"科技發達,令生活更艱苦",你同意嗎?

要睇下你用乜嘢觀點黎睇呢件事．
以前科技冇咁發達，生活上有好多嘅好唔方便，惗下，以前就算做到皇帝咁大，夏天幾熱，最多都係叫宮女幫佢扇風，用玉黎造床可以涼D，但係都係會熱嘅，而家就算尋常百姓都可以歎冷氣．以前只可以坐轎，坐馬車，想去遠D都唔得，而家，坐汽車，坐飛機，以前只要染到傷寒，癆病，好容易就一命嗚呼，而家呢D只係小病，食下藥休息下就會好．．．科技的確為人類帶來好多享受，方便，保障．
但係響另一方面，企響自然科學嘅角度黎講，科技帶來破壞大自然嘅惡果，你開冷氣，佢開冷氣，你一個人出街揸一部車，佢一個人出街又揸一部車，你睇下D污染幾嚴重吖，仲有就係，人類為咗利用科技帶來嘅成果，不斷去開採天然資源，而開採嘅速度遠遠比形成嘅速度快太多太多啦（石油係要”嘔”數以億年先”嘔”到出黎嘅），咁將來會點，可想而知！
響人民科學嘅角度黎講，科技越發達，人類追求物質嘅慾望就變得更大，想想幾十年前嘅香港，人人都窮，人人屋企都冇電視，留聲機都好少人有，隔離嗰個陳師奶都冇，我冇都冇所謂，亞陳都係一年返足364日工，淨係大年初一休息，我都係一樣，係打工仔都係咁架啦．．．大家冇得比較，唔需要為咗追求D乜嘢物質而特別辛苦，而家唔同啦，張師奶話搬去邊度邊度嘅千呎豪宅，亞黃又話訂咗架Benz S500等返貨．．．嘩，咁我都要努力搵錢啦，唔係嘛好XX，人嘅慾望係冇止境嘅，而且會變得越黎越勢利，為咗追求一D表面嘅成功，而要犧牲好多嘢．．時間，健康，親情，愛情，友情，快樂．．．另外，功利嘅社會會令到貧者越貧，貧窮嘅人更加會生活得越黎越艱苦．