澳門老百姓對生活滿意嗎

呢個問題要分幾個層面．
而家澳門人嘅生活算係幾好（經濟上黎講），因為百業興旺（至少表面上係），全民就業（只要有心做嘢，基本上唔會搵唔到工），對比起幾年前（回歸後，賭權未開放嗰幾年），失業率高企，失業工人上街遊行，而家事實上真係幾好（表面上）．
表面上好似好好，其實內裡有好多問題，只係澳門人多年來習慣逆來順受，講得唔好聽，太多人政治冷感，意識遲鈍，只睇到表面嘅嘢－－我上個月買咗間樓，轉下手就賺咗三十萬啦，我呀仔中學都畢唔到業，之前搵極都搵唔到嘢做，而家去咗賭場做莊荷，搵成萬幾兩萬蚊，我都唔使理佢囉．．．．
個幾月前曝出黎單世紀巨貪案，其實好多澳門人都心裡有數（至少嗰D未至於意識遲鈍嘅人心裡有數），但係點解係俾香港ICAC揭發？澳門異見聲音唔多（都唔係一定係壞事，至少唔會好似香港前一兩年咁，好多人係為反對而反對，係又反對，唔係又反對，乜嘢小事都可以搞到萬人上街），就算有，都俾強勢嘅政府壓住．一般市民，只識睇自己嘅飯碗，唔理有D乜嘢唔妥，唔公平，唔合理，即使巨大嘅”利益輸送”，將澳門嘅公共資源送俾外人，最終影響自己嘅下一代，都唔會有幾多人會care．
事實上，澳門而家亦都唔係人人都好好，睇下D中小企幾難經營就知啦，人力成本上漲，來貨價上漲，租金上漲．．．利潤收縮，不如唔做．．．以後澳門就會變成一個只有賭場嘅”大公司”，唔會有其他生活㗎啦．
隱憂及暗湧－賭業可以興旺幾耐？樓市可以持續上升到乜嘢程度？中國國家嘅政策係最重要嘅關鍵，中國十億人口，真正可以負擔得起頻繁咁黎澳門賭博／消費嘅到底有幾多人，又有幾多人唔會厭倦，最重要係，如果真係用自己嘅錢黎賭嘅，不論佢幾有錢，一定會肉痛（除非長期贏多輸少－－響或然率黎計係唔可能嘅，再唔係，就係賭嘅唔係自己錢－－呢樣嘢就要睇國家政策啦），唔明點解咁多澳門人唔睇遠D，惗遠D（意識遲鈍啩）－－冬天幾時來臨，真係冇人知．．．

咁詳盡？你是澳門人嗎？