shipping

做Factory嘅shipping，應該都係安排生產出黎嘅貨物嘅出口工作．
見工通常都會問一D普通嘅問題，同埋同工作有關嘅嘢．
普通問題包括自我介紹，你自己認為自己有乜嘢優缺點，你對自己將來有乜嘢規劃，你點解惗住入呢行，點解你想入呢間公司，點解佢要請你．．．
大概都係呢D，咁你準備下應該點答（中英文內容－中文要包括廣東話同普通話）．
同工作有關嘅嘢應該係一D貨物包裝發運嘅嘢，L/C嘅原理同操作，船務文件嘅基本野．．．如果請嘅冇話要有經驗嘅，咁答唔到都唔係錯嘅，答得到梗係最好啦，有時間睇多D相關嘅資料啦．
面試前要準備好D，面試千祈唔好遲到，亦都唔好早太多到（早十至十五分鐘就OK啦，太早或者遲到都會俾人一個你冇時間觀念嘅印象），見面時衣著要莊重（唔好坦胸露背，如果見普通文員工，亦唔使著西裝／套裝，著恤衫西褲／西裙就OK啦，最緊要記得一定要著襪，男嘅唔好著白襪），同人對話唔好耷低頭望手指（或者met手指），要同人有眼神接觸，要表現得自信D，陽光D，同埋好有誠意咁（有D唔識嘅嘢就直接同人講對呢D嘢未接觸過／冇經驗／唔係太瞭解，以後會多D留意，千祈唔好死”掙”，人地問得你，一定識，你如果唔識又死掙嘅，人地一定聽得出）．
同埋如果人地問你對人工要求嘅bottom line時，唔好減咁多，減三兩百就好（減太多人地會覺得你冇自信，而且亦會乘機壓你價）．
做呢行唔難，但係講真冇乜前途，因為一來唔專業（會計呀嗰D專業D），二來又唔係公司嘅搵錢部門，部門所獲得嘅資源分配會少D，響公司嘅地位一定唔高，個人升極最多都係做department head（Manager級），一定去唔到公司嘅決策層．
工作都係安排下出貨嘅嘢，做下文件準備入單銀行收L/C錢咁囉（如果真係請你，正常會有人教你點做嘅）．
希望幫到你啦．