✔ 最佳答案
我自己的經驗：
演唱會：
主要看是什麼場地．一次去九龍灣HITEC，全企位，Band是Gothic Rock，全部人熱情高漲，我在人群中間只聞到臭汗味及呼叫聲，聽得不太清楚．我想企前一點，空氣會清新一點，聽得會清楚一點，但是全企位很迫，如果是女仔的話俾人索油亦只能啞忍．
一次去會展聽關淑怡．那是一個垃圾場，因為場館斜度不夠，我劃到的位是中後段，全坐位，前面位大叔又高，我坐著基本上看不到關淑怡；很多人按捺不住企左起身．企左起身後面位更加唔駛睇，唯有企上張摺椅上．．．於是中後段企位全部人都企晒上張摺椅上．．．真係情願佢唔劃位全企位算．．．
去紅館，係人都知第十行倒最好，岩岩睇晒個台又夠近，但係其實好嘈．
總結以上經驗，聽演唱會都係前排比較穩陣．
電影：
現在ｄ戲院多是迷你戲院，所以我既定律係：首要越後越好，因為而家有ｄ迷你戲院真係估佢唔到咁迷你，最後其實都唔係好遠．次要就要盡量中間位，因為打側位中距位置已經會睇得好辛苦下．如果只剩前排我係唔會入場．
電影一定要睇全屏，否則情願睇DVD算數．
舞台劇：
睇你想睇咩同埋套劇既類型．如果套劇比較多個人表演機會，你又想睇演員演技／舞姿，甚至乎你只想睇焦媛ｄ肉，咁緊係越前越好，因為你除左可以睇得比較清楚外，最重要係聽都會聽得比較清楚．
如果你想睇華麗佈景，又或套劇比較多群戲同大型歌舞表演，咁中距會比較好，因為聲音同睇到個別演員演出已經係次要考慮因素，反而睇到成個舞台先係最重要．
希望以上意見幫到你．
2007-02-24 10:19:30 補充：
其實四面台並不是演唱會的最佳演出地方．Tokyo Dome由於是一個職棒球場，所以當初設計時為了觀眾的視覺享受而設計成三面台，但亦造就了它成為一個絕佳的演唱會場所．其實四面台設計主要應用在體育場館，因為大部份體育運動從那一個角度看分別都不大，而紅館當初也是按體育運動的需求而設計的．如果當初知道紅館主要係用來開演唱會，便應該設計成三面台．四面台如果係睇草蜢之類就無乜所謂，因為佢地一定盡量排到你至少見到其中一個；但係睇個人演唱會就真係好睇你彩數，因為歌手好難真正兼顧晒四面．其實主辦單位如果有良心應該封一面台，但係良心唔值錢；所以我其實好憎四面台既紅館．
2007-02-24 10:27:03 補充：
附帶一提：職棒球場通常係三面台因為其中一面係球來方向要裝防護網，會影響視野．
