本上遊玩中途要不斷Load Load Load LoadLoad...好多時真係LOAD多過玩！情況比家用的PlayStation更為嚴重。如果你經常坐短途車，絕對唔建議玩PSP，因為你LOAD到入標題畫面可能已經落車了！但當然每隻遊戲所須既Loading時間都有分別，不過客觀唻睇普遍都係唔理想，入game時LOAD十幾秒係平常事，每關之間再LOAD你十幾秒都係好正常，仲未計遊戲儲存進度時又額外俾多十幾秒你嘆...... 奉勸大家購買任何遊戲之前，最好先問人隻GAME既LOADING問題嚴唔嚴重，陣間買左好似WINNING咁既LOAD碟王，夠膽死LOAD你三、四十秒先開到波既真係喊都無謂。當然PSP係有「邪道」方法大幅減低讀碟時間，但呢點就唔納入討論範圍了。


【遊戲外功能】PSP：6分／NDS：3分
PSP除左用唻玩遊戲之外，仲可以睇相、睇戲、聽MP3，筆者覺得當PSP係相簿咁用係非常唔錯既選擇，因為佢個芒顯示能力真係好好(唔計死／光點的話)，而且夠晒大，用唻當相簿做DISPLAY，同睇3R相無乜分別，抵讚！但係用唻睇戲、聽MP3就有些少搵笨既感覺，先講睇戲，我諗香港地根本無幾多人會買價錢昂貴(比DVD更貴)、無中文字幕既UMD影碟吧？大部份人只會將影片存放響記憶卡上播放，遺憾既係PSP只支援MP4格式既影片，解像度仲要有限制，換言之9成9既影片響載入PSP之前，都要先用個人電腦花大量時間「轉格式」，就算你部電腦幾快都好，一般「轉格式」所需既時間都比段影片本身更長，攪一大輪先拎得出街睇，點解唔響屋企睇左佢算？至於聽MP3，上文已經提過佢既喇叭音質連手提電話都比唔上，另插耳筒音質係會好好多，但如果一心當PSP係MP3機用會唔會傻左少少？你打算將部PSP掛頸嗎？至於NDS就完全唔支援多媒體功能(其實可另購PLAYYAN增加多媒體功能，但價錢太貴絕不化算)，只係內置一個無聊既「繪圖CHATROOM」以及鬧鐘功能(呢個就幾實用)。


【遊戲創意】PSP：1分／NDS：9分
由於PSP係完全沿用十字掣、LR掣、Analog掣作為操控媒介，因此理論上PSP係絕對玩唔到「家用機都無得玩」既新類型遊戲，另因為開發「華麗遊戲」既成本太高及「邪道猖獗」等影響，願意投資為PSP開發原創作品既廠商可謂萬中無一，睇一睇PSP個GAMELIST，好多根本係PS1舊作或PS2 DownGrade移植作，毫無新意可言！相反NDS設有雙螢幕、咪高峰及Touch Screen，雖然呢一切都唔係乜野劃時代新科技(液晶體時代已有雙螢幕遊戲機、紅白機已經有咪高峰、PDA都一早用緊Touch Screen)，但呢三樣野融合後發揮既化學作用實在太大啦！只要遊戲廠商夠創意，佢就可以開發出無數個「家用機都無得玩」既遊戲，尤其NDS遊戲唔用聲光效果作賣點，開發新遊戲所投入既資金遠比PSP低，風險細，廠商亦更放心開發新類型／系列遊戲，現時NDS好多遊戲都俾到「老機迷」新鮮感，甚至好多無打機習慣既人(尤其女性)，都俾NDS既嶄新玩法所吸引，淨講「創意」同「遊戲獨佔性」，NDS和PSP根本不可同日而語。


【前境】
NDS現時全球銷量約為PSP三倍，而且走勢有逐漸「放甩」跡象，尤其老任手頭仲有一大堆「殺手級」遊戲未出(如：比卡超、撒爾達等)，相反PSP則接近「江郎才盡」，不斷靠「炒冷飯」吊命，響日本基本上大局已定。不過，PSP響歐洲既銷售勢頭似乎蓋過NDS，長此下去個發展可能係......NDS專玩原創／新派既日本遊戲，而PSP則專玩「炒冷飯」大作及歐美遊戲。

