有無人可以詳細講下自己ge親身經歴(生BB)

我係政府醫院生既,
大概情況係咁啦:

穿羊水後(大約傍晚6點到)
就唔唔準落床,
姑娘就用儀器圍係我個肚度,
(好似量血壓塊布咁上下, 但圍肚既)
用黎check住bb有無咩危險既.
我只可以訓係張床到呆等.

到有陣痛(大約夜晚8點半),
開始時就小小痛,
好似輕微m痛咁,
之後就愈黎愈痛.
(夜晚10點到,就好痛)
之後就同姑娘講好痛,
佢就拎左部吸(唔知咩氣體)既機,
吸完d氣體個人會暈暈地一陣,
咁就無咁痛.

到後期(約11點到)
我連吸(氣)都唔得,
都係痛到死,
我就開始問姑娘開度數未,
姑娘話一度都未開,
我果刻肚又痛, 心又痛,
姑娘就話我咁快痛到咁,
不如做無痛分娩,
我死都唔肯,
因為我之前聽過,
雖然係會唔痛,
同無副作用,
但多數做無痛分娩後,
尾龍骨同頸好易會酸痛同唔舒服,
(其實同副作用無分別,
只係無醫學根據,
所以話唔關無痛分娩事)

咁姑娘就話一係俾止痛藥我,
一係打止痛針,
但打針既話,
如果未夠4個鐘bb就出世,
咁就要幫bb打解針,
同埋最多只可以打兩次,
4個鐘打一次,
我唔想bb一出世就打針,
咁我咪選擇食藥囉.
(但食藥無打針咁止痛)

呢段時間內,
姑娘每個鐘check一次我子宮頸開度數未

到12點左右,
我感覺到種痛楚好唔同,
就大叫姑娘,
姑娘一check就話,
開左兩度啦,
叫我可以打俾我老公,
(因為佢一早已決定會陪產)
不過姑娘話叫佢唔洗咁急,
因為唔會咁快生得,
話叫我老公過多個半鐘先出門口都唔遲,
(我屋企到醫院十分鐘到)

好彩我老公心急,
早左黎,
佢黎到大約凌晨1點3啦,
我已經痛不欲生,
根住我老公陪住我,
到1點10到,
我痛到好辛苦,
感覺到bb要出黎咁,
我痛到講野都無力,
係咁細聲同我老公講,
叫佢叫姑娘.

姑娘一入黎check就話我生得,
我話好痛,bb要出黎,
姑娘就叫我忍一陣,
唔好大力, 輕輕咁呼吸,
到佢地唔知做完一輪咩準備,
(我痛到唔知佢地做緊咩,
只係一路大叫好痛)

佢地做好準備就叫我深呼吸,
用力推, (好似大便咁用力就得)
試左好幾次,
我終於推左個半頭仔出黎,
姑娘叫我唔好停,
但我因為唔夠力,
都停左一下,
搞到夾左bb個頭一下,
(搞到佢出世時,
個頭骨有個夾過既圓形,
但無野既, 過一兩個星期就無事
會圓返既)
跟住我推完成個頭仔出黎,
停一下, 好輕易就推到個身仔,
而醫生亦有幫手拉出黎.

好快,
我真係算好好彩,
我bb凌晨兩點九就出左世,
即係由開度數至生完,
都只係3個鐘,
好幸運!

其實你係咪準媽媽?
唔洗驚既, 雖然生仔真係十級痛,
果鐘痛不欲生既感覺真係好難受,
但當你辛苦完果十個鐘到,
你見到bb係你面前,
醫生抱bb俾你果刻,
你已經會忘記痛楚,
由心咁甜出黎.

係呀~提下你丫,
我唔知係咪真,
但我覺得係.
預產期前一個月開始,
多d行下, 走動下,
雖然個肚咁大好辛苦,
但唔好成日坐同訓,
行多d, 咁開度數會開得快d
同埋會易生d架~

我果陣時都係咁行.
落屋企樓下附近,
行半個鐘到,
累就搵地方坐陣,
坐一輪又行多陣,
日日行返一兩個鐘,
直到去醫院果日既日頭,
都仲有行,
我家婆話係因為我肯行,
至咁生得咁快喎~
你都不防試下,
反正又無害既,
就算唔關事,
咪當做多d運動囉~

而且,你生完記得唔好落街,
真係不出家門一個月就最好,
因為會吹到外面d風, (就算夏天都會有架)
唔好唔信呢d,
有時真係古人有古人既道理架!
最好用彊水涼沖, 同唔洗頭,
就算忍唔到一個月,都忍返一個禮拜,
之後都要用彊水洗頭至一個月呀~
仲要好好咁補身呀~

祝你生個健健康康既bb啦~

hum.....我記得就係咁o既~

我夜晚差唔多想訓o既時候,突然間感覺到下面有d野想湧出o黎,於是我一起身就急急腳去廁所,一坐低就"咋"一聲.......好多水流出o黎,咁我就知穿咗羊水......之後我老公就陪我去醫院,o個時已經係夜晚11點幾~

跟住姑娘同我講,您開得2度咋woo,未有咁快生得,叫您先生返屋企先啦~ 於是我老公就返屋企訓覺先~ o個時其實都唔算好痛......好似o黎m o個種痛咁啦~

跟住我成晚都訓唔著....我就o係醫院o既產房入面行o黎行去,到咗3點鐘到,個肚已經痛到唔想行~ 咁我就唯有走返上張床度訓,但跟本就訓唔著,因為真係好痛好痛...但我沒有食過任何止痛藥同吸氣.....我淨係識o係張床度嗌好痛,我記得仲比姑娘閙我唔好咁嘈.....個個都係咁ga啦~ 我痛到都唔記得係幾點,我成日都問姑娘開到幾多度?? 生得未?? 但次次佢都同我講, 開咗幾度咋, 有排都未得.....

我見到我老公o黎到睇我,應該都係朝早.....但我當時淨係知道痛到邊個都差d唔認得,連食野,飲水....乜都無晒心機........佢走o既時候我記得姑娘話開咗5度.....天呀~ 咁咪即係咁多個鐘開得3度??

當時我記得產房好多人就生得,而我又已經o係待產房咁耐,所以姑娘就推咗我去真係就o黎生得o既產房度等生.........我諗當時應該大約6點鐘到.........我痛到眼淚都流乾晒,而姑娘同醫生都見我咁辛苦,就叫咗我老公換咗件類似手術袍o既衫入去陪我,我當時有聞過氣,但d氣聞得多會好暈同埋無晒力,但我就覺得止唔到痛........我老公係咁叫我聞,其實我當時都知佢幫唔到我d咩,但我諗佢眼見我咁辛苦,佢個心都好痛.........

醫生同姑娘入晒o黎我度睇我,我聽到姑娘同醫生講我個名,同埋依家仲係開得7度...咁醫生就同我檢查,之後講話亞b個頭仲未向下,同埋我已經痛咗成20個鐘都有,所以決定同我開刀,問我願唔願意.......願意就叫我老公簽過名先做得手術..............我梗係願意啦,問題o黎ga? 痛到咁仲未生得,唔通仲等呀?? 亞b就係開刀拎出o黎勒~ 但佢個頭....好搞笑,尖咗好多,事關我痛o既時候成日用力想迫佢出o黎,所以搞到佢咁~ 但醫生話好快會無野,叫我多d輕輕力掃下佢個頭就得~

依家仲算靚仔晒....同埋都好大個lu(今年8歲勒)~ 而我下年7月又係另一個小生命出生呢~

祝您都有個健康,活潑o既baby啦~