HR ge問題?求助....

如果唔係見一D Senior嘅post，而佢又冇話要有相關經驗先請嘅，咁通常都唔會問乜嘢專業問題，唔使太擔心．
通常見工都離唔開，自我介紹，自我評價（自己覺得自己嘅長處同弱點），希望將來點發展（唔好太天馬行空，話五年內要做經理），佢點解要請你，你點解想做呢份工．．．
大概係呢D，你最好準備兩文三語嘅標準答案，答案唔好太浮誇，太假，例如唔好話”素抑　貴公司財力雄厚，聲名顯赫．．．”，太假啦，因為你apply嘅時候都唔知佢係乜嘢公司．但係”隱惡揚善”，”避重就輕”就有必要．
人地問你嘅問題，如果真係唔識，就話唔係好清楚，平時冇留意到，以後會多D留意，千祈唔好死掙，人地問得你就一定識，唔識又死掙一定穿崩，亦會俾人唔好嘅印象．
另外，你要注意人地問你問題嘅時候，唔好掛住望手指（或者搣手指），或者”蛇頭鼠眼”閃閃縮縮，要同人有eye contact，要表現得活力D，陽光D，人地會好注意觀察你嘅小動作架．另外，要注意衣著，要莊重得體，男嘅要著恤衫（唔好著短袖）西褲皮鞋（可以打呔，但唔一定要成套西裝，睇下間公司係乜嘢規模啦，著深色襪），女嘅著恤衫西裙（唔好著背心迷你裙，記住著絲襪）．
大概係咁啦，希望幫到你．