想搵人比意見我

妹妹仔, 你今年幾大先? 我睇完你既自述, 就十分之唔同意你既觀點啦! 你又唔係去到中年先係度嘆惜, 我諗你都係未過廿歲之嘛, 老生常談既一句就係天生我材必有用, 雖然你係聽唔入耳, 但呢個係真理. 你話自己好黑仔, 好似係投錯胎, 腳頭唔好, 帶俾身邊人好多麻煩, 甚至係俾人鬧係陀衰家, 但你又唔係特登咁做, 就算眾人唾棄你, 但起碼仲有家人支持丫, 或者佢地平時係鬧得你最勁既人, 但當你真係出事時, 佢地無理由企埋一邊睇熱鬧.
我睇過一本書叫做成功之鑰既書, 作者(拿破崙 希爾)話過每個人可以完全控制掌握既野, 就只有自己既思想. 如果你唔係諗正面野, 就係諗消極野, 當你去做一件事之前, 或者係受過往經驗影響, 成日都諗住呢次又唔知做唔做到/又唔知錯係邊度俾人鬧, 往往都俾你"心想事成"個喎, 你諗返係咪咁既情形先? 有時越係小心謹慎, 俾自己越大壓力, 反而得到反效果, 就係大事做不來, 小事做不成, 自我形象何止低落, 甚至係好似你而家咁想自殺添, 但呢d都唔係你想架嘛!
你覺得自己比不上同學, 比不上家姐, 但有冇人阻止你去學一門手勢, 一門專長先? 你覺得自己讀書唔叻, 你覺得自己資質差, 學野慢, 但如果你有心想學既話, 咁咪將勤補拙囉, 人地練一, 兩次就得, 你咪練十次囉, 目的就係要學識之嘛! 或者你既專長唔係讀書, 咁咪讀一d著重技能既課程囉, 我九年前中七畢業, 搵工時先發現以前學既野幫助不大, 甚至係無用既, 要由頭學過添! 至於外表既野係天生既, 若你想改變, 簡單既咪做facial, 學化妝, 有錢既咪去整容囉, 總好過你坐係度自怨自艾, 怨天尤人都係無補於事, 唔會話因為你坐係度嗌三聲就有神仙出現幫你, 上天只會幫自助的人, 你連自己都唔幫自己, 又有邊個會留意你呢, 想幫都幫唔到啦!
雖然你覺得自己係一件廢物, 但你其實都要感恩, 因為:
1. 你每朝仲可以起到身, 但有更多既人訓左係醫院, 連床都落唔到;
2. 你可以返學, 但係中國山區同其他第三世界國家既兒童, 連學都無得返;
3. 你可以安然坐係屋企上網, 已經比係伊拉克, 以色列, 車臣呢d戰亂地區既人幸運, 因為佢地諗既係自身安危, 今餐有得食, 但唔知下一餐仲有冇命食

如果你悶既話, 可以去圖書館睇書, 揀一d成功人物既故仔黎睇, 又或者係導人向正面思想既書, 改變唔會係一朝一夕既事, 但可以改善你自卑既心理. 正所謂:
思想影響行為, 行為形成習慣, 習慣變成性格, 性格決定命運, 你既命運就決定係你既手上呀, 傻妹

你真係太悲觀喇, 我都曾經經歷過低潮, 低潮時好容易冧到死, 但最後都係靠自己爬番起身. 退一步海闊天空, 你要放開D, 只有當你願意俾正面思想進入你個腦時, 你先可以慢慢減低自己嘅負面意識, 否則, 無論人地同你講咩都無用, 因為根本入唔到你個腦, 始終最幫到自己嘅人就係自己. 因為你太悲觀, 睇野太灰, 所以你對所有野都覺得唔好, 同埋永遠都覺得自己錯.
覺得一個人靚唔靚, 好主觀個喎, 你覺得自己唔靚o者, 唔代表其他人都覺得你唔靚, 天下咁大, 一定有人覺得你靚, 仲有,內在美比外在美更重要.
家人講野你唔明, 可能你仲細, 唔明大人講嘅話題, 又或者家人其實唔想你擔心, 所以專登唔講D野俾你聽or將D野講到你唔明. 其實一家人血脈相連, 應該唔會有隔夜仇, 但好多時屋企人都好鍾意互踩, 互相窒下對方, 其實都可以睇成係一種情趣, 我相信你D家人心裡面都好o錫你.
有D人雖然殘廢,但人廢志不廢,你都應該要攞番D志氣出來,有志氣嘅人先會識得努力, 你唔係要同人比, 而係要同自己比, 今日嘅自己叻過尋日, 自己已經會好開心, 仲會俾到自己動力繼續向上, 人地有專長你無, 咪去學囉, 人地嘅專長唔係天生gar, 都要努力學番來gar.
你死咗, 無人會開心, 唔識你嘅人只會當多咗單新聞, 識你嘅朋友咪會覺得可惜囉, 最傷心嘅都應該係你屋企人, 其實如果你仲有孝心and責任感, 應該冧下點樣孝順父母同埋將來點樣可以令父母安享晚年, 畢竟都係佢地養大你, 你應該回報番佢地, 唔好成日冧住死喇.

互相比較從來都係人類痛苦既開始.
每個人都係獨立個體,一旦將佢地同另一個人夾硬連埋,痛苦就會出現.基於呢個原因,找尋自我價值既第一步就係重視自己.唔好諗住自己比唔起人,而係諗住根本無比較既必要.咁對一個人既存在性重整黎講係好重要.
做完第一步,而家起就要不斷搵自己既優點出黎.你話d同學都有專長,自己就冇,咁咪去學哩!人地d專長都唔係一出世就有架!你同佢地既條件一樣,肯俾心機既,學起上黎唔會輸俾佢地個喎!!失敗係人都遇過,正視失敗就係成功既開始.我見你而家都開始步向成功啦!只要肯多d嘗試,肯定自己,話自己一定做得到,咁就一定冇野係做唔到既!!加油!!

這只是個人ga想法
或係一些巧合
或係你自己ga不小心
個樣係天著定
而你可以改變其外型
好似街上d人綿.......................
而你只要凡事小心一d就得
邊有小朋友係唔會整爛野

唔好咁唸.......
如果你一直只係搵自己既缺點出黎.........
又只係搵其他人既優點...........
咁你就永遠會覺得自己無用同廢.............
相反.........你如果嘗試發掘自己優點..............
學習別人既優點...........
咁你發現自己係一個好有用既人.............

與其唸別人有幾好幾幸運............
不如唸下好多人都悲慘過你............
幾多人無屋住訓街.......病到死仲有成家人要養........
睇下非洲既小朋友???

遠水不能救近火............
試下搵下d社工幫下你..........
佢地可以幫你搵番自己..............

有無聽過半杯水既故事???
如果你見到一個杯..............
裏面係有一半既水.................
你話.......將佢睇成"仲有半杯"開心d??定係"只剩半杯"開心d???