觀塘 - 外野手日本料理 -- 一問

我啱啱禮拜六食完. 總括來講, 好過去郎田(另一間日式自助餐). 每位平十零蚊, 但上食物的速度好快, service亦好好.
不過, 我有兩件事要講明. 第一, 係你食嘢果兩個幾鐘頭內(我食頭一輪, 即係六點食到八點or八點半左右), 千祈唔好有意圖或企圖去廁所方便或洗手. 因為, 外野手係開係一幢舊式的工廠大廈; 店內並冇衛生間, 你要去就要出店舖的後門, 落一層樓, 到工廠大廈的停車場, 個洗手間就係垃圾房附近!! 果晚咁啱我食完想去洗洗手, 點知, 果個moment(八點未夠)就係垃圾車來收垃圾的時間...
第二件事係, 果一餐本來幾唔錯, 可惜個ending唔係好開心. 話說, 我約莫係星期三定四打電話去book位, 當時, 聽電話果位小姐問, 你地有冇人生日呀? 我話有一個. 咁佢生日係咪前後呢五日呀(我約星期六食, 佢的意思應該係指, 係咪星期六前後果五日生日), 我話20號, 咁係咪呀? 佢即刻話, 係呀! 咁的, 生日果位我地會free畀佢的.
當時我好開心同屋企人講呢件事, 於是大家就懷住興奮的心情等食啦. 我地去到後, 一直都好滿意d食物同服務. 食到大約七點半咁上下, 我地其實已經飽到滯, 點知有個職員拎一碟好靚的生蝦來, 一碟有成四隻, 而且, 隻隻size都粗過一個成年男人的手指公添. 佢話係牡丹蝦, 係送畀生日果位食的. 之後, 仲再送一碟壽司飯; 大約一碗飯加少少青瓜絲同蛋絲及少少明太子咁啦. 不過, 當時我地都好開心. 而且, 我仲想話找數時畀多d貼士.
點知, 到埋單時拎張單來睇, 咦, 我地五個人, 一個free的, 應該只係計四個架? 佢話, 我地從來都冇話過free架喎! 唔係喎, 我打電話來果陣, 你個職員係咁講的(我如實將當時情況重複一次). 無理由架, 我地從來都冇free過畀任何人, 亦冇話過生日會有free的, 我地只會係星期一至五free飲品. 但冇做過promote話生日果個唔使畀錢. 我當時有少少火, 礙於一家大細高高興興, 唔想衰收尾, 所以忍住唔出聲畀錢算數.
老老實實, 我發誓冇聽錯. 而且, 當時個職員係主動問我有冇人生日, 仲自己出聲話有free的, 根本我都冇問過有冇任何優惠, 因為我完全唔知. 事關我住觀塘的, 每次搭車都經過外野手, 成日見幾多人幫襯喎, 所以咪試吓囉. 之後我只有同屋企人講, 算啦, 當佢送果碟所謂的牡丹蝦係值百幾蚊囉.
其實我唔知果d係咪真的牡丹蝦, 因為我同屋企人平時只食三文魚或吞拿魚, 頂多係食甜蝦. 我地五個人當中, 冇一個食過真正或稱為牡丹蝦的刺身. 我地只好自我安慰話, 碟蝦如果係真的, 應該都值成百幾蚊卦!!
至於d食物, 我自己就推介食刺身. 我地本身唔係太好食刺身的, 所以, 除咗三文魚每人叫兩件, total即係order咗十片, 其餘都只係叫兩三件(例如甜蝦、帶子、鮑片及白鱲魚等等成十款, 不過冇吞拿魚). 而且d刺身真係幾厚切, 唔係風吹得起的貨色. 至於熟食, 水準算係平均. 天婦羅及壽司較ok, 但煲仔菜, 我地叫清湯牛肉煲及什菌煲, 牛肉煲太甜, 什菌煲太鹹. 其他食物, 視乎你人多唔多; 好似我地五個人, 每款刺身叫兩三年, 連埋十件三文魚, 結果來咗一隻滿滿的魚生船.
雖然我地有五個人, 但老人同細路佔多, 胃口唔算大, 加上, 冇乜甜品(甜品及飲品要另計錢, 店舖只有free的綠茶). 結果, 容量有限, 我地食到七點半鬆d已經好飽. 冇辦法食到烏冬、蕎麥麵及炒飯之類. 十之有六七的食物都order過, 但每款只係order一次, 冇encore, 因為真係太飽.
我唔知實情係咪搞錯咗; 我冇講大話, 亦唔係話外野手呃我, 但我覺得佢地好唔清晰. 明明係你自己話free, 雖然你冇話free乜嘢, 但係, 我係張帳單度真係搵唔到任何free的項目... 只好當係果碟牡丹蝦同果碗仔壽司飯囉!! 不過, 呢d亦係佢地係訂枱時冇話過會有的禮物, 只係拎到來時, 我地仲以為佢搞錯, 叫佢拎走. 佢個staff先話, 係我地送畀生日果位食的, 但都冇話係free的!! 當然, 佢都話送的, 無理由要收錢卦, so far我地食咁耐, 都冇一樣嘢係唔使畀錢的; 我地額外叫咗兩杯飲品, 佢都講明要收錢添.
Anyway, 以食物同服務, 佢值四分半(五分滿分), 但呢個誤會令我地好唔開心; 要倒扣, 只值兩分, 唔值得再去.

2006-11-20 16:59:38 補充：
甜品只係雪糕及雪米糍, 大路貨色, 仲要另外收錢.但佢有兩三款甜食; 芝麻丸子, 好似炸煎堆咁, 內面係栗子饀, 幾好食. 另一款好似叫豆沙煎餅(我唔記得個名); 個皮好dry, 豆沙入面夾有一小粒香蕉, 都食得過的. 仲有一款佢話係屬於沙律的紅豆涼粉. 去食呢d自助餐, 重頭戲梗係食刺身, 邊會留意d沙律喎. 何況只係d八爪魚、螺肉同罐頭什果加少少薯仔的沙律, 可以skip. 初頭冇留意, 過後見到呢款沙律, 但已經太飽食唔落.熟食都唔少, 煲仔菜、鐵板燒、炒飯及烏冬、天婦羅、壽司、芝士年糕、串燒等等, 選擇甚多; 唔計我地食量細, 其實, 食熟都好夠.

幾好呀! 佢原本係新蒲崗廣場有一間, 剛剛係今年先再係官塘開多一間分店; 佢好在係你點咩, 佢都一定會來, 唔似得有D放題咁, ORDER刺身, 叫左十碟, 臨走前先來一碟, 其他熟食就準時來; 亦會足料比你, 唔會因為放題就細細件咁;
推介--一定係刺身啦, 有好多唔同選擇; 至於熟食, 佢都有架, 有D窩物呀, 湯麵, 炸天婦羅, 鷄軟骨, 鷄翼, 當然, 都希壽司啦;
佢不時都會係飲食男女果D雜誌有廣告及優惠卷, 好似4個以上就有D海膽送; 另, 如果,有人生日, 重可以有任食甜品及飲品, 又有壽司蛋糕(電話訂位時要說明);
總之, 以咁既價錢, 我覺得好好啦!

好食..有壽司,刺身,粥,拉麵等..推介就無..不過,我個人認為有用蟹做的粥好好食。如果你生日去既話仲可以有免費雪糕同迷你糯米滋,不過要俾佢睇身分證。如果你生日果日係星期三至五,,你星期六或日去都冇問題。