做會計師一問, 唔該~(20分)

1994年，當我由中三升讀中四既時候，已立下志願要成為一個會計師。當時以為做會計師一定要揀會計學原理(PA)，於是就毫不猶豫地揀左商科。
1996年會考，我好彩地有15分，但由於原校升中六冇PA揀，於是囉住成績通知書去左一間有開高考PA既 band 5學校，結果收左我。
1998年高考，我冇會考咁好彩，高考只得兩個D (經濟科同PA) 同兩個 E (中文同 use of eng)。商科生咁既高考成績係入唔到大學！當時眼見隔離理科好多人成績差過我好多(四個E)，不但入到大學，仲要入港大同中大(因為理科某些大學主修科收生要求低，例如純物理、純數學)，當時心入面真係十萬個後悔：點解當初唔揀理科？但事到如今，唯有自修考到次高考，希望再搏一搏！1999年高考，雖然中文、use of English同經濟科成績都同98年差不多，但科會計竟然A左！順理成章地，我入了浸大，主修會計。
入到大學讀會計，大部分人都想一畢業就入到四大會計師行做核數(即羅兵咸、畢馬威、安永、德勤)。點解？因為四大人工高(四大做幾年，人工有三萬)，最重要係：四大俾員工好多有關考專業會計師考試的支持 [例如：唔駛錢上堂、唔駛錢考試、有薪假(唔扣年假喎)讀書]。所以會計系畢業生差不多個個都爭崩頭入四大做核數。
但要入四大核數，要過五關斬六將，英文面試起碼要過三關 (即人力資源部經理、核數部經理、合伙人)。由於我英文不太好，所以高考會計科囉A都入唔到四大。當時又有十萬個後悔：點解當初唔練好英文？但事到如今，唯有搵間公司仔做會計，一邊自己報讀ACCA課程考會計師牌。
2002年大學畢業，我在一家印刷廠當會計。2003年沙士，我到了間五星酒店做會計，諗住雖然入唔到四大，入到間大酒店都唔錯卦。酒店做會計很穩定，但冇乜前途同錢途。做了兩年，冇得升職，人工由1萬加到10460。同期入四大做核數的大學同學，已由10000跳到2萬8千。我眼見有個酒店同事，做了10年，人工都是1萬5千。我決心放棄會計，轉做稅務顧問。
於是我又再次應徵四大，今次申請稅務部。但由於我未考到會計師牌，四大又冇理我，唯有到本地比較細規模會計師行做住稅務顧問先。2005年，我到了本地一間中型會計師行做稅務，一邊繼續考埋個牌。ACCA最難之處，係最後三份卷(core paper)要一次過合格，否則要三份再考過。我考了第三次core paper，2006年8月終於考晒。同年11月，入到四大做稅務顧問。
2007年3月，我透過ACCA會籍入會香港會計師公會，，正式成為香港專業會計師。由1994年到現在，我的夢想用了十三年才達成。我講咁多野，無非只是想講：在香港做會計師，不一定要揀PA。只要你入到大學、英文好，就好容易！

商科係基本知識,
但我也見過很多讀完理科的去考會計師,
最緊要係讀得上,
做會計師當然英文要好,
除非有一天香港只接受中文報告。

僧計師不是選商科,而是理科。做會計師要讀好數學同埋附加數,再讀埋p-maths。