✔ 最佳答案
你坐11:30船，去到出得碼頭都成1:00咯．
你先響碼頭旅遊局既information center攞返本visitor passport，裡面有好多discount coupon，有機會用得著．
然後去食個簡單lunch，因為唔知你住邊間酒店，所以唔知教你去邊度食好（你可以補充問題，我再補充回覆都得既），不過，因為你下晝要去氹仔，氹仔又好多垃雜野食，你中午求其食D野囉．
以下就根據你想去既地方幫你順路咁排一下．
check in完，去得氹仔，都3:00啦，你可以去官也街莫義記買大菜糕（早排食過芒果雪糕，勁香），奇怪你冇話要食豬扒包既？不過，大來豬扒包唔食就算啦（早排食過，味道真係～唉～），你去到官也街，可以食埋沛記既cake仔（記得等出爐先買喎），去晃記買雞仔餅，肉切酥做手信，然後出番外面嗰條（唔知叫乜野街），去新好利食燕窩撻（可以順便食埋豬扒包，佢D豬扒包都OK架），如果鍾意食牛同食辣，可以去咖喱全食辣腩，嗰條街有得買莎度娜架啦，如果仲未夠飽，去官也街另外嗰邊嗰條街鴻斌記食埋牛雜，之後沿住石級行上去龍環葡韻住宅博物館，嘉模聖誕節教堂（響埋一齊），黃昏日落之後，去氹仔峰景食蟹粥．
晚上，可以去睇下音樂噴泉，或者去賭場睇下，或者去下漁人碼頭，去酒巴街飲杯野，去三元粥品（清平直街）食碗手打肉丸粥做宵夜．
第二日，食完酒店早餐（如果唔食酒店早餐，可以去雅香食早餐，之後去培正中學旁邊嗰間瑪加烈食葡撻－因為呢間響雅香附近），之後可以去東望洋山（亞洲最老既燈塔），去完可以坐纜車落返黎，響二龍喉公園出行去斜對面國父紀念館，之後去大炮台，入澳門博物館，響大三巴出口出黎，去完大三巴，準備食lunch（如果去完國父紀念已經想食野，咁可以食完lunch先去大三巴嗰邊，之後先去食其他野當下午茶既），你可以去船屋或者沙利文食lunch啦（應該唔可以食晒兩間啦），之後去義順食個炖奶當甜品（如果仲食得落，去買隻大堂炸雞既雞翼食下囉），然後行去文化會館，睇完可以去媽祖閣同埋海事博物館（響埋一齊），之後可以去下旅遊塔，西望洋山，落返黎去海灣食dinner，食完就差唔多時間啦．
我唔知禮記有乜野出名，好多人都話要去食，印象中，大部份澳門人去禮記係食解穢酒既
圖片參考：
http://hk.yimg.com/i/icon/16/19.gif
．唔知榮輝響邊同食乜出名，sorry．
唔知有冇排漏你想去既地方或者想食既野，不過你可以響我嘅回答度搵到一D相關嘅資料（我都答過類似嘅問題好幾次啦）．
2007-02-09 10:00:14 補充：
利澳酒店附近冇乜好食嘅簡單午餐．．咁只好建議你去食葡國菜，利澳正門口過馬路，響橫街行入一個街口，有間叫新口岸葡國餐廳嘅，或者利澳出門口向左轉，直行，大約十分鐘，金蓮花對面旅遊活動中心，有間好似叫樂斯嘅，可以去試下（都幾多遊客鍾意去）．
2007-02-09 10:00:31 補充：
哦～禮記雪糕！我以為禮記酒家添，係食雪糕磚同埋紅豆雪條，佢響東望洋山同大三巴之間，荷蘭園馬路上，兩邊去都唔係好就腳．．兩邊行去都要十幾二十分鐘．如果你唔介意行下路，去完國父紀念館行過去，食完雪糕先行去大三巴嗰邊（不過就唔好響大炮台開始啦，響大三巴方向入澳門博物館，上到大炮台，之後原路返落黎啦）．去氹仔就一定搭車啦，其他，就睇你自己決定啦（你攞張地圖睇下有幾遠啦），不過，巴士你未必識撘（而且好迫人），的士都幾難截，如果唔係太遠，都可以行下嘅．