NDS 既遊戲性強d~
即多元化好多
你響街度見到唔只男仔, 仲有好多女仔都有玩nds
可見nds既遊戲種類好多, 有複雜既, 簡單既, rpg既, 賽車既 etc...
有些遊戲 eg mario賽車還可以利用wireless, 同時進行8人對戰
十分刺激和熱鬧

psp響呢方面就相對不夠
但它勝在畫面靚
這一點是nds所不能比的, nds既畫面較為簡單
而psp有些遊戲是移植自ps2 eg winning eleven, FF etc
這些遊戲亦十分吸引
但本人就稍嫌太少有趣的game

所以我最後也是買了ndsl
到現在也完全沒有後悔 =)
其實也需要看看你自己喜歡哪類型的遊戲囉 ~
主要作打機的話、NDSlite。
想以睇片or聽mp3為主的話、PSP。

分析:
1.不論PSP、NDSlite 現在都可以玩老蕃。
2.Game数量方面、NDS占優。趣味性方面、
　亦是 NDS占優。若只是想打　打交game　的話、
　PSP一定正過　NDS。
3.画質方面、PSP絶対占優
4.画面方面、PSP比NDSlite大得多。
　(但PSP是単液晶。NDSlite是双液晶。
　於運用方面、NDSlite的双液晶却占優!!)
5.携帯性方面、NDSlite比PSP来得軽巧。
　(NDS vs PSP的話、PSP還比較好。)
此点其実於手提機来説是重要考慮因素!!!
6.外形設計方面、PSP会比較適合成年人。
　(不過機身size方面亦比較大。)
　NDSlite本身設計是比較女性化。
　就像女仔用的化装粉盒一様。
(不過最近出左黒色ndsl、都型!!!　感覚完全o吾同。与PSP的剽悍之感不同。 NDSlite 是鋼琴黒!!!有型得来帯有高貴気質!!!)
以時装作比喩的話、黒色PSP是一件　『黒皮縷』
黒色NDSlite是一件　『黒色連身君』
7.操作方面、PSP会是全統的操作方式。
　就是左手操作移動鍵、右手操作入力/選択鍵。
　NDSlite就有点不同。主要是用軽触筆来操作。
8.音声方面、本人覚得 PSP比較好。
9.特別版方面、NDSlite主要有　FFⅢ特別版。
　其他ge 都是日本国内限量版　係香港買不到。
　PSP方面已出左　粉紅色/藍色/金色、其他
　特別版PSP亦有機会出。不過日期尚未公開。
10.若主要作為睇片聽mp3、PSP只重要上網load或
　直接買　UMD就得。
　NDSlite就要買 原装play-yan micro & sd card。
　不建議改機後再買　supercard & sd card。
　第一属犯法。第二是会令到 原装機無左保養。
　最近有R4card可以不用改機。
買R4card不属違法。但透過download game来玩
　便属犯法。
(但香港d人好像覚得玩老翻没有問題......)
11.機価方面、PSP会於年尾左右開始出平価版。
　 不過可能也要 $1300-1400。　
　　NDSlite側大約　$1000-$1250
(黒色最貴、白色最平)
13.周辺方面、PSP較少。
NDSlite就有　振動帯、 上網用o既browser、
聴mp3同睇片用o既 play-yan micro。(約$470-500)
特別是 振動帯、這是PSP無o既。。

結論:
NDSlite 同 PSP 以手提遊戯機作比較的話、
NDSlite　is good。　
若以多元化機器来講、PSP is good。
若以game的種類/趣味性来講、NDSlite is good。
若不喜歓Q版動画性質o既人設的話、建議買 PSP。
(因大部分NDSo既game的人設都是以Q版為主。)

建議不要以為　男=PSP、女=NDS/NDSlite。
這只是偏見。無論以game的遊戯性/趣味性来説、
NDSlite其実也不比PSP的遜色。相反、本人却覚得
PSP d game 大多是只以打交為主。又、PSP d game　為了増加耐玩性、一般都較為沈長。要試想一下、手提機当然是帯出街玩的。於携帯性/遊戯ge
便利性/趣味性方面、本人認為 NDSlite却比PSP来得好。　的確、若以画面/公仔的完成度来説、PSP是good。　But、不要忘記、購買動機是睇片or打機?

買NDS好D,因為NDS是新出

如果你想只係打機就買nds,因為多game D同D game細容量D,1Gb都可以放成十隻game....
如果你想睇片同打機畫面好就PSP,不過D game就大容量D,1Gb最多都係放得6隻game到...