GUNDAM SEED DESTINY FINAL PLUA

係FINAL PLUS!!!

雖然劣評如潮的 “Gundam Seed Destiny” 本該早早結尾，不過唔知係想作多點解畫定係福田本身對個結局或者某些場面唔滿意，就整咗一個所謂「新」嘅結局出嚟，叫做Final Plus。整個新結局同之前嗰個唔係爭好遠，不過有些地方自然有所補充：

1. 阿斯蘭「出征」前，同基拉、莉古絲一齊告別卡嘉蓮的一幕，插入卡嘉蓮分別主動擁抱基拉和莉古絲的鏡頭。之後…阿斯蘭主動擁抱卡嘉蓮，相信一眾「粉絲」見到這幕，應可粉碎他倆變心的傳言 (不過阿斯蘭有冇「偷食」就唔知…)

2. 唔知福田定粉絲們覺得阿斯蘭喺舊結局太少戲份，於是佢無端端突入基拉、雷同議長講數的場面中，保護基拉又唔係，射死議長又唔係，淨係攞住支槍企喺度…跟住被艦長「趕走」嗰陣都係好似舊木咁，唔明插佢入嚟做乜 (真係好似See-Saw首歌咁，「兄弟」拍住上嗎?)…不過，其他方面佢都做得幾好，例如新加佢救露娜同真的一幕顯出他的風度

3. 打完之後，例牌講和，例牌要去紀念碑前拜祭…在奧布的紀念碑前，基拉同真終於見面了。在霍克姊妹、阿斯蘭同莉古絲見證下握手而和。最後基拉邀請他「一齊戰鬥」，是表示有第3輯的可能嗎?

4. 但係鏡頭一轉，似乎好難有第3輯…莉古絲成了Plant議長，卡嘉蓮繼續領導奧布…兩大「和平」領袖終於名正言順坐正做女皇 (唔知兩位男角去咗邊? 喺屋企做家務? 定係做幕後黑手?), 除非有新的敵人，或者福田在粉絲的抗議聲中殺咗佢哋，如果唔係應該天下太平

總括而言，除了以上幾點，新的結局實在沒有太大驚喜，反而覺得如果可以加多啲鏡頭講吓其他人嘅戰後生活，或者再講多少少幾位主角的去向，可能會更有吸引力……反而有興趣傳聞中，進藤尚美同福田反面，結果最尾幾集連聲都冇，甚至新結局都冇聲出，連戲份都比人搶埋，實在令到結局失色不少 (聽講連真的配音員都同福田反面，所以基拉就喺佢手上重奪主角位置)。如果真係有第3輯，千祈唔好再搵福田做監督，同埋劇情要有突破先好，如果唔係都係作過第2個故事算啦…