打野戰 still can play in HK ??

打野戰？打war game就真！香港現時當然有得玩啦。仲比以前熱鬧及多了好多人玩，就以賣槍的店舖，現時就多過以前，仲成條街都係氣槍店，成了香港出名的廣華街是也。
不過玩war game場就唔同晒囉，真是十年人事幾番身！好似以前打開的碗瑤、對面海村、海星灣、馬鞍山村、清水灣鬼屋、十四鄉、氹笏村、荃灣垃圾廠、青衣廢船廠、松仔園等，好多都成為歷史了，無得玩啦！連最好玩的調景嶺鳴遠中學，現時都已成為高樓大廈的住宅區啦！每次小弟經過調景嶺時，都會緬懷當年在廢墟中打巷戰、一步一驚心的情景，真是人生幾何？不過現時玩war game ，都是打租場的多，雖然無以前咁自由，無限火力打power到打肉搏都得，現時就無啦！不過玩租場勝在公正點，無咩爭執，就玩得幾開心。樓主有無興趣出番來玩，或者之前交過手，有時間出來吹下水，緬懷一下惜日時光，都是過癮的事。

2007-02-05 14:57:27 補充：
原來樓主是打氣動槍年代的前輩，失敬！失敬！回想當年小弟打war game的年代，是氣動槍接近淘汰的年代，所以只打了幾場氣動槍，之後就換電槍啦！當年打氣動槍，槍身又重，又要背個氣缸，行都難行；中槍又痛到暈咁濟，所以好多時都躲起來，等那個人無耐性走出來搵人，才有得射人。不過氣動槍故障率高，修槍時間多過玩，都唔係好好玩。

2007-02-05 15:05:21 補充：
不過最要命是氣動槍打不過電動槍。記得一次在魔鬼山初遇一班玩電槍人士，那時電槍尚未流行，所以不知死，敢與他們對戰，結果就是被人壓著來打。電槍射速高，出彈密，粒粒彈力度平均，打到避都避唔到，亳無還手之力。慘情！所以就即刻全線換電槍。而且電槍輕便易用，改裝容易，故障率低，又唔駛拉條喉，影相都像真好多，所以就好普及。現時玩租場的人士，連裝備及電槍都有得租，自己直情唔駛攪咁多，空身行個人就可以玩，你話幾方便啦！所以現時都是電槍的天下囉！

2007-02-05 15:17:45 補充：
不過上得山多終遇虎！太多人玩氣槍，又無管理，以前D人周山玩，都好擾民，又破壞山林，其實唔係好事。之後漁農處執緊規則，唔准在郊野公園玩氣槍，而玩開的地點好多都發展及建了屋，所以就好少街場可以玩，都是要玩租場的。在西貢坐街渡出海的島有幾個都可以玩氣槍，其中在橋咀島的海星灣就建了別墅之後就沒有位玩，此處以前都是玩氣動槍的聖地，而羊洲、白沙洲及滘西洲，現時都有人玩的街場，不知樓主所以為何處。恐龍葉就唔識啦！皆因在氣動槍年代，小弟已是晚了很多才出道。不過就識的士強、樹熊、老溫、占美佬、喪九等人，都是打氣動槍年代的人轉打電槍的，不知你識他們嗎？