有關 yahoo拍賣..大家幫手評下理

因為你冇set到底價囉~
其實你地雙方都有錯,而你係錯得多d,
(1)雖然你寫左"$130 蚊 (不是$1蚊起bid) , 有問題可在問答提出, 留 E-MAIL..謝絕議價!! "
既然你係想$130蚊賣,點解你要開售價$1蚊呢?我幫你答啦,因為你想比少d刊登費.
呢點我唔係只話你,係yahoo!拍賣好多賣家既通病.
(2)當你見到有人落左bid既時候,點解你唔話佢知唔係$1起,係$130(你可以send
email話佢知,如果佢話$130冇問題,咁你咪賣比佢,如果佢話$130就唔要喇,咁你
可以取消佢既叫價,如果你有做以上既野,你就唔會比人$6成功投得啦)

而佢,只係錯在冇睇你既拍賣內容,
未必個個人都會逐個字去睇,有d人見圖想買就bid,而且仲咁平.

佢恐嚇你好似好衰咁,佢都有唔岩,不過成件事係你唔岩先,
所以你要同佢解釋返係一場誤會,話你自己未set好個價,拍賣功能未熟悉晒.
雙方和解囉~如果佢未入錢比你,咁唔算係你呃佢,如果你收左佢$6,咁你一定
要比貨佢囉.
大家好聲好氣傾下啦,當然,如果你唔想認低威既話,咁你以後唔好再用返果
個acc賣野囉(如果你唔care個acc)

總結,認錯就可以繼續用呢個acc買賣野,最多收一個負評.
選擇唔再用呢個acc,如果你冇收過佢一毫子,你絕對冇犯法,
只係未能完成交易,佢去yahoo投訴既話,yahoo會透過系統發信
問你,你最多咪收警告信囉.就算佢老豆做警務署署長,都冇權拉你,
好小事姐,睇你要面定要信譽囉.

其實呢件事你都有唔岩
如果係$130先賣就應該set保留價係$130
雖然你已經寫明要$130先賣
但係呢個價錢只係你對物品o既介紹
呢個係一個拍賣
拍賣完結就有責任去完成交易

你未收錢都唔算係詐騙
去唔去完成交易只係個人誠信問題
你唔賣俾佢都得
不過你咁做會違反yahoo拍賣o既規則
會俾yahoo拍賣記錄違規
減15分，當減到45分就會封鎖賬號
但係yahoo都冇權要你完成交易

欺詐罪既定義:
香港法律第210章第16A條(節錄)
(1) 如任何人藉作任何欺騙(不論所作欺騙是否唯一或主要誘因)並意圖詐騙而誘使另一人作出任何作為或有任何不作為，而導致—
(a) 該另一人以外的任何人獲得利益；或
(b) 該進行誘使的人以外的任何人蒙受不利或有相當程度的可能性會蒙受不利，
則該進行誘使的人即屬犯欺詐罪，一經循公訴程序定罪，可處監禁14年。
香港法律第210章第17條(節錄)
(1) 任何人以欺騙手段(不論該欺騙手段是否唯一或主要誘因)而不誠實地取得屬於另一人的財產，意圖永久地剝奪該另一人的財產，即屬犯罪，循公訴程序定罪後，可處監禁10年。
如果你根本未收佢錢,根本唔算欺詐/詐騙,因為如果呢個交易係一個協議既話,你係交易品內容提到既野,都係協議條件,佢落得BID就即係接受左你既條件,所以佢根本無根據去報警
再者佢可能觸犯另一條罪
勒索罪香港法律第210章第23條(節錄)
(1) 任何人如為使自己或另一人獲益，或意圖使另一人遭受損失，而以恫嚇的方式作出任何不當的要求，即屬犯勒索罪；而就此而言，凡以恫嚇的方式作出要求，均屬不當，除非作出要求的人在如此要求時─
(a) 相信他有合理理由作出該項要求；及
(b) 相信使用恫嚇是加強該項要求的適當手段。
(2) 所要求的作為或不作為的性質是無關鍵性的，而不論該項恫嚇是否與作出要求的人將採取的行動有關，並無關鍵性。
(3) 任何人犯勒索罪，即屬犯罪，循公訴程序定罪後，可處監禁14年。
用6蚊,去買137張咭,我相信唔係一個合理既理由掛,而佢話佢老豆係警察要拉你既話我相信佢已經係一個恫嚇囉
一句講哂:法律上你無錯,一定同佢據理力爭

如果你個拍賣一開始就有呢一段文字︰
「twins yes card set 不散賣 超抵, 見圖, 包括: 1張夜光, 1張 3D 立體卡 ,1張幻燈卡,1張雙面閃 , 2張貼紙閃卡 , 13張閃卡, 18張簽名卡 , 100張白卡(冇REPEAT) , 不散賣--$130 蚊 (不是$1蚊起bid) , 有問題可在問答提出, 留 E-MAIL..謝絕議價!! 」
咁你就冇錯，因為你已註明係$130，不是$1蚊起bid，所以你可以同佢據理力爭，就理報埋警你都冇錯，而你亦可以搵yahoo拍賣o既管理員幫忙調停。

不過，晌度都要提醒你一下，其實如果你想以直接購買價出售你o既物品，咁除左set直接購買價為$130之外，你亦都可以將起bid價set埋做$130，咁做就一定唔會有以上誤會喇，因為個價只會有多冇少。

今次你應該唔會有事，最壞情況都只係被劣評(而我覺得就算係都可以叫管理員幫你平反)，所以你唔需要驚。不過亦記得要汲取教訓，下次唔好俾誤會既機會出現。^^

首先，你尚未獲得任何現金。

他父親是警察也不會理會他。

不是由1元起，又點解出現6元完成交易呢？

賣方也有權終止拍賣吧？

本人認為不需理會他。

你有直購價, 咁點解佢可以用6蚊BID到呢? 有誤會囉?!
係咪你有D設定錯左? 我都係賣家, 所以大致上都識用拍賣既功能~
我唸你目前可以有2個做法~
1係認衰仔, 同佢SAY SORRY,話佢知你個價錢整錯左, 要用130蚊先出到貨, 然後記得整番好個拍賣價, 試下同佢和解, 不過可能會[做壞招牌]又比人負評你~
1係你就6蚊賣比佢, 當自己買個教訓, 以後拍賣醒目D囉~