開時裝舖，應注意什麼？(10點)

我早兩年同老公開過鋪頭賣女裝衫, 真係有血有淚呀!

幾錢要開鋪頭---最好預廿萬以上啦, 因為租金連兩個月按金己經用咗三分一以上o
流動現金我諗開頭要四五萬到, 因為期間要入貨, 問中要搞吓宣傳價惠, 佈置吓搞吓新花臣, 全部都要錢呀..

奉勸你一句, 千其唔好做o靚妹生意, 學上面話, 一定要做OL(25-40), 中高檔最好, 佢哋抵得使錢, 而且唔會講價講得好厲害, 你會做得開心啲(做o靚妹得個睇字, $50件背都要同你講到$20, 你會做到嘔血)

我以前喺旺角區, no way, 完全唔掂, 唔好諗九龍區喇!! 我咗間鋪之後, 我問過住港島區o既朋友, 開鋪頭o既老闆, 好多人都話做九龍區有蝕無賺, 反而港島區人均收入普遍都高過九龍區, 而且好多港島客(而又捨得消費)係唔會去九龍區買嘢, 就算買都只係揀平嘢買, 所以我勸你諗吓銅鑼灣二線商場, 或者中環某啲較旺o既樓上鋪, 都唔錯o

定價話就話定來貨價兩倍以上o者, 但係有啲左鄰右里好衰格架, 派個間碟過黎睇你賣幾錢, 然後同啲客講我哋賣得貴, 又大陸貨, 有咁衰唱到你咁衰, 所以一般都唔敢賣太高價錢啦o 至於啲客最叻係壓價, 個客唔會睇你個價錢牌寫幾多錢, 而係佢心入面諗你件貨價幾多錢, 就算你件衫賣$300, 佢一開口就可以嗌到$150, 如果你當日單都未開過, 你真係唔知賣唔賣俾佢好囉....

最好入啲特別啲o的款, 唔易撞, 入貨時問清楚個款咪俾你做獨家, 唔可以俾同場入同一款, 保障番你間鋪, 唔係一陣隔離又入咗, 到時只有鬥平, 賺得少咪抵囉.....我就寧願賣平少少, 賺少幾十, 但係去貨去得好, 寧願賣平但係補貨好過, 而且成日有新貨俾人睇, 班客仔自然成日上黎你間鋪頭尋寶!

佐敦有好多日本貨及歐洲貨, 金峰大廈(裕華對面"人和"/"公和"荳品店隔離, 同埋山崎麵包隔離幢大廈都有時裝批發; 荔枝角香港工業大廈入面好多唔同款式o既衫鞋袋批發, 但係多數係抄日本款o既香港廠家喺大陸生產o

深水埗最平, 入部大陸做, 做o靚妹市場最啱, 但係入貨量較多o

無論邊度入貨, 番到鋪頭一定要剪線頭, 因為正宗日本貨唔會批$100咁平, 多數係日本品牌喺大陸設廠先可以批咁o既價錢o大陸製就梗要加吓工喇!!

如果你做平價嘢, 去貨快, 入貨多啲無問題, 當然你要有啲潮流知識, 知道大約邊啲款最多人鐘意, o靚妹好鐘意花呢花碌, 好多patterns,但係OL著番工深色同簡約至多人鐘意,lady啲, 唔好一味自己覺得好睇就入貨, 一開始入唔同style都入少少, 到你做做吓就會開始知道班熟客口味, 到時再專門入某一類服飾最好o 中高檔時裝要貴精不貴多, 唔易撞款, 貴啲都有人捨得買(當然都要睇吓邊區啦), 一個禮拜入兩次都夠喇, 就算自己啲貨去得唔快, 都要入番幾件新貨擺喺度俾人睇吓 !!

