直銷中心的家俬電器買唔買得過

如果搵間有信譽的都無問題.
佢地果d有牌子的電器, 一係就自己直接向大廠要貨, 亦有向香港的代理商取貨, 等同豐澤、泰林果d電器舖之嘛, 但就冇咁多分店或咁大財團係背後撐腰. 不過, 利潤點都唔及自己發掘一d二、三線牌子咁高; 你去某大型直銷店都會發覺, 佢有好多牌子, 話係意大利或日本名牌貨, 但真係聽都未聽過... 唔能夠否認, 呢d其實都係香港, 或一d小型外國廠家, 係中國大陸, 以至東南亞設廠所做的. 論款式拍得上大廠名牌出品, 但因為冇乜宣傳, 又或者, 佢地只求新款而非真正有心開發果種產品, 所以, 耐用程度的確冇大廠的咁高.
正因為佢地來貨價較低, 令直銷店的成本得以下調, 先可以用個較低價錢發售囉. 老實講, 家陣d人都冇以前咁長情啦; 一部電視機, 敝除安全耐用, 個個都要款新、價平、設備好, 如果買唔起大廠貨, 不如用一個較相宜的價錢, 買一部見得人的囉. 何況, 除咗d真係好high-tec的電器, 因為技術唔會出口外傳, 只會係本國製造外, 好多日本電器其實都係大陸出產之嘛. 再加上國產電器的技術而家都幾發達; 基本的安全措施其實都要自己負責架. 成日聽到d電視機因為短路而引發火警, 實情係, 部機如果太舊或保養唔好, 就算真係日本出產又如何呢?
所以, 我覺得去直銷店買電器, 好視乎你個人的要求同付出; 唔好又要馬兒好又要不吃草先得.
至於d傢俬呢, 我自己的經驗係, 其實同你去普通一間街邊地舖, 都冇乜分別; 一樣都係大陸貨式, 但直銷店可以用一個更低的貨錢賣畀你, 因為佢比起d街坊店舖的入貨率更大更高, 但d手工真係一般, 絕對講唔上好靚或好耐用. 我最唔想再幫襯直銷店買傢俬的理由, 係佢地冇乜售後服務, 而且, d運輸工人態度唔係咁好. 不過, 我領教過翡翠同實惠啦, 唔好得幾多. 至於宜家, 算係最有禮貌, 但要視乎來裝釘傢俬的師傅手勢囉... 嘩, 真係要撞手神架!!

002講得非常對,我個衣櫃同佢一樣,買咗無幾耐前又散,後又散,真係頂呢間鋪頭唔順!

此回應者答得絕對是事實，此間店舖是黑店，朋友亦曾糟央！

奉勸各位不要光顧此店！

我試過幫襯佢哋買咗一張牀和一個衣櫃，唔使一個月就鬆晒，開始散散哋添。
張牀仲要自己用釘釘過先瞓得，個衣櫃門又脫下.........早知就唔好幫襯佢哋啦！

對 'myemailmc' 君的講法, 我大致都好贊同, 特別係購買「傢俬」方面。但是, 對於購買「電器」方面 我就有小小補充。

本人曾經在一些著名的直銷店購買 電器(電風扇) 及 電子 (MP3) 產品。購買時店員都說有保養。但在三個月內已壞並需要修理時, 店員即說產品生產商只負責國內維修,香港消費者需負責比貨價更貴的運輸費, 把我氣得七竅生煙!

所以購買 電器 及 電子產品 最好都不要到直銷店了!