玩Wargame想問一開始要點

我的朋友有一句名句：唔駛急慢慢黎，至緊要快。呢句咁唔合邏緝的說話，其實都可以用係第一次玩野戰的朋友上用得著。慢慢黎０既意思係，要由最初階段開始，先慢慢玩到中級或專業級。最簡單，你真係一次都冇玩的話，我唔建議你買晒裝就就去玩，因為你唔會知道自己係咪真係適合玩野戰。好多因素例如體力，耐性，甚至身體裝況都係玩過一次野戰先知。好似我有位女性朋友咁，佢不嬲都以為自己時常做運動，體力唔錯，就去玩野戰，點知佢係唔可以踎得太耐，原來有先天性耳水唔平衡。
　　未玩過的朋友係可以試下唔同場地舉辦的一天野戰活動。多數係比左幾佰蚊，包你來回旅遊巴，食飯，裝備，裝備係包括軍服，面罩，一樽ｂｂ彈，當然最重要係槍一把啦。唔同的場地價錢都唔同，有室內的，又有戶外的，通常戶外的比較多，不然點會叫「野戰」呢。記得計好人數後要留位，如果你係參加散團，即係願意同唔識的人玩－－你要注意唔識的人係指有可能有ｄ係同樣租槍的，但係都有自備裝備的，當然自備槍係靚ｄ，一定勁過你租的槍，所以第一次玩野戰散團要三思。如果夠二十至二十五人，多數場都可以提供包場服務，包場意思係同一時間同一戰區內同自己團的人玩，唔會混合埋唔同的人玩。但係包場的話要預早兩至三個星期留位，除左因為場地須要處理工作外，對自己朋友收錢的安排都有返個時限。
　　如果你玩過一兩次租槍的，覺得自己冇問題，應付得黎，咁你依然係要慢慢黎－－我意思係買裝備。學生哥未出黎做野，慢慢儲，唔駛急，野戰場門戶為你大開，儲幾年都可以。出黎做野的，人工有高低，咁可以參考以下買裝備的階段。以１為必要，數目越大就代表唔一定要：

１．合適的電槍一把　（唔買點玩呀）
２．以６００ｍ電池計，兩排　（一排如果係１７００ｍ以下一定唔夠）
３．上鏈彈閘兩個　（其實視乎你個人喜好，但係兩個係絕對建議）
４．面罩／眼罩　（安全至重要）
５．槍袋　（平靚正幾十蚊都有）
６．槍帶　（唔駛渣到手累）
７．彈樽　（方便ＲＥＬＯＡＤ）
８．有放電功能的叉電機　（放電功能會令你電池更長命）
９．軍服　（一套醒神的軍服可以增加臨場感）
１０．軍ＢＯＯＴ　（最好買高筒的，更具安全性）
１１．手套　（保護你雙手）
１２．護膝　（愛護你的菠蘿蓋）
１３．戰術背心　（當你越黎越多野時多功能戰術背心幫到你）
１４．其他．．．水袋，對講機．．．．

合適的電槍
不是所有槍款都適合第一次玩野戰的朋友買的。吾好買手槍，霰彈槍，單發狙擊槍，呢Ｄ槍吾係你必須要買，甚至有人買左都無機會用，只會愛黎欣賞。第一次買槍，最好買半自動電動部槍款例如Ｍ４系列，ＭＰ５系列，ＡＫ系列等，此等的槍最能夠係野戰場上發揮最大作用同最大的樂趣，絕對遉合初次接觸野戰活動的你。

電池
九成的日本原裝槍款都只會以６００Ｍ，８．４Ｖ（７粒１．２Ｖ）的電池大小作為設計基準，所以你須要根據個人使用量去計劃一下：玩６００電的，最好要買兩排。如果你想換大電，大部份槍都要另外加一個電袋仔先夠位放到大電，仲要記得買條細頭轉大頭電線。

上鏈彈閘
原裝槍送果個彈閘只會係睇多過用，得果幾十發，大家一定要買一至兩個適合自己槍款的鏈閘。以彈閘最小的ＭＰ５黎講，我甚至建議日後買多幾個。至於一Ｄ電閘，或彈壼，覺得有須要的話都可以試下，不過一定要向師兄師姐查詢有關吾同款吾同廠做的差別，因為拿起身一個電閘都要五六百蚊，如果壞左即係陪了夫人又折兵。

面罩／眼罩
所有野戰活動的規則都離吾開安全理由，所以安全係大前題。一個好的面罩須要透氣度高，容易清理，最好買用鏡面的，鐵網的話要留意用料是否夠堅固。價錢由９０蚊到幾蚊蚊不等，當然越貴越好，雖然貴，但同時功能同保護性會提高。例如用上雙面鏡，防霧氣，甚至可折式，好多選擇。至於眼罩，或風鏡，要留意買果陣一定要試戴。是否適合自己面型？戴上之後周圍有無空位剩？橡根是否覺得教到最短都吾夠緊？另外，買風鏡眼罩最大要考慮問題就係你選擇左“有型“，放棄左“安全“。面部暴露於戰場中，吾多吾多總有風險係射中面，當然，對方用風鏡的話都會有同樣想法，所以玩野戰如非必要都吾好射面同頭部。

槍袋／槍帶／彈樽
如果你買的槍係蝙蝠俠，咁槍袋槍帶同彈樽一定係羅賓漢。一般係槍街的舖頭都可以買晒全部，槍袋最緊要夠長擺你支炮，當然，價錢會取決於用料同多吾多袋。槍帶可以買三點式槍帶最為適合，槍帶用途係令你吾玩果陣可以掛係身上，除左可以減少體力消耗外，亦可以避免槍支放係地上有異物從槍口進入波管導致出彈故障等問題。

叉電機
基本上市面有得賣的都大同小異，唯一吾同的就係功能上分別。有的可以快充，有的可以放電，有的會自動充滿就熄機，有的散熱速度快，各式奇式。另外叉機上最好有較多的資訊，吾好剩係得一粒掣，擰去邊做左乜野都吾知，好危險！

軍服
去到呢點打後己經係可以選擇性，買或吾買。不過，一套軍服用途吾少，第一，係戶外地方進行遊戲，樹林石瀾地方最好著件迷彩軍服，有利於增加遊戲可玩性，第二，尊重返野戰精神，概然玩得野戰，一套軍服就係令自己更投入，更服從命令的象徵。

軍boot
買軍boot唔好剩係睇顏色同款式，最重要係鞋頭同鞋底。鞋頭唔一定要鋼頭，但係記得預大ｄｄ，留空間比腳址同埋對蔑，唔好太迫，登山涉水須要比腳趾有一定０既舒適度。鞋底最好係瓦底，但係要注意用料唔好太滑溜，最好係磨沙質地的。由二百幾到幾千都有。當然，第一次建議買中級的，冋ｍ字牌就唔錯喇。

手套
野戰場地多數又泥又沙，仲有粗糙０既樹枝，戴對手套就可以避免整損手。