我以前乜都賣, 結果"擇"死晒啲貨又"擇"死埋大舊錢o 所以我勸你賣衫就集中賣衫, 唔好入太多其他飾物或鞋袋, 你可以添啲攞黎襯衫, 但要搵一樣作為主力o最難做係鞋, 因為個個牌子都分唔同sizes, 就算同一個號碼唔同牌子, 個size都會有出入, 又有啲人係著半號, 所以好難適合所有女士們o既腳板o

衫褲入大啲碼, 大多數人都係中大碼, 唔好以為出街睇見好多人都好瘦, 但其實好多客都偏向多肉, 識揀啲著瘦人o既衫褲, 一定賺死你(仲要靠埋你把口啦)

反而袋我覺得較好做, 因為袋無乜點分季節, 啲客係鐘意就會買, 唔會揀三揀四, 熟客俾個八折, 生客俾個九/九五折, 真係唔錯架!!

賣乜嘢都係, 最梗要同個批發商打好關係, 等佢每逢有靚貨第一時間打俾你叫你睇, 咁你又可以賣得好價錢(批發價都平啲), 間鋪頭靚貨多生意咪好囉 !!

祝你好運

一般要幾多錢先開到舖？ 最少預舖租既8-10倍..因上期,按金..入貨..好多錢要用到,,佣呢.裝修呢..

流動現金要幾多？ 要以舖租既倍數來定..約4-6倍...真係要的,因我都自己開過!

做邊個年紀好？20-35歲有無得做？ 做25-40都OK架..佢地捨得使錢D呀.你唔好睇好似多學生妹行街..但真係無得做..得個行字..睇10字都可能買到1-2次..但OL差唔多睇啱都買..又唔會點講價..

邊區好？ 呢個..梗係旺角好啦~差極有限嘛~睇返你BUDGET哦!

點樣定價？ 係來貨既3倍以上...如返來係$80.要賣$240(最少)

多數係邊到入貨？入貨要留意咩？ 賣日韓可以係佐敦OR香公..(但個度D人唔一定批比你..好串) 你要留意唔好比佢呃呀,,佢會叫你入D OUT左既..你自己要有立場!!
如賣平野可以去東門..貴過$40唔好拎呀,佢呃你的..因通常係$30-40~可以講好多價呀..
但小心一樣野,..佢地會屈你用假錢..之後再呃你錢...

幾耐入一次貨？一個款，每個 size 要入幾多貨？入貨約1-2次(每星期)

一個款入1-2件好啦~太多好難賣..令願轉多D款~ SIZE要入大D呀..其實好多人都好肥!

以上都係我個人經驗..係真人真事,我都係上年開左間SHOP,一開始賣日本野..但發覺唔係咁多人捨得買野..轉左賣大陸野..叫做回到本咋..都冇錢EARN呀,,而家頂左一年..執了~
我係我班朋友中LOSS得最少錢一個啦~

你要諗清楚呀~祝你好運!

我只是做過時裝店的sales , 而佢既對像係ol , 我諗應該同你既性質差唔多..

一般要幾多錢先開到舖？ << 十萬以上啦 , 因為鋪租都幾萬 , 加埋燈油水電 , 衣物來貨 , 衣架 , 店內的服裝修..

流動現金要幾多？ << 我因為係做日本fashion , 所以我老細要幾萬 , 因為佢要飛去日本

做邊個年紀好？20-35歲有無得做？ << 做ol , 會好點..

邊區好？ <<基本上睇下你既對像同埋你d衫既價錢...

點樣定價？ << 呢個要計返你既鋪租同埋水電來計...

多數係邊到入貨？入貨要留意咩？ <<香港既話 , 深水po就已經有了...可以返東門買都得.

幾耐入一次貨？一個款，每個 size 要入幾多貨? <<唔定 , 一個月1~4次都可以..

其實都係睇下你開既店性質地是什麼....平既 , 當然每個sizes都入哂啦..



P,s 我講講我之前返工係點 , 俾你參考一下

首先我老板娘租左一個地方 , 細細地都唔係好大 , 都要7萬蚊一個月

跟著佢就裝埋修 , 佈置到好靚 , 跟著就係日本訂左2大箱衫返黎

每一款衫都只係得2~3件 , 因為我係sale ol , 同佢講出街唔會同人地撞衫..

而佢d衫都係200~300蚊一件 , 褲就500~700咁na...

通常佢一個月入一次貨 . 生意都幾好....因為係做熟客生意 , 服裝要好好...


希望可以幫到你