小組討論題目:有人認為有吃有喝有玩樂就是幸福的生活

我就當係一個題目, 來睇睇我自己既睇法啦
的確人人都有不同既指標
而且唔同年齡, 性別, 同埋性格都有不同既定義

簡單來講, 你不同時期係會不同既定義
好似你bb仔既時候, 你當然覺得係有爸爸媽媽抱抱
同你玩玩就係幸福
有吃有喝有玩樂, 佢地就會覺得其實係必然
我地就唔講咁細個...一講就講到十幾廿歲, 我估就好似你呢個年齡咁
你地可以覺得有得玩有得食就開心, 原因係你地唔想讀書...因為辛苦
當然有d 人鐘意讀書啦, 但係就因為有得玩有得食就係無壓力, 當然想啦,
但係係唔係代表幸福呢?
你想像下, 如果你日日都係玩, 日日都係食...你會唔會有幸福既感覺?
對我來說, 係唔會...我會覺得做到有意義既事, 就好似做義工,呢d就會覺得幸福
其實個個人不同, 你只要諗諗你只有食同埋玩, 係唔係幸福
我作比喻, 你既屋企人係唔係你既幸福? 你既學習成績理想又係唔係令你幸福?

好了, 到左廿幾歲, 即係我...我而家就覺得有個幸福家庭就幸福
我指既係我自己建立既家庭..有個好老公, 有個好兒子...有無得玩我唔在意
實在, 我都有幾年無真正玩過, 只係o係度讀書...做野....希望大學畢業搵多d 錢
快d有錢有自己既家~我就已經覺得幸福
好啦, 到左中年, 可能係兒子成材就係幸福, 我未到呢個時候我唔知,
但係一定唔係吃同玩lor...

講完年齡...就講性別...
男女大不同, 我覺得都講得唔錯
作為一個女人, 就係有一個美好既家庭就係幸福...就似我
作為一個男人, 覺得名成利就, 有個好太太...又有個好兒子就係幸福
相信女人看家比男人重要, 男人看事業就比較重要
因此, 好可能佢地對於幸福既定義都不同

講到性格, 有d人係和平主義, 覺得幫到人就係幸福, 於是成日做義工...就覺得幸福
又有d 人係思想型, 覺得發明到一件野就係幸福..可以名流青史...
又有d 人可能係事業型, 可能覺得自己做到一個成功既作家就係幸福...
的確人人都不同

食同玩, 有d人覺得係幸福
係因為做人無壓力...佢地覺得想點就點
但係係唔係真係想點就點呢...?身邊有好多事...都會比到壓力你
你媽媽比壓力你, 話你不思長進
你太太比壓力你, 話你無成就
你仔仔比壓力你, 話大個左唔想學你
呢d係唔係壓力呢?!
有吃有喝有玩樂其實不難做到...可能你同我已經可以
我地hk人不愁無得食...睇你想食咩姐...
我地hk人大把野玩, 睇你想玩咩姐
咁, 你覺唔覺得自己好幸福?你又可唔可以講因此而幸福?
我就唔覺得了....因為幸福不只要咁簡單

** 第一,你的題目已經有問題,會考係唔會有呢個題目既

以你呢個題材,會考既題目例子會如下

1) 有人認為有吃有喝有玩樂就是幸福的生活,談談你的看法

2) 你同意有吃有喝有玩樂就是幸福的生活嗎?


做呢類討論理解題目是好重要的。

1) 如果題目只係『談談你的看法』『有何利弊』,
你就一定唔好有立場(即係,我反對,我贊成),
否則就算你的point有幾好,你都係得等級一。

做呢類問題,你應該從多方面去討論。 好壞都要講。

2) 如果題目係問你『是否贊成,同意』,你就一定要貫徹始終,
一開始係贊成,就唔好冇啦啦轉反對,
或者你可以一開始就話你係部份贊成or反對。 ← 呢個係羅分關鍵,不過平時要好好練習

想o係討論羅高分,首先最重要係 ***態度良好*** ,
因為考評局講明,態度唔好者,一律等級一。
同埋你要留意人地講既point,一發現有缺好就要打沈佢。

--------------------------------------------------------------------------------------

如果你要多d point 既話, 你可以從社會,家庭各方面落手。

例如就住你呢個題目,有吃有喝有玩樂就是幸福的生活,
第一你就要討論究竟咩野係『幸福』,係唔係有吃有喝有玩樂,
就算有家庭糾紛都算係幸福的生活呢?

盡量將問題提到去社會大眾的層面 ←← 當然你要好小心,唔係就會離題。

一定要講得大聲,考評局都講明,只要你講野既聲線夠大,
你已經有等級二，即係合格。 所以要合格好易,但要高分就好難。

希望幫到你~~ =]

我覺得支持自己既立場時 先要介定咩係幸福既生活

你個point 我覺得比較中立 ....係缺少左立場 如果冇立場好難討論架
分分鐘比marker扣分 你應該諗清楚個立場
再用你中文堂所學過既設例 事例 語例 對比論証 等支持你個立場

我所諗到既 point
贊成
生命短短幾十年 最重要就是過得快樂 簡單就是一種快樂
有吃有喝有玩樂就是一個幸福的生活
相反 太過追求名利、權位、金錢的生活 分分鐘可能令自己得不償失
俗語話「知足常樂」 有吃有喝有玩樂 還求甚麼?

反對
有吃有喝有玩樂只係取得短暫既滿足...這不是真正的幸福
在心靈上的你可能還充滿著空虛、孤獨，
真正的幸福生活是一個又充實又有意義的生活。從幫助別人、達到自己的目標，不停奮勇向前走，令自己的人生不斷添上色彩，這才是幸福的生活。

此及本人的個人意見 如果覺得不合適 請指出改善地方

「小組討論題目:有人認為有吃有喝有玩樂就是幸福的生活」
題目明明白白寫著「有人」，就是「有一些人、某部份人、某些人…」，就代表不是「所有人、全部的人、all…」。
知道我的意思了嗎？！
那些個「有人」可能就如你認為的一樣，每個人的感覺不一樣，需求也不同，這是很主觀的感受，俗語說：「一樣米飼百樣人」就是如此意思。